ಕ್ಯಾಲಿಫೋರ್ನಿಯಾ: ಸೋಷಿಯಲ್ ಮೀಡಿಯಾಗೆ ಜನರು ಅದೆಷ್ಟು ದಾಸರಾಗಿರುತ್ತಾರೆ ಎಂಬುದು ಎಲ್ಲರಿಗೂ ಗೊತ್ತಿರುವ ವಿಚಾರವೇ. ಅದರಲ್ಲೂ ಯುವ ಮನಸ್ಸುಗಳಿಗೆ ಒಂದು ರೀತಿ ವ್ಯಸನವಾಗಿ ಹೋಗಿದೆ. ಇದೀಗ ಫೇಸ್ಬುಕ್, ಇನ್ಸ್ಟಾಗ್ರಾಮ್ ಮೊದಲಾದ ಸೋಷಿಯಲ್ ಮೀಡಿಯ ವಿರುದ್ಧ ಅಮೆರಿಕದಲ್ಲಿ ಕಾನೂನು ಕ್ರಮ ಜರುಗಿಸಲು ಹೆಜ್ಜೆ ಇಡಲಾಗಿದೆ.
ಯುವ ಜನರ ಮಾನಸಿಕ ಆರೋಗ್ಯ ಹದಗೆಡಲು ಕಾರಣವಾಗಿರುವ ಮೆಟಾ ಪ್ಲಾಟ್ಫಾರ್ಮ್ಸ್ ವಿರುದ್ಧ ಅಮೆರಿಕದ ಫೆಡರಲ್ ಕೋರ್ಟ್ನಲ್ಲಿ ದೂರು ದಾಖಲಾಗಿದೆ. ಅಮೆರಿಕದ 50 ರಾಜ್ಯಗಳ ಪೈಕಿ 42 ರಾಜ್ಯಗಳ ಅಟಾರ್ನಿ ಜನರಲ್ಗಳು ಕ್ಯಾಲಿಫೋರ್ನಿಯಾದಲ್ಲಿರುವ ನ್ಯಾಯಾಲಯಕ್ಕೆ ದೂರು ಸಲ್ಲಿಸಿದ್ದಾರೆ.
“ಲಾಭದ ಉದ್ದೇಶದಿಂದ ಮೆಟಾ ಸಂಸ್ಥೆ ಆಧುನಿಕ ತಂತ್ರಜ್ಞಾನಗಳನ್ನು ಬಳಸಿ ಯುವ ಜನರು ಮತ್ತು ಹದಿಹರೆಯದ ಮಕ್ಕಳನ್ನು ಸೆಳೆಯುತ್ತಿವೆ. ಸೋಷಿಯಲ್ ಮೀಡಿಯಾಗಳ ಬಳಕೆಯಿಂದ ಮಕ್ಕಳಲ್ಲಿ ಖಿನ್ನತೆ, ಆತಂಕ, ನಿದ್ರಾಹೀನತೆ, ಶೈಕ್ಷಣಿಕ ಅಡಚಣೆ, ನಿತ್ಯಜೀವನ ತೊಡಕು ಇತ್ಯಾದಿಗಳು ಆಗುತ್ತಿರುವುದು ಸಂಶೋಧನೆಯಿಂದ ಸಾಬೀತಾಗಿದೆ ಎಂಬುದು ಅಟಾರ್ನಿ ಜನರಲ್ಗಳು ಸಲ್ಲಿಸಿರುವ ದೂರಿನಲ್ಲಿರುವ ಸಾರಾಂಶವಾಗಿದೆ.
ಆದರೆ ಇದಕ್ಕೆ ಪ್ರತಿಕ್ರಿಯಿಸರುವ ಮೆಟಾ “ದೂರು ನೀಡುವ ಬದಲು ಅಟಾರ್ನಿ ಜನರಲ್ಗಳು ಹದಿಹರೆಯದವರು ಬಳಸುವ ಆ್ಯಪ್ಗಳಿಗೆ ವಯೋಗುಣ ಪ್ರಮಾಣವನ್ನು ಸಿದ್ಧಪಡಿಸಲು ಉದ್ಯಮಗಳೊಂದಿಗೆ ಮಾತನಾಡಬಹುದಿತ್ತು” ಎಂದು ಹೇಳಿಕೆ ನೀಡಿದೆ.
