ಮಂಗಳೂರು: ನವ ಮಂಗಳೂರು ಬಂದರಿನಲ್ಲಿ ಹೊಸದಾಗಿ ನಿರ್ಮಿಸಲಾಗಿರುವ ಕಂಟೇನರ್ ಟರ್ಮಿನಲ್‌ಗೆ ಕಂಟೇನರ್‌ಗಳನ್ನು ಹೊತ್ತ ಹಡಗು ‘ಎಂವಿ ಹಾಂಗ್ ಎಎನ್’ ಶುಕ್ರವಾರ ಆಗಮಿಸಿದೆ.
ಚಿತ್ತಗಾಂಗ್ – ಕೊಲಂಬೊ – ಮಂಗಳೂರು – ನವಾ ಶೇವಾ – ಮುಂದ್ರಾ ಮಾರ್ಗವಾಗಿ ಪೂರ್ವಕ್ಕೆ ಜೆಬೆಲ್ ಅಲಿ- ಖಲೀಫಾ ಬಂದರು ಮಾರ್ಗದಲ್ಲಿ ಈ ಹಡಗು ಸಂಚರಿಸುತ್ತಿದೆ. ಭಾರತದ ರಫ್ತುದಾರ ಜೆಬೆಲ್ ಅಲಿ, ಅಬುಧಾಬಿ ಗೆ ನೇರ ಸೇವೆಯನ್ನು ಒದಗಿಸಲಿದೆ. ಅಮೆರಿಕ ಯುರೋಪ್, ಆಸ್ಟ್ರೇಯ ಏಶ್ಯ ಮತ್ತು ಆಫ್ರಿಕಾ ದೇಶಗಳಿಗೆ ರಫ್ತು ಸಾಮಗ್ರಿ ತಲುಪಿಸಲು ಸಹಕಾರಿಯಾಗಲಿದೆ.
ಎನ್‌ಎಂಪಿಎ ಅಧ್ಯಕ್ಷ ಡಾ.ಎ.ವಿ.ರಮಣ ಅವರು ಮೊದಲ ನೇರ ಮೇನ್‌ಲೈನ್ ಸೇವೆಯನ್ನು ಉದ್ಘಾಟಿಸಿದರು. ಹೆಡ್ ಇಂಡಿಯಾ ಆಪರೇಷನ್ಸ್ ಸಿಎಂಎ- ಸಿಜಿಎಂ ಕ್ಯಾಪ್ಟನ್ ಸಾಗರ್ ಡಾಂಗೆ, ಉಪಾಧ್ಯಕ್ಷ ರಾಮನಾಥನ್ ಉಪಸ್ಥಿತರಿದ್ದರು.
ಜೆಬೆಲ್ ಅಲಿ ಬಂದರಿಗೆ ಹಿಂದೆ ಕಂಟೇನರ್ ಹಡಗು ತಲುಪಲು 13-15 ದಿನಗಳು ಬೇಕಾಗಿತ್ತು. ಹೊಸ ಹಡಗು ಒಂದು ವಾರದಲ್ಲಿ ತಲುಪಲಿದೆ. ಸಾಗಾಟ ವೆಚ್ಚ ಕೂಡಾ ಕಡಿಮೆಯಾಗಲಿದೆ. ಜಲ ಮತ್ತು ವಾಯು ಮಾರ್ಗದಲ್ಲಿ ಕಾರ್ಗೊ ಸಾಗಾಟಕ್ಕೆ ಇದು ಸಹಕರಾರಿಯಾಗಿದೆ.
ಕಂಟೇನರ್ ಹಡಗಿನ ಸೇವೆಯು ಔಷಧ, ಹಣ್ಣು, ತರಕಾರಿ ಬೇಗನೆ ಮಾರುಕಟ್ಟೆ ತಲುಪಲು ನೆರವಾಗಲಿದ್ದು, ಕರ್ನಾಟಕದಿಂದ ವಿಶೇಷವಾಗಿ ಕೃಷಿ ಉತ್ಪನ್ನಗಳ ರಫ್ತು ಮಾಡಲು ಪ್ರಮುಖ ಉತ್ತೇಜನ ದೊರೆಯುವುದನ್ನು ನಿರೀಕ್ಷಿಸಲಾಗಿದೆ ಎಂದು ನವಮಂಗಳೂರು ಮೂಲಗಳು ತಿಳಿಸಿವೆ.
