ಜಮ್ಮು: ಜಮ್ಮು ಮತ್ತು ಕಾಶ್ಮೀರದ ಲೆಫ್ಟಿನೆಂಟ್ ಗವರ್ನರ್ ಮನೋಜ್ ಸಿನ್ಹಾ ಅವರು ಶುಕ್ರವಾರ ಜಮ್ಮು ನಗರದಿಂದ ಅಮರನಾಥ ಯಾತ್ರಾರ್ಥಿಗಳ ಮೊದಲ ಬ್ಯಾಚ್‌ಗೆ ಚಾಲನೆ ನೀಡಿದರು.
ಸುಮಾರು 3,300 ಯಾತ್ರಾರ್ಥಿಗಳನ್ನು ಒಳಗೊಂಡ ಮೊದಲ ತಂಡವು ಭಗವತಿ ನಗರ ಯಾತ್ರಿ ನಿವಾಸದಿಂದ 159 ಬೆಂಗಾವಲು ವಾಹನಗಳಲ್ಲಿ ಕಾಶ್ಮೀರ ಕಣಿವೆಯ ಬಲ್ಟಾಲ್ ಮತ್ತು ಪಹಲ್ಗಾಮ್ ಮೂಲ ಶಿಬಿರಗಳಿಗೆ ತೆರಳಿತು. 62 ದಿನಗಳ ಅಮರನಾಥ ಯಾತ್ರೆ ಶನಿವಾರ ಆರಂಭವಾಗಲಿದ್ದು, ಶ್ರಾವಣ ಪೂರ್ಣಿಮಾ ಹಬ್ಬದೊಂದಿಗೆ ಆಗಸ್ಟ್ 31 ರಂದು ಕೊನೆಗೊಳ್ಳಲಿದೆ.
ಗುಹಾ ದೇಗುಲವನ್ನು ಸಮೀಪಿಸಲು ಎರಡು ಮಾರ್ಗಗಳಿದ್ದು, ಗಂದರ್‌ಬಾಲ್ ಜಿಲ್ಲೆಯ ಮೂಲಕ 13 ಕಿಮೀ ಉದ್ದದ ಮಾರ್ಗದಲ್ಲಿ ಸಾಗಬಹುದು. ಅದೇ ರೀತಿ ಅನಂತನಾಗ್‌ನಲ್ಲಿ 43 ಕಿಮೀ ಉದ್ದದ ಪಹಲ್ಗಾಮ್ ಮಾರ್ಗದಲ್ಲಿ ಸಾಗಬಹುದು. ಸಮುದ್ರ ಮಟ್ಟದಿಂದ 3,888 ಮೀಟರ್ ಎತ್ತರದಲ್ಲಿ ನೆಲೆಗೊಂಡಿರುವ ಈ ಗುಹೆ ದೇವಾಲಯವು ಭಕ್ತರ ಪ್ರಕಾರ ಶಿವನ ಪೌರಾಣಿಕ ಶಕ್ತಿಯನ್ನು ಸಂಕೇತಿಸುವ ಪವಿತ್ರ ‘ಲಿಂಗ’ ಎಂಬ ಐಸ್ ಸ್ಟಾಲಗ್ಮೈಟ್ ರಚನೆ ಹೊಂದಿದೆ.
