ಒಬ್ಬ ಸ್ಟಾರ್ ನಿರ್ದೇಶಕ, ಒಬ್ಬ ಸ್ಟಾರ್ ನಟ ಮತ್ತೊಂದು ಸ್ಟಾರ್ ತಂಡ ಸೇರಿ ಮಾಡಿದ ಸಿನೆಮಾದ ಮೇಲೆ ನಿರೀಕ್ಷಗಳು ಹುಟ್ಟುವುದು ಸಹಜ. ಆದರೆ ದೊಡ್ಮನೆ ಹುಡ್ಗ ನಿರೀಕ್ಷಿಸಿದ ಮಟ್ಟಿಗೆ ಅದ್ಭುತ ಸಿನೆಮಾವಾಗದೆ ಅಭಿಮಾನಿಗಳಿಗಾಗೇ ಮಾಡಿದ ಮಾಮೂಲಿ ಕಮರ್ಷಿಯಲ್ ಸಿನೆಮಾವಾಗಿದೆ. ಒಂದಷ್ಟು ಮೈನವಿರೇಳಿಸುವ ಹೊಡೆದಾಟಗಳು, ಕಚಗುಳಿಯಿಡುವ ಸಂಭಾಷಣೆಗಳ ಜೊತೆ ಪವರ್ ಸ್ಟಾರ್ ಎಂದಿನಂತೆ ಪವರ್ ಫುಲ್ ಆಗಿದ್ದರೆ, ರೆಬೆಲ್ ಸ್ಟಾರ್ ಹಳ್ಳಿಗರಿಗೆ ದಾನಶೂರ ಕರ್ಣನಾಗಿ, ದುಷ್ಟರಿಗೆ ಬಲಭೀಮನಾಗಿ ಮೆರೆದಿದ್ದಾರೆ.
ರಾಕಿಂಗ್ ಕ್ವೀನ್ ರಾಧಿಕಾ ಎಂದಿಗಿಂತ ಮುದ್ದಾಗಿ ಕಾಣಿಸಿ ನಶೆಯೇರಿಸುತ್ತಾರೆ. ಅರ್ಮುಗಂ ರವಿಶಂಕರ್ ಅಬ್ಬರ ಚಿತ್ರವನ್ನು ಜೀವಂತವಿರಿಸಿದರೆ, ದ್ವಿತಿಯಾರ್ಧದಲ್ಲಿ ಬರುವ ಚಿಕ್ಕಣ್ಣ ಸಣ್ಣ ಪಾತ್ರದಲ್ಲೇ ಮಿಂಚಿದ್ದಾರೆ. ಉಳಿದಂತೆ ಭಾರತೀ ವಿಷ್ಣುವರ್ಧನ್, ಸುಮಲತಾ, ಡಾರ್ಲಿಂಗ್ ಕೃಷ್ಣ,ರಂಗಾಯಣ ರಘು,ಶ್ರೀನಿವಾಸ್ ಮೂರ್ತಿ, ಬಿ ಸುರೇಶ್ ಅವರ ಬಗ್ಗೆ ಹೆಚ್ಚು ಹೇಳಬೇಕಿಲ್ಲ. ಸೂರಿ ಶೈಲಿಯ ಸಿನೆಮಾಗಳನ್ನು ಬಯಸುವವರಿಗೆ ದೊಡ್ಮನೆ ಹುಡ್ಗ ನೀರಸವೆನಿಸಿದರೂ ಪವರ್ ಸ್ಟಾರ್ ಅಭಿಮಾನಿಗಳಿಗೆ ಹೇಳಿ ಮಾಡಿಸಿದ ಸಿನೆಮಾ. ನಿರ್ದೇಶಕರು ಅಪ್ಪು ಮತ್ತು ಅಂಬಿಯವರ ಪಾತ್ರವನ್ನು ಕಟ್ಟುವ ಭರದಲ್ಲಿ ನಾಯಕಿ ಪಾತ್ರವನ್ನು ಎಲ್ಲೋ ಕಡೆಗಣಿಸಿದಂತೆ ಕಾಣಿಸುತ್ತದೆ. ಸಂಗೀತ ನಿರ್ದೇಶಕ ಹರಿಕೃಷ್ಣ ಅವರು ತಾವು ಹಾಡುವುದನ್ನು ಬಿಟ್ಟು ವೃತ್ತಿಪರ ಗಾಯಕರಿಗೆ ಅಥವಾ ಹೊಸ ಪ್ರತಿಭೆಗಳಿಗೆ ಅವಕಾಶ ಕೊಟ್ಟಿದ್ದರೆ ಕೇಳುಗನ ಕಿವಿ ತಮಟೆಗಾದರೂ ನೆಮ್ಮದಿ ಸಿಗುತ್ತಿತ್ತು. ಎಂ.ಗೋವಿಂದ ಅವರ ನಿರ್ಮಾಣದ ದೊಡ್ಮನೆ ಹುಡ್ಗ ಒಮ್ಮೆ ನೋಡಲಡ್ಡಿಯಿಲ್ಲ. ಮನರಂಜನೆಗೆ ಮೋಸವಿಲ್ಲ.
