ಮೈಸೂರು : ಶ್ರೀ ಚಾಮರಾಜೇಂದ್ರ ಮೃಗಾಲಯದ ಪ್ರಾಚಿ ಎಂಬ ಜಿಬ್ರಾ ಒಂದು ಹೆಣ್ಣು ಮರಿಗೆ ಜನ್ಮ ನೀಡಿದೆ. ಡಿ.11ರಂದು ಪ್ರಾಚಿ ಜೀಬ್ರಾ ಮರಿಗೆ ಜನ್ಮ ನೀಡಿದ್ದು, ಮರಿ ಹಾಗೂ ತಾಯಿ ಜೀಬ್ರಾ ಆರೋಗ್ಯದಿಂದಿವೆ. ಪ್ರಾಚಿ ಮತ್ತು ರಿಷಿ ಜೀಬ್ರಾಗಳಿಗೆ ಈ ಮರಿಯು ಜನಿಸಿದ್ದು, ಮೈಸೂರು ಮೃಗಾಲಯದ ಇತಿಹಾಸದಲ್ಲಿ ಮೃಗಾಲಯದಲ್ಲಿಯೇ ಜನಿಸಿದ ಐದನೇ ಜೀಬ್ರಾ ಮರಿ ಇದಾಗಿದೆ. ಅಲ್ಲದೆ ಪ್ರಾಚಿಗೆ ಎರಡನೇ ಮರಿಯಾಗಿದೆ.
ಪ್ರಸ್ತುತ 3 ಗಂಡು ಮತ್ತು 5 ಹೆಣ್ಣು ಜೀಬ್ರಾಗಳು ಮೈಸೂರು ಮೃಗಾಲಯದಲ್ಲಿವೆ. ಹೊಸ ಮರಿಯ ಆಗಮನವು ಮೃಗಾಲಯದ ಸಿಬ್ಬಂದಿಗಳಲ್ಲಿ ಸಂತಸವನ್ನು ತಂದಿದೆ. ಮುಂದಿನ ದಿನಗಳಲ್ಲಿ ಈ ಮರಿಯ ವೀಕ್ಷಣೆಗೆ ಸಾರ್ವಜನಿಕರಿಗೆ ಅವಕಾಶ ಮಾಡಿಕೊಡುವ ಸಾಧ್ಯತೆಯಿದೆ.
ಶಿವಮೊಗ್ಗಕ್ಕೆ ನೀರು ಕುದುರೆ:
ಇನ್ನೊಂದೆಡೆ ಶಿವಮೊಗ್ಗದ ತ್ಯಾಮರೆಕೊಪ್ಪ ಹುಲಿ ಮತ್ತು ಸಿಂಹ ಧಾಮದಲ್ಲಿ ಪ್ರಾಣಿ ಸಂಗ್ರಹವನ್ನು ಸಮೃದ್ಧಿಗೊಳಿಸಲು ಮೈಸೂರು ಮೃಗಾಲಯದಿಂದ ಹಂಸ ಎಂಬ ಹೆಸರಿನ ಎಂಟು ವರ್ಷದ ಒಂದು ನೀರು ಕುದುರೆಯನ್ನು ಹಾಗೂ ಐದು ಹಂದಿ ಜಿಂಕೆಗಳನ್ನು ಕಳುಹಿಸಲಾಗಿದೆ. ಆ ಮೂಲಕ ಅಲ್ಲಿನವರಿಗೆ ಆಫ್ರಿಕನ್ ಪ್ರಾಣಿಯನ್ನು ನೋಡುವ ಅವಕಾಶ ದೊರೆತಂತಾಗಿದೆ ಎಂದು ಮೃಗಾಲಯದ ಕಾರ್ಯನಿರ್ವಾಹಣಾಧಿಕಾರಿ ಅಜಿತ್ ಕುಲಕರ್ಣಿ ತಿಳಿಸಿದ್ದಾರೆ.
