ಮಂಗಳೂರು: ಕೊಂಕಣಿ ಭಾಷೆ, ಸಂಸ್ಕೃತಿ ಮತ್ತು ಜನರನ್ನು ಉತ್ತೇಜಿಸುವ ಲಾಭರಹಿತ ಸಂಸ್ಥೆಯಾದ ವಿಶ್ವ ಕೊಂಕಣಿ ಕೇಂದ್ರವು ಏಷ್ಯಾದ ಅತ್ಯಂತ ಕಿರಿಯ ಸೋಲೋ ರೈಡರ್ ಅಮೃತಾ ಜೋಶಿ ಅವರೊಂದಿಗೆ ಮೋಟಾರ್ ಸ್ಪೋರ್ಟ್ ನಲ್ಲಿ ಉನ್ನತ ತರಬೇತಿಯನ್ನು ಬೆಂಬಲಿಸಲು ತಿಳುವಳಿಕಾ ಒಡಂಬಡಿಕೆಗೆ ಸಹಿ ಹಾಕಿದೆ.
ಕೇರಳದ ಕುಂಬಳೆ ಮೂಲದ ಕೊಂಕಣಿ ಮಾತನಾಡುವ ಕುಟುಂಬಕ್ಕೆ ಸೇರಿದ 23 ವರ್ಷದ ಯುವತಿ ಅಮೃತಾ ಜೋಶಿ ಇತ್ತೀಚೆಗೆ ಭಾರತ ಮತ್ತು ನೆರೆಯ ದೇಶಗಳಲ್ಲಿ 23,000 ಕಿ.ಮೀ.ಗೂ ಹೆಚ್ಚು ದೂರವನ್ನು ಏಕಾಂಗಿಯಾಗಿ ಬೈಕ್ ಸವಾರಿ ಮಾಡುವ ಮೂಲಕ ಮಹಿಳಾ ಸುರಕ್ಷತೆ, ಪರಿಸರ ಸಂರಕ್ಷಣೆ ಮತ್ತು ರಸ್ತೆ ಸುರಕ್ಷತೆಯಂತಹ ವಿಷಯಗಳ ಬಗ್ಗೆ ಗಮನ ಸೆಳೆದಿದ್ದಾರೆ. ಅವರ ಹೆಸರು ಏಷ್ಯಾ ಬುಕ್ ಆಫ್ ರೆಕಾರ್ಡ್ಸ್ ಮತ್ತು ಇಂಡಿಯನ್ ಬುಕ್ ಆಫ್ ರೆಕಾರ್ಡ್ಸ್ನಲ್ಲಿ ಅತ್ಯಂತ ಕಿರಿಯ ಏಕವ್ಯಕ್ತಿ ರೈಡರ್ ಎಂದು ದಾಖಲಾಗಿದೆ. ಅವರು ದೇಶಾದ್ಯಂತದ ಯುವಕರಿಗೆ ಸ್ಫೂರ್ತಿಯಾಗಿದ್ದಾರೆ, ಮತ್ತು ವಿಶ್ವ ಕೊಂಕಣಿ ಕೇಂದ್ರವು ಅವರ ಸಾಧನೆಯನ್ನು ಗುರುತಿಸಿದೆ.
ವಿಶ್ವ ಕೊಂಕಣಿ ಕೇಂದ್ರ ಮತ್ತು ಅಮೃತಾ ಜೋಶಿ ನಡುವಿನ ತಿಳುವಳಿಕಾ ಒಡಂಬಡಿಕೆಗೆ ಗುರುವಾರ ಮಂಗಳೂರಿನ ವಿಶ್ವ ಕೊಂಕಣಿ ಕೇಂದ್ರದಲ್ಲಿ ಸಹಿ ಹಾಕಲಾಯಿತು. ಈ ವಿದ್ಯಾರ್ಥಿವೇತನವು ಡರ್ಟ್ ರ್ಯಾಲಿ ಮತ್ತು ಸರ್ಕ್ಯೂಟ್ ರೇಸಿಂಗ್ನಲ್ಲಿ ಅಮೃತಾ ಅವರ ತರಬೇತಿಯ ವೆಚ್ಚವನ್ನು ಭರಿಸುತ್ತದೆ, ಇದು ಮೋಟಾರ್ ಸ್ಪೋರ್ಟ್ಸ್ನ ಅತ್ಯುನ್ನತ ಮಟ್ಟದಲ್ಲಿ ಸ್ಪರ್ಧಿಸಲು ಅಗತ್ಯವಾದ ಕೌಶಲ್ಯ ಮತ್ತು ಜ್ಞಾನ ಹೆಚ್ಚಿಸಲು ಸಹಕಾರಿಯಾಗಿದೆ. ಈ ಬೆಂಬಲದೊಂದಿಗೆ, ಅಮೃತಾ ರೈಡರ್ ಆಗಿ ತನ್ನ ಪ್ರಯಾಣವನ್ನು ಮುಂದುವರಿಸಲು ಮತ್ತು ವೃತ್ತಿಪರ ರೇಸರ್ ಆಗುವ ಕನಸನ್ನು ಮುಂದುವರಿಸಲು ಸಾಧ್ಯವಾಗುತ್ತದೆ.
“ಅಮೃತಾ ಜೋಶಿ ಅವರೊಂದಿಗೆ ಈ ತಿಳಿವಳಿಕೆ ಒಪ್ಪಂದಕ್ಕೆ ಸಹಿ ಹಾಕಿರುವುದು ನಮಗೆ ಹೆಮ್ಮೆ ಎಂದು ವಿಶ್ವ ಕೊಂಕಣಿ ಕೇಂದ್ರದ ಅಧ್ಯಕ್ಷ ನಂದಗೋಪಾಲ್ ಶೆಣೈ ಹೇಳಿದರು. ಜಗತ್ತಿನಲ್ಲಿ ಬದಲಾವಣೆ ತರುತ್ತಿರುವ ಯುವಕರನ್ನು ಬೆಂಬಲಿಸುವ ನಮ್ಮ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ. ಅಮೃತಾ ವೃತ್ತಿಜೀವನ ಉತ್ತಮವಾಗಿರಲಿ ಎಂದು ಹಾರೈಸಿದರು.
ಈ ಸಂಧರ್ಭ ಮಾತನಾಡಿದ ಅಮೃತಾ, ವಿಶ್ವ ಕೊಂಕಣಿ ಕೇಂದ್ರದ ಬೆಂಬಲ ಮತ್ತು ಪ್ರೋತ್ಸಾಹಕ್ಕೆ ನಾನು ಆಭಾರಿಯಾಗಿದ್ದೇನೆ ಎಂದರು. “ಈ ವಿದ್ಯಾರ್ಥಿವೇತನವು ಸವಾರರಾಗಿ ನನ್ನ ಕೌಶಲ್ಯಗಳನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಹೆಮ್ಮೆಯ ಕೊಂಕಣಿ ಸಮುದಾಯದ ವ್ಯಕ್ತಿಯಾಗಿ ದೇಶಾದ್ಯಂತದ ಯುವಜನರಿಗೆ ಸಾಧನೆ ಮಾಡಲು ಪ್ರೇರಣೆ ಮಾಡುತ್ತೇನೆ ಎಂದರು.
ವಿಶ್ವ ಕೊಂಕಣಿ ಕೇಂದ್ರವು ಮುಂದಿನ ಪೀಳಿಗೆಯ ನಾಯಕರಿಗೆ ನೆರವು ಒದಗಿಸುವ ಮೂಲಕ ಸಮಾಜದ ಪ್ರಗತಿಗೆ ಶ್ರಮಿಸುತ್ತಿದೆ. ವಿದ್ಯಾರ್ಥಿ ವೇತನ 3.6 ಲಕ್ಷ ರೂ. ಹೊಂದಿದ್ದು, ಅಮೃತಾ ಅವರ ಡರ್ಟ್ ರ್ಯಾಲಿ ಮತ್ತು ಸರ್ಕ್ಯೂಟ್ ರೇಸಿಂಗ್ನಲ್ಲಿ ಒಂದು ವರ್ಷದ ಸುಧಾರಿತ ತರಬೇತಿಯ ವೆಚ್ಚವನ್ನು ಒಳಗೊಂಡಿದೆ.