ನವದೆಹಲಿ: ನವದೆಹಲಿಯಲ್ಲಿ ಭಾರಿ ವೈದ್ಯಕೀಯ ಅಕ್ರಮವೊಂದು ಬೆಳಕಿಗೆ ಬಂದಿದೆ. ದೆಹಲಿಯ ಐಷಾರಾಮಿ ವಿಲ್ಲಾಗಳನ್ನು ಹೊಂದಿರುವ ಪ್ರದೇಶವೆಂದೇ ಪರಿಗಣಿಸಲಾದ ಗ್ರೇಟರ್ ಕೈಲಾಶ್ ನಲ್ಲಿ ನಾಲ್ವರು ನಕಲಿ ವೈದ್ಯರು, ಶಸ್ತ್ರಚಿಕಿತ್ಸಾ ತಜ್ಞರೆಂದು ಫೋಸ್‌ ನೀಡುತ್ತಿದ್ದವರನ್ನು ಪೊಲೀಸರು ಬಂಧಿಸಿದ್ದಾರೆ.
ಡಾ ನೀರಜ್ ಅಗರ್ವಾಲ್, ಆತನ ಪತ್ನಿ ಪೂಜಾ ಅಗರ್ವಾಲ್ ಮತ್ತು ಡಾ ಜಸ್ಪ್ರೀತ್ ಸಿಂಗ್, ಪ್ರಯೋಗಾಲಯ ತಂತ್ರಜ್ಞನೆಂದು ಹೇಳಿಕೊಂಡಿದ್ದ ಮಹೇಂದರ್ ಸಿಂಗ್ ಎಂಬಾತನನ್ನು ಬಂಧಿಸಲಾಗಿದೆ ಪೊಲೀಸರು ತಿಳಿಸಿದ್ದಾರೆ.
ಪ್ರಕರಣವೇನು: ಅಸ್ಗರ್ ಅಲಿ ಎಂಬ ರೋಗಿಯನ್ನು 2022 ರಲ್ಲಿ ಪಿತ್ತಕೋಶ ಸಮಸ್ಯೆ ಚಿಕಿತ್ಸೆಗಾಗಿ ಕ್ಲಿನಿಕ್‌ಗೆ ದಾಖಲಿಸಲಾಗಿತ್ತು. ಆರಂಭದಲ್ಲಿ ಅರ್ಹ ಶಸ್ತ್ರಚಿಕಿತ್ಸಕರಾದ ಡಾ ಜಸ್ಪ್ರೀತ್ ಅವರು ಶಸ್ತ್ರಚಿಕಿತ್ಸೆ ನಡೆಸುತ್ತಾರೆ ಎಂದು ಅಲಿ ಅವರಿಗೆ ತಿಳಿಸಲಾಗಿತ್ತು. ಆದರೆ ಡಾ.ಜಸ್ಪ್ರೀತ್ ಬದಲಿಗೆ ಪೂಜಾ ಮತ್ತು ಮಹೇಂದ್ರ ಅವರು ಶಸ್ತ್ರಚಿಕಿತ್ಸೆ ನಡೆಸಿದರು. ಶಸ್ತ್ರಚಿಕಿತ್ಸೆ ನಡೆಸಿ ನಕಲಿ ವೈದ್ಯರು ಕೊಠಡಿಯಿಂದ ಹೊರಹೋದ ತಕ್ಷಣವೇ ರೋಗಿ ಸಾವನ್ನಪ್ಪಿದ್ದಾರೆ. ಎಂದು ವೈದ್ಯರ ವಿರುದ್ಧ ಕುಟುಂಬಸ್ಥರು ಪೊಲೀಸರಿಗೆ ದೂರು ನೀಡಿದ್ದರು.
ಬಳಿಕ ತನಿಖೆ ನಡೆಸಿದ ಪೊಲೀಸರಿಗೆ ಆಘಾತಕಾರಿ ವಿಷಯಗಳು ತಿಳಿದು ಬಂದಿದ್ದು, ಅಗರ್ವಾಲ್ ಮತ್ತು ಆತನ ಪತ್ನಿ ಸೇರಿದಂತೆ ನಾಲ್ವರು ನಕಲಿ ವೈದ್ಯರಾಗಿದ್ದರು ಎಂಬುದು ದೃಢಪಟ್ಟಿದೆ. ಅಲ್ಲದೆ ಈ ದಂಧೆ ಕೋರರು ವೈದ್ಯಕೀಯ ದಾಖಲೆಗಳನ್ನೇ ತಿರುಚಿ ಸಾವನ್ನಪ್ಪಿದ್ದು, ವಿವಿಧ ಕಾಯಿಲೆಗಳಿಂದ ಎಂದು ನಿರೂಪಿಸುತ್ತಿದ್ದರು. ಈ ದಂಧೆಕೋರರ ವಿರುದ್ಧ ಈ ಹಿಂದೆಯೂ 7 ದೂರುಗಳು ಬಂದಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ.
