ತ್ರೈಮಾಸಿಕ ನಷ್ಟದಲ್ಲೂ ವಾರ್ಷಿಕ ಆದಾಯದಲ್ಲಿ ಭರ್ಜರಿ ಏರಿಕೆ ಕಂಡ ಪೇಟಿಎಂ

ಪೇಟಿಎಂ 2024ರ ಜನವರಿಯಿಂದ ಮಾರ್ಚ್​ವರೆಗಿನ ಕ್ವಾರ್ಟರ್​ನಲ್ಲಿ ಮಿಶ್ರಾನುಭವ ಪಡೆದಿದೆ. ತ್ರೈಮಾಸಿಕ ಅವಧಿಯಲ್ಲಿ ಒಂದಷ್ಟು ನಿರೀಕ್ಷಿತ ನಿರಾಸೆ ಹೊರತುಪಡಿಸಿ, 2023-24ರ ಹಣಕಾಸು ವರ್ಷದಲ್ಲಿ ಒಟ್ಟಾರೆ ಅದು ಉತ್ತಮ ಸಾಧನೆ ತೋರಿರುವುದು ಕಂಡು ಬಂದಿದೆ.2023-24ರಲ್ಲಿ ಪೇಟಿಎಂ ಆದಾಯ 9,978 ಕೋಟಿ ರೂನಷ್ಟಾಗಿದೆ. ಒಂದು ವರ್ಷದಲ್ಲಿ ಆದಾಯದಲ್ಲಿ ಶೇ. 25ರಷ್ಟು ಹೆಚ್ಚಾಗಿದೆ. ಕಂಪನಿಯ ಪೂರ್ಣ ವರ್ಷದ EBITDA ಮೊದಲ ಬಾರಿಗೆ 559 ಕೋಟಿ ರೂ.ಗೆ ತಲುಪಿದೆ

ಪೇಟಿಎಂ ತ್ರೈಮಾಸಿಕ ವರದಿಯಲ್ಲಿ ಜನವರಿಯಿಂದ ಮಾರ್ಚ್​ವರೆಗಿನ ಅವಧಿಯಲ್ಲಿ 550 ಕೋಟಿ ರೂ ನಷ್ಟ ಕಂಡಿದೆ. ಹಿಂದಿನ ವರ್ಷದ ಇದೇ ಕ್ವಾರ್ಟರ್​ನಲ್ಲಿ 169 ಕೋಟಿ ರೂ ನಷ್ಟವಾಗಿತ್ತು. ಈ ಬಾರಿ ಆ ನಷ್ಟ ಹಿಗ್ಗಿದೆ. ಇದೇ ಅವಧಿಯಲ್ಲಿ ರೆವಿನ್ಯೂ ಅಥವಾ ಆದಾಯ 2,267 ಕೋಟಿ ರೂನಷ್ಟಿದೆ. ಹಿಂದಿನ ವರ್ಷದ ಅವಧಿಗೆ ಹೋಲಿಸಿದರೆ ಇದರಲ್ಲಿ ಶೇ. 3ರಷ್ಟು ಇಳಿಮುಖವಾಗಿದೆ. ಆದರೆ, ಒಟ್ಟಾರೆ ಒಂದು ವರ್ಷದ ನೋಟ ನೋಡಿದಾಗ ಆದಾಯದಲ್ಲಿ ಶೇ. 25ರಷ್ಟು ಹೆಚ್ಚಾಗಿರುವುದು ಕಂಡುಬಂದಿದೆ.