ಬೀಜಿಂಗ್: ಕೊರೊನಾ ವೈರಸ್ ಸೋಂಕು ದೃಢಪಟ್ಟ ಹಿನ್ನೆಲೆಯಲ್ಲಿ ಚೀನಾದ ಉತ್ತರ ಭಾಗದಲ್ಲಿ ಮೂರು ಸಾಕು ಬೆಕ್ಕುಗಳನ್ನು ಹತ್ಯೆ ಮಾಡಲಾಗಿದೆ ಎಂದು ಸ್ಥಳೀಯ ಮಾಧ್ಯಮಗಳು ವರದಿ ಮಾಡಿವೆ. ಕಾಯಿಲೆಗೆ ತುತ್ತಾದ ಪ್ರಾಣಿಗಳಿಗೆ ಯಾವುದೇ ಸಮರ್ಪಕ ಚಿಕಿತ್ಸಾ ವಿಧಾನ ಇಲ್ಲದಿರುವುದರಿಂದ ಈ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಹರ್ಬಿನ್ ಪ್ರಾಂತ್ಯದ ಅಧಿಕಾರಿಗಳು ತಿಳಿಸಿದ್ದಾರೆ.
ಬೆಕ್ಕುಗಳಲ್ಲಿ ಕಾಣಿಸಿಕೊಂಡ ಕೋವಿಡ್ 19, ಅವುಗಳ ಮಾಲೀಕರು ಹಾಗೂ ಅಪಾರ್ಟ್‌ಮೆಂಟ್ ಸಂಕೀರ್ಣದಲ್ಲಿರುವ ಇತರೆ ನಿವಾಸಿಗಳಿಗೂ ಸೋಂಕು ಹರಡಿ ಅಪಾಯ ಉಂಟಾಗುವ ಸಾಧ್ಯತೆ ಇರುತ್ತದೆ ಎಂದು ಅವರು ಹೇಳಿದ್ದಾರೆ.
ಸೆ. 21ರಂದು ಬೆಕ್ಕುಗಳ ಮಾಲೀಕರಲ್ಲಿ ಕೋವಿಡ್ 19 ಪಾಸಿಟಿವ್ ಪತ್ತೆಯಾಗಿತ್ತು. ಮೂರು ಬೆಕ್ಕುಗಳಿಗೂ ಆಹಾರ ಮತ್ತು ನೀರನ್ನು ಇರಿಸಿ ಅವರು ಐಸೋಲೇಷನ್‌ಗೆ ಒಳಪಟ್ಟಿದ್ದರು. ಆರೋಗ್ಯ ಕಾರ್ಯಕರ್ತರೊಬ್ಬರು ಅಪಾರ್ಟ್‌ಮೆಂಟ್‌ಗೆ ಬಂದು ಬೆಕ್ಕುಗಳಿಗೂ ಕೋವಿಡ್ ಪರೀಕ್ಷೆ ನಡೆಸಿದ್ದರು. ಅವುಗಳ ಪೈಕಿ ಎರಡರಲ್ಲಿ ಕೊರೊನಾ ವೈರಸ್ ಸೋಂಕು ಇರುವುದು ವರದಿಯಿಂದ ದೃಢಪಟ್ಟಿತ್ತು. ಐಸೋಲೇಷನ್‌ನಲ್ಲಿದ್ದ ಮಾಲಕಿ ಲಿಯು, ಆನ್‌ಲೈನ್‌ನಲ್ಲಿ ನಿವೇದಿಸಿಕೊಂಡರೂ ಅದಕ್ಕೆ ಕಿವಿಗೊಡದ ಅಧಿಕಾರಿಗಳು ಸೋಂಕು ದೃಢಪಡದ ಬೆಕ್ಕು ಸೇರಿದಂತೆ ಎಲ್ಲ ಮೂರೂ ಬೆಕ್ಕುಗಳನ್ನು ಕೊಂದು ಹಾಕಿದ್ದಾರೆ.
ಚೀನಾದಲ್ಲಿ ಪ್ರಾಣಿಗಳನ್ನು ಸಾಕುವ ಹವ್ಯಾಸ ಹೆಚ್ಚು ಜನಪ್ರಿಯವಾಗುತ್ತಿದೆ. ಆದರೆ ಈಗ ಬೆಕ್ಕುಗಳಲ್ಲಿ ಸೋಂಕು ಕಾಣಿಸಿಕೊಂಡ ಕಾರಣಕ್ಕೆ ಅವುಗಳನ್ನು ಸಾಯಿಸಿದ ಕ್ರಮವು ಸಾಕಷ್ಟು ಚರ್ಚೆ ಹುಟ್ಟುಹಾಕಿದೆ. ಮನೆಯಲ್ಲಿ ಬೆಕ್ಕು, ನಾಯಿಗಳಂತಹ ಪ್ರಾಣಿಗಳನ್ನು ಸಾಕುತ್ತಿರುವವರಲ್ಲಿ ಇದು ಭಯ ಮೂಡಿಸಿದೆ.ಪ್ರಾಣಿಗಳಲ್ಲಿ ಕೋವಿಡ್ 19 ಸೋಂಕು ಕಾಣಿಸಿಕೊಂಡರೂ, ಅವುಗಳಿಂದ ಮನುಷ್ಯರಿಗೆ ವೈರಸ್ ಹರಡುವ ಅಪಾಯ ತೀರಾ ಕಡಿಮೆ. ಅತಿ ಸಮೀಪದ ಸಂಪರ್ಕದ ಸಂದರ್ಭಗಳಲ್ಲಿ ಸೋಂಕು ಹರಡಬಹುದು ಎಂದು ಅಮೆರಿಕದ ಕಾಯಿಲೆ ನಿಯಂತ್ರಣ ಮತ್ತು ತಡೆ ಕೇಂದ್ರ ಹೇಳಿತ್ತು.
