ಬೀಜಿಂಗ್ : ವ್ಯಾಪಾಕವಾಗಿ ಹರಡುತ್ತಿರುವ ಕರೋನಾ ಸೋಂಕನ್ನು ತಡೆಗಟ್ಟಲು ಚೀನಾ ಕಠಿಣ ಜರುಗಿಸುವುದಕ್ಕೆ ಮುಂದಾಗಿದೆ. ಸೋಂಕು ತಗುಲಿದ ಕುಟುಂಬದ ನಿವಾಸಿಗಳನ್ನು ಚೀನಾ ಅಧಿಕಾರಿಗಳು ಮನೆಯ ಒಳಗೆ ಕೂಡಿ ಹಾಕುವ ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿವೆ.
ಹಿಂದೆ ಚೀನಾದ ವುಹಾನ್ನಲ್ಲಿ ಮೊದಲು ಕೊರೊನಾ ವೈರಸ್ ಸೋಂಕು ಹರಡಲು ಆರಂಭವಾದಾಗ ಇದೇ ರೀತಿಯ ಕ್ರಮಗಳನ್ನು ತೆಗೆದುಕೊಳ್ಳಲಾಗಿತ್ತು. ಈಗ ಚೀನೀ ಅಧಿಕಾರಿಗಳನ್ನು ಅದನ್ನು ಪುನಃ ಪ್ರಯೋಗಿಸುತ್ತಿದ್ದಾರೆ ಎಂದು ‘ತೈವಾನ್ ನ್ಯೂಸ್’ ವರದಿಗಾರ ಕಿಯೋನಿ ಎವರಿಂಗ್ಟನ್ ತಿಳಿಸಿದ್ದಾರೆ.
ಪಿಪಿಇ ಕಿಟ್ ಧರಿಸಿದ ಅಧಿಕಾರಿಗಳು ಮನೆಗಳ ಒಳಗೆ ಜನರನ್ನು ಕೂಡಿ ಹಾಕಿ, ಅವರು ಹೊರಬರದಂತೆ ತಡೆಯಲು ಬಾಗಿಲಿಗೆ ಕಬ್ಬಿಣದ ಪಟ್ಟಿಯನ್ನು ಅಡ್ಡಲಾಗಿ ಜೋಡಿಸಿ ಮೊಳೆ ಹೊಡೆಯುವ ವಿಡಿಯೋಗಳು ಟ್ವಿಟ್ಟರ್, ಯೂಟ್ಯೂಬ್ ಮತ್ತು ವೀಬೋಗಳಲ್ಲಿ ಹರಿದಾಡುತ್ತಿವೆ.
ಕ್ವಾರೆಂಟೈನ್ನಲ್ಲಿ ಇರಬೇಕಾದ ವ್ಯಕ್ತಿ, ‘ಗಾಳಿ ಸೇವನೆ’ಗಾಗಿ ಅಪಾರ್ಟ್ಮೆಂಟ್ನಿಂದ ಹೊರಗೆ ಹೋಗಿದ್ದಾಗ ಅಧಿಕಾರಿಗಳ ಕೈಗೆ ಸಿಕ್ಕಿಬಿದ್ದಿದ್ದಾನೆ. ನಿಯಮ ಉಲ್ಲಂಘಿಸಿದ್ದಕ್ಕಾಗಿ ಆತನನ್ನು ಮನೆಯೊಳಗೆ ಬಂಧಿ ಮಾಡಿದ ವಿಡಿಯೋ ವೈರಲ್ ಆಗಿದೆ.
ಕೋವಿಡ್ ಸೋಂಕಿತರು ಹಾಗೂ ಅವರ ಸಂಪರ್ಕಿತರ ಮನೆಗಳಿಂದ ಜನರು ಹೊರಗೆ ಬರದಂತೆ ನಿರ್ಬಂಧಿಸಲಾಗಿದೆ. ಅವರ ಮನೆಗಳ ಮೇಲೆ ಹದ್ದಿನ ಕಣ್ಣಿಡಲಾಗಿದೆ. ದಿನಕ್ಕೆ ಮೂರು ಸಲಕ್ಕಿಂತ ಹೆಚ್ಚು ಬಾಗಿಲು ತೆರೆದವರ ಮನೆಗೆ ಅಧಿಕಾರಿಗಳು ಸಂಪೂರ್ಣವಾಗಿ ಬೀಗ ಮುದ್ರೆ ಹಾಕುತ್ತಿದ್ದಾರೆ. ‘ಜನರು ಹೊರಗೆ ಬರುವಂತಿಲ್ಲ. ಅವರು ಸಿಕ್ಕಿಕೊಂಡರೆ ಬಾಗಿಲಿಗೆ ಬೀಗ ಹಾಕಬೇಕಾಗುತ್ತದೆ’ ಎಂದು ಎಚ್ಚರಿಕೆಗಳನ್ನು ನೀಡಲಾಗುತ್ತಿದೆ.