ಜೈಸಲ್ಮೇರ್‌: ಜೈಸಲ್ಮೇರ್‌ನ ಜೇಥ್ವಾಯಿ-ಗಜ್ರೂಪ್ ಸಾಗರ್ ಬೆಟ್ಟಗಳಲ್ಲಿ ಡೈನೋಸಾರ್ ಮೊಟ್ಟೆಯ ಪಳೆಯುಳಿಕೆಯನ್ನು ಗುರುತಿಸಿರುವುದಾಗಿ ವಿಜ್ಞಾನಿಯೊಬ್ಬರು ಹೇಳಿದ್ದಾರೆ.
ಶನಿವಾರ ಪತ್ತೆಯಾದ ಮೊಟ್ಟೆಯ ಪಳೆಯುಳಿಕೆಯು ಸುಮಾರು 180 ಮಿಲಿಯನ್ ವರ್ಷಗಳಷ್ಟು ಹಳೆಯದು ಎಂದು ನಂಬಲಾಗಿದೆ. 167 ಮಿಲಿಯನ್ ವರ್ಷಗಳ ಹಿಂದಿನ ಸಸ್ಯಹಾರಿ, ಉದ್ದನೆ ಕತ್ತಿನ ಡೈನೋಸಾರ್‌ನ ಪಳೆಯುಳಿಕೆಯ ಅವಶೇಷಗಳು 2018 ರಲ್ಲಿ ಕಂಡುಬಂದ ಅದೇ ಪ್ರದೇಶದಲ್ಲಿ ಪತ್ತೆಯಾಗಿದೆ.
ಈ ಮೊಟ್ಟೆಯ ಬಗ್ಗೆ ವಿಜ್ಞಾನಿ ಡಾ ನಾರಾಯಣ್ ದಾಸ್ ಇಂಖಿಯಾ, ವಿವರ ನೀಡಿದ್ದು, ಇದು ಸುಮಾರು 180 ಮಿಲಿಯನ್ ವರ್ಷಗಳಷ್ಟು ಹಳೆಯದಾದ ಡೈನೋಸಾರ್ ಮೊಟ್ಟೆಯ ಪಳೆಯುಳಿಕೆಯಾಗಿರಬಹುದು ಎಂದು ತಿಳಿಸಿದ್ದಾರೆ. ಅಲ್ಲದೆ 100 ಗ್ರಾಂ ತೂಕದ ಮತ್ತು ಅಂದಾಜು 1 ರಿಂದ 1.5 ಇಂಚು ಉದ್ದದ ಮೊಟ್ಟೆಯ ಪಳೆಯುಳಿಕೆಯನ್ನು ಪರೀಕ್ಷೆ ಮತ್ತು ವಿಶ್ಲೇಷಣೆಗಾಗಿ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ. ಈ ಮೊಟ್ಟೆ ಮೆಸೊಜೊಯಿಕ್ ಯುಗಕ್ಕೆ ಸೇರಿರಬಹುದು ಎಂದು ವಿವರಿಸಿದ್ದಾರೆ. ಈ ಅವಧಿಯನ್ನು ಡೈನೋಸಾರ್‌ಗಳ ಯುಗ” ಎಂದು ಕರೆಯಲಾಗುತ್ತದೆ.
