ಕೊಲಂಬೊ: 15 ಮಿಲಿಯನ್ ಡಾಲರ್ ವಿಶೇಷ ಭಾರತೀಯ ಅನುದಾನದಡಿ ಬೌದ್ಧ ಸಂಬಂಧಗಳನ್ನು ಉತ್ತೇಜಿಸುವುದು ಸೇರಿದಂತೆ ಹಲವು ಯೋಜನೆಗಳನ್ನು ತ್ವರಿತಗೊಳಿಸಲು ಭಾರತ ಮತ್ತು ಶ್ರೀಲಂಕಾ ಒಪ್ಪಿಕೊಂಡಿವೆ.
ಹೈ ಕಮಿಷನರ್ ಗೋಪಾಲ್ ಬಾಗ್ಲೆ ಮತ್ತು ಬುದ್ಧಶಾಸನ, ಧಾರ್ಮಿಕ ಮತ್ತು ಸಾಂಸ್ಕೃತಿಕ ವ್ಯವಹಾರಗಳ ಸಚಿವ ವಿದುರಾ ವಿಕ್ರಮನಾಯಕ ಅವರು ಬೌದ್ಧ ಸಂಬಂಧಗಳನ್ನು ಉತ್ತೇಜಿಸುವುದು ಮತ್ತು ಜಾಫ್ನಾ ಕಲ್ಚರಲ್ ಸೆಂಟರ್ (ಜೆಸಿಸಿ) ಕಾರ್ಯನಿರ್ವಹಣೆ ಸೇರಿದಂತೆ ಜಂಟಿಯಾಗಿ ಗುರುತಿಸಲಾದ ಆದ್ಯತೆಯ ಯೋಜನೆಗಳನ್ನು ತ್ವರಿತಗೊಳಿಸಲು ಮಂಗಳವಾರ ಮಾತುಕತೆ ನಡೆಸಿದರು ಎಂದು ಕೊಲಂಬೊದಲ್ಲಿರುವ ಭಾರತೀಯ ಹೈಕಮಿಷನ್ ಹೇಳಿಕೆಯಲ್ಲಿ ತಿಳಿಸಿದೆ.
ಸೆಪ್ಟೆಂಬರ್ 26, 2020 ರಂದು ನಡೆದ ವರ್ಚುವಲ್ ದ್ವಿಪಕ್ಷೀಯ ಶೃಂಗಸಭೆಯಲ್ಲಿ ದ್ವಿಪಕ್ಷೀಯ ಬೌದ್ಧ ಸಂಬಂಧಗಳನ್ನು ಉತ್ತೇಜಿಸಲು ಪ್ರಧಾನಿ ನರೇಂದ್ರ ಮೋದಿ ಅವರು ವಿಶೇಷ ಅನುದಾನವನ್ನು ಘೋಷಿಸಿದ್ದರು ಮತ್ತು ಸಂಬಂಧಿತ ತಿಳುವಳಿಕಾ ಒಡಂಬಡಿಕೆಗೆ ಈ ವರ್ಷದ ಮಾರ್ಚ್ ನಲ್ಲಿ ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್. ಜೈಶಂಕರ್ ಅವರು ಕೊಲಂಬೋಗೆ ಭೇಟಿ ನೀಡಿದಾಗ ಅಂಕಿತ ಹಾಕಲಾಯಿತು.
ಅನುದಾನದಿಂದ ದೇಶಾದ್ಯಂತ ಸನ್ಯಾಸಿಗಳಿಗೆ ತರಬೇತಿ ನೀಡುವ ಪೂಜಾ ಸ್ಥಳಗಳು ಮತ್ತು ಪಿರಿವೇಣಗಳು ಅಥವಾ ಶಾಲೆಗಳಲ್ಲಿ ಸೌರವಿದ್ಯುತ್ ಸೌಲಭ್ಯಗಳನ್ನು ಸ್ಥಾಪಿಸುವ ಬಗ್ಗೆ ಚರ್ಚೆಗಳು ನಡೆದವು.
ಜೆಸಿಸಿ ಕುರಿತ ಸಭೆಯು ಸಾಮಾನ್ಯ ಜನರ ನಿಯಮಿತ ಬಳಕೆಗೆ ಅತ್ಯಾಧುನಿಕ ಸೌಲಭ್ಯವನ್ನು ಲಭ್ಯವಾಗುವಂತೆ ಮಾಡಲು ಅನುವು ಮಾಡಿಕೊಡುವ ಜಂಟಿ ಚೌಕಟ್ಟನ್ನು ಸ್ಥಾಪಿಸುವತ್ತ ಗಮನ ಹರಿಸಿತು. ಭಾರತ-ಶ್ರೀಲಂಕಾ ಅಭಿವೃದ್ಧಿ ಪಾಲುದಾರಿಕೆಯ ಈ ಜ್ವಲಂತ ಉದಾಹರಣೆಯು ಭಾರತ ಸರ್ಕಾರದ 11 ಮಿಲಿಯನ್ ಡಾಲರ್ ಗಿಂತಲೂ ಹೆಚ್ಚಿನ ಅನುದಾನದಡಿಯಲ್ಲಿ ನಿರ್ಮಿಸಲ್ಪಟ್ಟಿದೆ, ಇದು ಎರಡು ಮಹಡಿಗಳ ವಸ್ತುಸಂಗ್ರಹಾಲಯ, 600 ಕ್ಕೂ ಹೆಚ್ಚು ಜನರಿಗೆ ಇತ್ತೀಚಿನ ರಂಗ ಶೈಲಿಯ ಸಭಾಂಗಣ, 11 ಅಂತಸ್ತಿನ ಕಲಿಕಾ ಗೋಪುರ ಮತ್ತು ಆಂಫಿಥಿಯೇಟರ್ ಆಗಿ ಕಾರ್ಯನಿರ್ವಹಿಸಬಹುದಾದ ಸಾರ್ವಜನಿಕ ಚೌಕದಂತಹ ಅನೇಕ ಸೌಲಭ್ಯಗಳನ್ನು ಒಳಗೊಂಡಿದೆ.” ಎಂದು ಹೈಕಮಿಷನ್ ಹೇಳಿಕೆಯಲ್ಲಿ ತಿಳಿಸಲಾಗಿದೆ.
