ಟೋಕಿಯೊ: ಒಲಿಂಪಿಕ್ಸ್‌ಗೆ ಕ್ರೀಡಾ ಕೂಟ ಮುಕ್ತಾಯವಾಗಿದ್ದು ಸೋಮವಾರ 28 ಹೊಸ ಪ್ರಕರಣಗಳು ಪತ್ತೆಯಾಗಿವೆ. ಇದರೊಂದಿಗೆ ಒಲಿಂಪಿಕ್ಸ್‌ನಲ್ಲಿ ಭಾಗಿಯಾದವರಲ್ಲಿ ಕಾಣಿಸಿಕೊಂಡ ಕೋವಿಡ್ ಪ್ರಕರಣಗಳ ಒಟ್ಟು ಸಂಖ್ಯೆ 458 ಆಗಿದೆ ಎಂದು ಆಯೋಜಕರು ತಿಳಿಸಿದ್ದಾರೆ.
ಸೋಂಕು ಕಾಣಿಸಿಕೊಂಡವರಲ್ಲಿ 13 ಮಂದಿ ಗುತ್ತಿಗೆದಾರರು ಆಗಿದ್ದು ಆರು ಮಂದಿ ಇತರ ಸಿಬ್ಬಂದಿ. ಆರು ಮಂದಿ ಸ್ವಯಂಸೇವಕರು, ಇಬ್ಬರು ಉದ್ಯೋಗಿ ಮತ್ತು ಒಬ್ಬರು ಮಾಧ್ಯಮ ಕಾರ್ಯಕರ್ತ. ಈ ಪೈಕಿ 21 ಮಂದಿ ಜಪಾನ್‌ ನಿವಾಸಿಗಳು ಎಂದು ಆಯೋಜಕರು ವಿವರಿಸಿದ್ದಾರೆ.ಜನತೆಗೆ ಧನ್ಯವಾದ ಹೇಳಿದ ಪ್ರಧಾನಿ: ಕೋವಿಡ್ ಆತಂಕದ ನಡುವೆಯೂ ಒಲಿಂಪಿಕ್ ಕೂಟವನ್ನು ಸುಸೂತ್ರವಾಗಿ ಆಯೋಜಿಸಲು ನೆರವಾದ ಜನರಿಗೆ ಪ್ರಧಾನಿ ಯೊಶಿಹಿಡೆ ಸುಗಾ ಧನ್ಯವಾದ ಅರ್ಪಿಸಿದ್ದಾರೆ. ದಾಖಲೆಯ 58 ಪದಕಗಳನ್ನು ಗೆದ್ದ ಜಪಾನ್‌ನ ಕ್ರೀಡಾಪಟುಗಳಿಗೆ ಅಭಿನಂದನೆ ಸಲ್ಲಿಸಿದ ಅವರು ‘ಕೆಲವರು ಪದಕ ಗೆದ್ದಿದ್ದಾರೆ. ಕೆಲವರು ವಿಫಲರಾಗಿದ್ದಾರೆ. ಆದರೆ ಎಲ್ಲರೂ ಅಮೋಘ ಸಾಮರ್ಥ್ಯ ತೋರಿ ಮನ ಗೆದ್ದಿದ್ದಾರೆ’ ಎಂದರು. ಕೋವಿಡ್ ಭಿತಿಯ ನಡುವೆಯೂ ಕ್ರೀಡಾ ಕೂಟ ಯಶಸ್ವಿ ಆಗಿದೆ ಎಂದು ಅವರು ಹೇಳಿದರು.
