ಪಾಂಡವಪುರ: ತಾಲೂಕಿನ ಬೇಬಿ ಬೆಟ್ಟದ ಐತಿಹಾಸಿಕ ದನಗಳ ಜಾತ್ರೆಯ 7ನೇ ದಿನವಾದ ಸೋಮವಾರ ಬೆಟ್ಟದ ದೇವತೆಗಳಾದ ಮಾದೇಶ್ವರ ಮತ್ತು ಸಿದ್ದೇಶ್ವರರ ರಥೋತ್ಸವ ಕಾರ್ಯಕ್ರಮ ನಡೆಯಿತು.
ಚಂದ್ರವನ ಆಶ್ರಮದ ಪೀಠಾಧ್ಯಕ್ಷ ಶ್ರೀ ತ್ರಿನೇತ್ರ ಮಹಂತ ಶಿವಯೋಗಿ ಸ್ವಾಮೀಜಿ ಹಾಗೂ ರಾಮಯೋಗೀಶ್ವರ ಮಠದ ಶ್ರೀ ಶಿವಬಸವ ಸ್ವಾಮೀಜಿಗಳು ರಥದ ಹಗ್ಗ ಎಳೆಯುವ ಮೂಲಕ ರಥೋತ್ಸವಕ್ಕೆ ಚಾಲನೆ ನೀಡಿದರು.
ಇದಕ್ಕೂ ಮೊದಲು ರಥೋತ್ಸವದ ಉತ್ಸವ ಮೂರ್ತಿಗಳಿಗೆ ಇಬ್ಬರು ಸ್ವಾಮೀಜಿಗಳು ಸಾಂಪ್ರದಾಯಿಕ ಪೂಜೆ ಸಲ್ಲಿಸಿದರು. ನಂತರ ಮಾದೇಶ್ವರ ದೇವಸ್ಥಾನ ಮುಂಭಾಗದಿಂದ ಹೊರಟ ರಥವನ್ನು ಭಕ್ತಾಧಿಗಳು ದೇವರ ಸ್ಮರಣೆ ಮಾಡಿ ಜೈಕಾರ ಹಾಕುತ್ತಾ ದೇವಸ್ಥಾನವನ್ನು ಮೂರು ಬಾರಿ ಪ್ರದಕ್ಷಿಣೆ ಹಾಕಿಸಿದರು. ನಂತರ ರಥವು ಸ್ವಸ್ಥಾನಕ್ಕೆ ಮರಳಿತು.
ಈ ವೇಳೆ ಹಾಲು ಮಲೆ, ಜೇನು ಮಲೆ, ಎಪ್ಪತೇಳು ಮಲೆಯಲ್ಲಿ ತಪ್ಪದೇ ನಲಿದು ನರ್ತನ ಮಾಡುವ ಮಾದೇಶ್ವರನಿಗೆ ಉಘೇ ಉಘೇ ಎಂಬ ಭಕ್ತಿಪೂರ್ವಕ ಘೋಷಣೆಗಳು ಭಕ್ತ ಸಮೂಹದಿಂದ ಕೇಳಿ ಬಂದಿತು.
ರಥೋತ್ಸವದ ವೇಳೆ ಸಾವಿರಾರು ಸಂಖ್ಯೆಯಲ್ಲಿ ನೆರೆದಿದ್ದ ಭಕ್ತ ಸಮೂಹ ರಥದ ಮೇಲೆ ಹಣ್ಣು-ಜವನ ಎಸೆದು ಮಹದೇಶ್ವರ, ಸಿದ್ದೇಶ್ವರ ಸ್ವಾಮಿಗೆ ಭಕ್ತಿ ಸಮರ್ಪಿಸಿದರು.
ಈ ವೇಳೆ ತ್ರಿನೇತ್ರ ಮಹಂತ ಶಿವಯೋಗಿ ಸ್ವಾಮೀಜಿ ಮತ್ತು ಶಿವಬಸವ ಸ್ವಾಮೀಜಿಗಳು ಸಿದ್ದೇಶ್ವರ ಮತ್ತು ಮಾದೇಶ್ವರರು ಎಲ್ಲ ಭಕ್ತಾಧಿಗಳಿಗೆ ಭಗವಂತ ಸೌಖ್ಯವನ್ನುಂಟು ಮಾಡಲಿ ಎಂದು ಆಶೀರ್ವದಿಸಿದರು.
