ಮಂಗಳೂರು : ಮಂಗಳೂರು ಮಹಾನಗರ ಪಾಲಿಕೆಯಲ್ಲಿ ವಾರ್ಡ್ ಕಮಿಟಿಯನ್ನು ರಚಿಸುವ ಸಲುವಾಗಿ ಈಗಾಗಲೇ ವಾರ್ಡ್ ಕಮಿಟಿಯ ತಾತ್ಕಾಲಿಕ ಆಯ್ಕೆ ಪಟ್ಟಿಗೆ ಸಾರ್ವಜನಿಕರ ಆಕ್ಷೇಪಣೆ / ಅಭಿಪ್ರಾಯ ಸಲ್ಲಿಸುವಂತೆ ಕೋರಿ ದಿನಾಂಕ: 17-08-2021 ರ ವರೆಗೆ ಕಾಲವಕಾಶ ನೀಡಿ ಪಾಲಿಕೆಯ ವೆಬ್ಸೈಟ್ ಹಾಗೂ ನೋಟೀಸ್ ಬೋರ್ಡ್ ಮೂಲಕ ಪ್ರಚುರಪಡಿಸಿದೆ.
ಈ ನಿಟ್ಟಿನಲ್ಲಿ ಸಾರ್ವಜನಿಕರಿಂದ ಯಾವ ರೀತಿ ಆಕ್ಷೇಪಣೆ ದಾಖಲಿಸಬೇಕು ಎಂಬ ಬಗ್ಗೆ ಮೌಖಿಕವಾಗಿ ಕೋರುತ್ತಿರುವುದರಿಂದ ಆಕ್ಷೇಪಣೆ ಸಲ್ಲಿಸುವ ಅರ್ಜಿ ನಮೂನೆಯನ್ನು ಪಾಲಿಕೆಯ ವೆಬ್ಸೈಟ್, ನೋಟೀಸ್ ಬೋರ್ಡ್ ಮೂಲಕ ಪ್ರಚುರಪಡಿಸಲಾಗಿದೆ. ಆಕ್ಷೇಪಣೆ ಸಲ್ಲಿಸಲು ಬಯಸುವವರು ಸದ್ರಿ ಅರ್ಜಿ ನಮೂನೆಯಲ್ಲಿ ಸಲ್ಲಿಸುವಂತೆ ಕೋರಿದೆ.
ಸದರಿ ಈ ನಮೂನೆಯಲ್ಲಿ ಸಲ್ಲಿಕೆಯಾಗುವ ಆಕ್ಷೇಪಣೆಗಳನ್ನು ಪರಿಗಣಿಸಿ ಈಗಾಗಲೇ ನೇಮಕಗೊಂಡ ವಾರ್ಡ್ ಕಮಿಟಿ ನೋಡಲ್ ಅಧಿಕಾರಿಗಳ ಮೂಲಕ ಪರಿಶೀಲನೆಗೆ ಒಳಪಡಿಸಿ ಸಲ್ಲಿಸುವ ವರದಿಯನ್ನು ವಾರ್ಡ್ ಕಮಿಟಿ ಆಯ್ಕೆ ಪ್ರಕ್ರಿಯೆ ಸಮಿತಿಯು ಕೂಲಂಕುಷವಾಗಿ ಪರಿಶೀಲಿಸಿ ಸಲ್ಲಿಸುವ ಶಿಫಾರಸನ್ನು ಆಯುಕ್ತರ ಅನುಮೋದನೆಯೊಂದಿಗೆ ಅಂತಿಮಗೊಳಿಸಲಾಗುವುದು.