ಪಡುಬಿದ್ರೆ: ಉಡುಪಿ ಜಿಲ್ಲೆಯ ಪಡುಬಿದ್ರೆ ಸಮೀಪದ ಹೆಜಮಾಡಿ ಕೋಡಿ ಅಮಸಕೇರೆ ಎಂಬಲ್ಲಿ ಸಮುದ್ರ ತೀರದಲ್ಲಿ ಮೀನುಗಾರಿಕೆಯ ವೇಳೆ ರಾಶಿ ರಾಶಿ ಸಿಲ್ವರ್ ಫಿಶ್ (ಬೊಲೆಂಜಿರ್) ಸಿಕ್ಕಿರುವ ಅಪರೂಪದ ವಿದ್ಯಮಾನವೊಂದು ನಡೆಯಿತು. ಬುಧವಾರ ಬೆಳಗ್ಗಿನಿಂದ ಮೀನುಗಳು ದಡ ಸೇರುತ್ತಿದೆ. ಇಂದು ಕೂಡ ಮೀನುಗಳು ಲಭಿಸುತ್ತಿದ್ದು, ಊರಿನವರು ಸಿಕ್ಕಿದ ಅವಕಾಶ ಎಂದು ಮೀನುಗಳನ್ನು ಕೊಂಡೊಯ್ಯುತ್ತಿದ್ದಾರೆ.
ಇಂದು ಬೆಳಗ್ಗೆ ಹೆಜಮಾಡಿ ಕೋಡಿ ಪರಿಸರದ ನಿವಾಸಿಗಳು ಮೀನುಗಾರಿಕೆ ನಡೆಸುತಿದ್ದಾಗ ಈ ಪ್ರದೇಶದಲ್ಲಿ ಎಲ್ಲೆಡೆ ಬೆಳ್ಮೀನು ಕಂಡುಬಂದಿದೆ. ಮೀನುಗಾರಿಕೆಗೆ ಬಲೆ ಬೀಸಲು ಆರಂಭಿಸುತಿದ್ದಂತೆಯೇ ರಾಶಿರಾಶಿ ಮೀನುಗಳು ದಡಸೇರಿವೆ.
ಆಳಸಮುದ್ರದ ಮೀನುಗಾರಿಕೆಗೆ ತೆರಳಿರುವ ಬೋಟ್ ಗಳ ಸದ್ದಿನಿಂದಾಗಿ ಈ ಮೀನುಗಳು ಹೆದರಿ ದಡಕ್ಕೆ ಬರುತ್ತಿದೆ ಎಂದು ತಜ್ಞರು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.
