ಹುಬ್ಬಳ್ಳಿ: ನಗರದಲ್ಲಿ ಇಂದು ಸಾರ್ವಜನಿಕರು ಬಣ್ಣದಾಟದಲ್ಲಿ ಮುಳುಗಿ ಹೋಗಿದ್ದರು. ಯಾವುದೇ ಜಾತಿ ಭೇದವಿಲ್ಲದೇ ಎಲ್ಲರೂ ಪರಸ್ಪರ ಬಣ್ಣ ಹಚ್ಚುತ್ತಾ ಹೋಳಿ ಆಚರಿಸಿದರು.
ವಾಣಿಜ್ಯ ಜನತೆಗೆ ಹೋಳಿ ಹಬ್ಬ ಬಂತೆಂದರೆ ಇನ್ನಿಲ್ಲದ ಸಂತೋಷ. ನಗರದ ತುಂಬಾ ಡ್ಯಾನ್ಸ್ ಮಾಡುವ ಮೂಲಕ ರಂಗಿನಾಟವನ್ನು ಆಡುತ್ತಾರೆ. ಬಣ್ಣ ಎರಚುವ ಮೂಲಕ ಹೋಳಿ ಹಬ್ಬವನ್ನು ಆಚರಿಸುತ್ತಾರೆ. ಹುಬ್ಬಳ್ಳಿ ಹೋಳಿ ಆಚರಣೆಯಲ್ಲಿ ಯಾವುದೇ ಭೇದ ಭಾವವಿಲ್ಲ. ವಾಣಿಜ್ಯ ನಗರದಲ್ಲಿ ರಂಗ ಪಂಚಮಿ ನಿಮಿತ್ತ ಜನರು ರಂಗು ರಂಗಿನ ಬಣ್ಣದಲ್ಲಿ ಮಿಂದೆದ್ದರು. ಸುಮಾರು 3000 ಕ್ಕೂ ಅಧಿಕ ಪೊಲೀಸರು ನಗರದ ವಿವಿಧೆಡೆ ಬೀಡು ಬಿಟ್ಟು ಶಾಂತಿಯುತ ಬಣ್ಣದಾಟ ಆಡುವಂತೆ ನೋಡಿಕೊಂಡರು.
ಯಾವುದೇ ಜಾತಿ ಮತ ಬೇಧ ಎಂಬ ಹಂಗನ್ನು ತೊರೆದು ಬಣ್ಣದೋಕುಳಿಯಲ್ಲಿ ಜನ ಮಿಂದು ಹೋಗುತ್ತಾರೆ. ಸಾರ್ವಜನಿಕರಿಗೆ ಪೊಲೀಸರು ಕೂಡಾ ಸಾಥ್ ನೀಡಿದ್ದಾರೆ. ಸಾರ್ವಜನಿಕರು ಪೊಲೀಸರೆಂದರೆ ಭಯ ಪಡುತ್ತಿದ್ದರು. ಆದ್ರೆ ಇಂದು ಆ ಭಯವನ್ನು ಮರೆತು ಪೊಲೀಸರೊಂದಿಗೆ ಬಣ್ಣ ಹಚ್ಚಿ ಸಂಭ್ರಮಿಸಿದರು. ಇತ್ತ ಖಾಸಗಿ ಹೊಟೇಲ್ ನಲ್ಲಿ ಆಯೋಜಿಸಿದ್ದ ರಂಗಪಂಚಮಿಯಲ್ಲಿ ಡಿಜೆ ಶಬ್ದಕ್ಕೆ ಯುವಕ ಯುವತಿಯರು ಹುಚ್ಚೆದ್ದು ಸ್ಟೆಪ್ ಹಾಕಿದ್ರು.