ಹೊಸದಿಲ್ಲಿ: ಗುರುಗ್ರಾಮ್ ಮೂಲದ ಸ್ಟಾರ್ಟ್ಅಪ್ ಪ್ರೆಡಾಮಿಕ್ಸ್ ಕೃತಕ ಬುದ್ದಿಮತ್ತೆ ಆಧಾರಿತ ರಕ್ತ ಪರೀಕ್ಷೆ ವಿಧಾನವನ್ನು ಕಂಡುಹಿಡಿದಿದ್ದು, ಇದು ಪುರುಷರು ಮತ್ತು ಮಹಿಳೆಯರಲ್ಲಿ ಸುಮಾರು 32 ಬಗೆಯ ಕ್ಯಾನ್ಸರ್ಗಳನ್ನು ಶೇಕಡಾ 98 ರಷ್ಟು ನಿಖರತೆಯೊಂದಿಗೆ ಪತ್ತೆ ಮಾಡುತ್ತದೆ.
ಕಂಪನಿಯ OncoVeryx-F ಒಂದು ಪೇಟೆಂಟ್ ತಂತ್ರಜ್ಞಾನವಾಗಿದ್ದು, ಒಂದೇ ಪರೀಕ್ಷೆಯಲ್ಲಿ ಬಹು ಕ್ಯಾನ್ಸರ್ಗಳ ಮೆಟಾಬೊಲೈಟ್ ಗುರುತಿಸಲು ಕೃತಕಬುದ್ದಿ ಮತ್ತೆ (ಎಐ) ವಿಧಾನವನ್ನು ಬಳಸುತ್ತದೆ.
2022 ರಲ್ಲಿ ಮೊದಲು ಪರೀಕ್ಷೆ ಪ್ರಾರಂಭಿಸಲಾಗಿತ್ತು. ಸ್ತನ, ಎಂಡೊಮೆಟ್ರಿಯಮ್, ಗರ್ಭಕಂಠ ಮತ್ತು ಅಂಡಾಶಯ ಕ್ಯಾನ್ಸರ್ ಪತ್ತೆಗೆ ಈ ವಿಧಾನ ಬಹುವಾಗಿ ನೆರವಾಗಿದೆ ಎಂದು ಕಂಪನಿ ಹೇಳಿದೆ. ಮೇದೋಜ್ಜೀರಕ ಗ್ರಂಥಿಯ ಕ್ಯಾನ್ಸರ್, ಮೂತ್ರಪಿಂಡ, ಯಕೃತ್ತಿನ ಕ್ಯಾನ್ಸರ್, ಮೆದುಳಿನ ಕ್ಯಾನ್ಸರ್ ಪತ್ತೆಗೂ ಕೃತಕ ಬುದ್ದಿಮತ್ತೆ ಆಧಾರಿತ ರಕ್ಷಪರೀಕ್ಷೆ ವಿಧಾನವನ್ನು ಬಳಸಲಾಗಿದೆ.
ಆರಂಭಿಕ ಹಂತದಲ್ಲಿ ಕ್ಯಾನ್ಸರ್ ಪತ್ತೆಯಾದಲ್ಲಿ ರೋಗಿಯು ಬದುಕುಳಿಯವ ಸಾಧ್ಯತೆ ಹೆಚ್ಚಿರುತ್ತದೆ. ಈ ಕಾರಣದಿಂದ ಕಂಪನಿಯ ಅನ್ವೇಷಣೆ ಕ್ಯಾನ್ಸರ್ ಚಿಕಿತ್ಸೆ, ಪತ್ತೆಯಲ್ಲಿ ಕ್ರಾಂತಿಕಾರಿ ಹೆಜ್ಜೆ ಎನ್ನಲಾಗಿದೆ.