ಪಾಟ್ನಾ: ಬಿಹಾರದ ಮುಜಾಫರ್‌ಪುರ ಜಿಲ್ಲೆಯಲ್ಲಿ ಆರು ಮಂದಿ 13 ವರ್ಷದ ಬಾಲಕಿಯನ್ನು ಅಪಹರಿಸಿ 28 ದಿನಗಳ ಕಾಲ ಸಾಮೂಹಿಕ ಅತ್ಯಾಚಾರ ಎಸಗಿದ ಆಘಾತಕಾರಿ ಘಟನೆ ನಡೆದಿದೆ.
ಆರೋಪಿಗಳು ಆಗಸ್ಟ್ 5 ರಂದು ಸಂಜೆ ಸಂತ್ರಸ್ತೆಯ ತಾಯಿಗೆ ಕರೆ ಮಾಡಿ ಸರಯಾ ಚೌಕ್‌ನಿಂದ ಕರೆದುಕೊಂಡು ಹೋಗುವಂತೆ ಹೇಳಿದ್ದಾರೆ. ಸರಯಾ ಪೊಲೀಸ್ ಠಾಣೆ ವ್ಯಾಪ್ತಿಯ ಸಿಸ್ವಾನಿಯಾ ಗ್ರಾಮದ ಆರೋಪಿಗಳು ಜುಲೈ 9 ರಂದು ಕಾರಿನಲ್ಲಿ ಬಂದು ಮಗಳನ್ನು ಅಪಹರಿಸಿದ್ದಾರೆ ಎಂದು ಸಂತ್ರಸ್ತೆಯ ತಾಯಿ ಲಿಖಿತ ದೂರಿನಲ್ಲಿ ತಿಳಿಸಿದ್ದಾರೆ.
ಜುಲೈ 9 ರಂದು, ನಾನು ಆರೋಪಿಯ ವಿರುದ್ಧ ಲಿಖಿತ ದೂರು ನೀಡಿದ್ದೇನೆ. ಆದರೆ ಜಿಲ್ಲಾ ಪೊಲೀಸರು ಯಾವುದೇ ಕ್ರಮ ಕೈಗೊಂಡಿಲ್ಲ. ಆಗಸ್ಟ್ 5 ರಂದು, ರಾತ್ರಿ 8 ಗಂಟೆಗೆ ಆರೋಪಿಯಿಂದ ನನಗೆ ಕರೆ ಬಂದಿದ್ದು, ನನ್ನ ಪುತ್ರಿಯನ್ನು ಸರಯಾ ಚೌಕ್‌ನಲ್ಲಿ ಬಿಟ್ಟಿದ್ದು, ಅಲ್ಲಿಂದ ಕರೆದುಕೊಂಡು ಹೋಗುವಂತೆ ತಿಳಿಸಿದ್ದರು. ನಾನು ಅಲ್ಲಿಗೆ ತೆರಳಿ ಪುತ್ರಿಯನ್ನು ಕರೆತಂದಿದ್ದೇನೆ ಎಂದು ತಿಳಿಸಿದ್ದಾರೆ.
ಸಂತ್ರಸ್ತ ಬಾಲಕಿಗೆ ಆರೋಪಿಗಳೊಂದಿಗೆ ಫೇಸ್‌ ಬುಕ್‌ ಮೂಲಕ ಪರಿಚಯವಾಗತ್ತು ಎನ್ನಲಾಗಿದೆ. ಜುಲೈ 9 ರಂದು ಆಕೆಯನ್ನು ಅಪಹರಿಸಿ ಆಕೆಯನ್ನು ಅಜ್ಞಾತ ಸ್ಥಳಕ್ಕೆ ಕರೆದುಕೊಂಡು ಹೋಗಿ 28 ದಿನಗಳವರೆಗೆ ಅತ್ಯಾಚಾರ ನಡೆಸಲಾಗಿತ್ತು. ಆರೋಪಿಗಳನ್ನು ಬಂಧಿಸಲು ಜಿಲ್ಲಾ ಪೊಲೀಸರು ವಿವಿಧ ಸ್ಥಳಗಳಲ್ಲಿ ದಾಳಿ ನಡೆಸಿದ್ದಾರೆ.
