ಸಬ್ಬಸಿಗೆ ಕೂಟು: ಬಾಯಿಗೂ ರುಚಿ, ಆರೋಗ್ಯಕ್ಕೂ ಹಿತ

ಬೇಸಿಗೆಯಲ್ಲಿ ಸೊಪ್ಪಿನ ಬಳಕೆಯನ್ನು ಹೆಚ್ಚೆಚ್ಚು ಮಾಡುವುದು ಆರೋಗ್ಯದ ದೃಷ್ಟಿಯಿಂದ ಒಳಿತು. ಹೀಗಾಗಿ ಸಬ್ಬಸಿಗೆ ಸೊಪ್ಪು ಬಳಸಿ ತಮಗೆ ಬೇಕಾದ ಪದಾರ್ಥಗಳನ್ನು ತಯಾರಿ ಮಾಡಿಕೊಳ್ಳುವುದು ಒಳ್ಳೆಯದು. ಅದರಂತೆ ಅನ್ನದ ಜತೆಗೆ ಸಾಂಬಾರ್ ಆಗು ಸಬ್ಬಸಿಗೆ ಕೂಟು ಮಾಡಿದರೆ ರುಚಿಯಾಗಿರುತ್ತದೆ.

ಬೇಕಾಗುವ ಪದಾರ್ಥಗಳು: ಸಬ್ಬಸಿಗೆ ಸೊಪ್ಪು-ಎರಡು ಕಟ್ಟು, ತೊಗರಿಬೇಳೆ- ಅರ್ಧಪಾವು, ಎಣ್ಣೆ- ಸ್ವಲ್ಪ, ಉಪ್ಪು- ರುಚಿಗೆ ತಕ್ಕಷ್ಟು, ಉದ್ದಿನ ಬೇಳೆ- ಸ್ವಲ್ಪ, ಬ್ಯಾಡಗಿ ಒಣಮೆಣಸಿನ ಕಾಯಿ- ನಾಲ್ಕು, ಇಂಗು- ಸ್ವಲ್ಪ. ಕಾಳು ಮೆಣಸು-ಸ್ವಲ್ಪ, ಜೀರಿಗೆ- ಒಂದು ಚಮಚ, ಗಸಗಸ- ಎರಡು ಚಮಚ, ಕಾಯಿತುರಿ- ಅರ್ಧ ಬಟ್ಟಲು

ತಯಾರು ಮಾಡುವುದು ಹೇಗೆ?: ಮೊದಲಿಗೆ ತೊಗರಿ ಬೇಳೆಯನ್ನು ಪಾತ್ರೆಯಲ್ಲಿ ಹಾಕಿ ಸುಮಾರು ಅರ್ಧದಷ್ಟು ಬೇಯಿಸಬೇಕು. ಇನ್ನೊಂದೆಡೆ ಒಂದು ಪಾತ್ರೆಯಲ್ಲಿ ಎಣ್ಣೆ ಹಾಕಿ ಅದರಲ್ಲಿ ಉದ್ದಿನ ಬೇಳೆ, ಒಣಮೆಣಸು, ಇಂಗು, ಕರಿಮೆಣಸು ಹಾಕಿ ಹುರಿಯಬೇಕು. ಬಳಿಕ ಇಳಿಸಿ ಅದಕ್ಕೆ ಜೀರಿಗೆ, ಗಸಗಸ, ಕಾಯಿತುರಿಯನ್ನು ಹಾಕಿ ಎಲ್ಲವನ್ನು ಸೇರಿಸಿ ಮಿಕ್ಸಿಯಲ್ಲಿ ರುಬ್ಬಬೇಕು.

ಇಷ್ಟು ತಯಾರಿ ಮಾಡಿಕೊಂಡ ಬಳಿಕ ಅರೆ ಬೆಂದ ಬೇಳೆಯ ಪಾತ್ರೆಗೆ ಚಿಕ್ಕದಾಗಿ ಹಚ್ಚಿದ ಸಬ್ಬಸಿಗೆ ಸೊಪ್ಪನ್ನು ಹಾಕಿ ಬೇಯಿಸಿಬೇಕು. ಸೊಪ್ಪು ಮತ್ತು ಬೇಳೆ ಚೆನ್ನಾಗಿ ಬೆಂದ ಬಳಿಕ ಅದಕ್ಕೆ ರುಬ್ಬಿಟ್ಟು ಕೊಂಡಿದ್ದ ಮಸಾಲೆಯನ್ನು ಹಾಕಿ ಚೆನ್ನಾಗಿ ಕುದಿಸಿ ರುಚಿ ನೋಡಿಕೊಂಡು ಉಪ್ಪು ಹಾಕಬೇಕು. ಹುಳಿಯ ಅಗತ್ಯವಿದ್ದರೆ ನಿಂಬೆ ರಸವನ್ನು ಹಾಕಬಹುದು. ಹೀಗೆ ಮಾಡಿದರೆ ಸಬ್ಬಸಿಗೆ ಕೂಟು ತಯಾರಾದಂತೆಯೇ.