ಬೀಜಿಂಗ್: ಪರೀಕ್ಷೆ ಉದ್ದೇಶದ ಹೊಸ ಉಪಗ್ರಹವೊಂದನ್ನು ಚೀನಾ ಯಶಸ್ವಿಯಾಗಿ ಗುರುವಾರ ಉಡಾವಣೆ ಮಾಡಿತು ಎಂದು ಸರ್ಕಾರಿ ಒಡೆತನದ ಮಾಧ್ಯಮವೊಂದು ವರದಿ ಮಾಡಿದೆ.
‘ಶಿಯಾನ್-11’ ಎಂಬ ಉಪಗ್ರಹವನ್ನು ಹೊತ್ತ ‘ಕುವಾಯಿಜೌ-1ಎ’ ರಾಕೆಟ್ ನಭಕ್ಕೆ ಚಿಮ್ಮಿ, ಪೂರ್ವನಿರ್ಧರಿತ ಭೂಕಕ್ಷೆಯಲ್ಲಿ ಅದನ್ನು ಸೇರಿಸಿತು.
ಮಂಗೋಲಿಯಾದ ಗೋಬಿ ಮರುಭೂಮಿಯಲ್ಲಿರುವ ಜಿಯುಕ್ವಾನ್ ಉಪಗ್ರಹ ಉಡಾವಣೆ ಕೇಂದ್ರದಲ್ಲಿ ಈ ಕಾರ್ಯ ನೆರವೇರಿತು ಎಂದು ಚೀನಾ ಗ್ಲೋಬಲ್ ಟೆಲಿವಿಷನ್ ನೆಟ್ವರ್ಕ್ (ಸಿಜಿಟಿಎನ್) ವರದಿ ಮಾಡಿದೆ.
‘ಪರೀಕ್ಷೆ ಉದ್ದೇಶಕ್ಕಾಗಿ ಈ ಉಪಗ್ರಹವನ್ನು ಅಭಿವೃದ್ಧಿಪಡಿಸಲಾಗಿದೆ ಎಂದಷ್ಟೆ ಮಾಹಿತಿ ಇದ್ದು, ಹೆಚ್ಚಿನ ವಿವರಗಳನ್ನು ಬಹಿರಂಗಪಡಿಸಿಲ್ಲ’ ಎಂದು ಸಿಜಿಟಿಎನ್ ಹೇಳಿದೆ.
ಇದೇ ಸರಣಿಯ ಶಿಯಾನ್-10 ಉಪಗ್ರಹವನ್ನು ಕೆಲ ದಿನಗಳ ಹಿಂದೆ ಉಡಾವಣೆ ಮಾಡಲಾಗಿತ್ತು. ಯಶಸ್ವಿಯಾಗಿ ನಿರ್ದಿಷ್ಟ ಕಕ್ಷೆಗೆ ಸೇರಿಸಲಾಗಿದ್ದರೂ, ತನ್ನ ನಿಗದಿತ ಕಾರ್ಯ ಮಾಡುವಲ್ಲಿ ವಿಫಲವಾಗಿತ್ತು.