ಕೋಲ್ಕತ್ತಾ: ತೃಣಮೂಲ ಕಾಂಗ್ರೆಸ್‌ನ ಅಧಿಕೃತ ಟ್ವಿಟರ್ ಖಾತೆ ಹ್ಯಾಕ್ ಆಗಿದ್ದು, ಹ್ಯಾಂಡಲ್‌ನ ಚಿತ್ರ ಮತ್ತು ಲೋಗೋ ಬದಲಾಗಿದೆ. ಪಕ್ಷದ ರಾಷ್ಟ್ರೀಯ ವಕ್ತಾರ ಮತ್ತು ರಾಜ್ಯಸಭಾ ಸದಸ್ಯ ಡೆರೆಕ್ ಒಬ್ರಿಯಾನ್‌ ಅವರು ಈ ಬೆಳವಣಿಗೆಯನ್ನು ದೃಢಪಡಿಸಿದ್ದಾರೆ. ಹ್ಯಾಂಡಲ್ ಅನ್ನು ಅದರ ಮೂಲ ಸ್ವರೂಪಕ್ಕೆ ತರಲು ಟ್ವಿಟರ್ ಅಧಿಕಾರಿಗಳೊಂದಿಗೆ ಸಂವಹನ ನಡೆಸಲಾಗುತ್ತಿದೆ ಎಂದು ಹೇಳಿದ್ದಾರೆ.
ಹ್ಯಾಕ್ ಮಾಡಿದ ಹ್ಯಾಂಡಲ್‌ನಲ್ಲಿ ಹೆಸರನ್ನು “ಯುಗಾ ಲ್ಯಾಬ್ಸ್” ಎಂದು ಬದಲಾಯಿಸಲಾಗಿದೆ ಮತ್ತು ಮೂಲ ಪಕ್ಷದ ಲೋಗೋವನ್ನು “Y” ಮತ್ತು “L” ಅಕ್ಷರಗಳನ್ನು ಸಂಯೋಜಿಸುವ ಸಾಂಕೇತಿಕ ಚಿತ್ರದಿಂದ ಬದಲಾಯಿಸಲಾಗಿದೆ.
ಆದಾಗ್ಯೂ, “ಬ್ಲೂ ಟಿಕ್” ಇನ್ನೂ ಇದೆ. ಮಂಗಳವಾರ ಮುಂಜಾನೆ ಈ ವಿಷಯ ಮುಖಂಡರ ಗಮನಕ್ಕೆ ಬಂದಿದ್ದು, ಸೋಮವಾರ ತಡರಾತ್ರಿ ಹ್ಯಾಕಿಂಗ್ ಘಟನೆ ನಡೆದಿರುವ ಶಂಕೆ ವ್ಯಕ್ತವಾಗಿದೆ ಎಂದು ಪಕ್ಷದ ಮೂಲಗಳು ತಿಳಿಸಿವೆ. ಈ ಬಗ್ಗೆ “ಟ್ವಿಟ್ಟರ್ ಅಧಿಕಾರಿಗಳು ಸಂಪರ್ಕಿಸಲಾಗಿದ್ದು, ಪಕ್ಷದ ಅಧಿಕೃತ ಟ್ವಿಟರ್ ಹ್ಯಾಂಡಲ್‌ಗೆ ಮೂಲ ನೋಟವನ್ನು ಶೀಘ್ರವಾಗಿ ಹಿಂದಿರುಗಿಸಲಾಗುವುದು ಎಂದು ಟ್ವಿಟರ್ ಸಂಸ್ಥೆ ಭರವಸೆ ನೀಡಿದೆ ಎಂದು ಪಕ್ಷದ ನಾಯಕರೊಬ್ಬರು ತಿಳಿಸಿದ್ದಾರೆ.
