ಜೈಪುರ: ಅಜ್ಮೀರ್ನಲ್ಲಿ ಸ್ವಿಂಗ್ ರೈಡ್ ದುರಂತದಲ್ಲಿ 15ಮಂದಿಗೆ ಗಾಯಗಳಾಗಿದ್ದು, ಘಟನೆಯ ಕುರಿತು ರಾಜಸ್ಥಾನದ ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ. ಮಂಗಳವಾರ ಸಂಜೆ ಈ ಘಟನೆ ನಡೆದಿದೆ.
ಸ್ವಿಂಗ್ ರೈಡ್ ಏರಿಳಿಕೆ ಸವಾರಿ ಮಾಡುತ್ತಿದ್ದಾಗ ಅದು ಕೆಳಮುಖವಾಗಿ ಪ್ರಯಾಣಿಸುವಾಗ ಕುಸಿದಿದೆ. ತಿರುಗುವ ತೊಟ್ಟಿಲು ನೆಲಕ್ಕೆ ಬಿದ್ದ ನಂತರ ಎಲ್ಲೆಡೆ ಅವ್ಯವಸ್ಥೆ ಉಂಟಾಗಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ.
ಸಂಜೆ 6.15ರ ಸುಮಾರಿಗೆ 25 ಮಂದಿ ಏರಿಳಿಕೆಯಲ್ಲಿ ಕುಳಿತಿದ್ದರು. ಇದ್ದಕ್ಕಿದ್ದಂತೆ ಕೇಬಲ್ ತುಂಡಾಗಿ ಎತ್ತರದಿಂದ ಕೆಳಗೆ ಬಿದ್ದಿದೆ. ಏಳು ಮಕ್ಕಳು ಸೇರಿದಂತೆ 15 ಜನರು ಗಂಭೀರವಾಗಿ ಗಾಯಗೊಂಡಿದ್ದು, ಅವರನ್ನು ಜೆಎಲ್ಎನ್ ಆಸ್ಪತ್ರೆಗೆ ರವಾನಿಸಲಾಗಿದೆ. ಸಿವಿಲ್ ಲೈನ್ ಪೊಲೀಸ್ ಠಾಣೆ ಪೊಲೀಸರು ಸ್ಥಳಕ್ಕೆ ಧಾವಿಸಿದ್ದಾರೆ. ಅಪಘಾತದ ನಂತರ ದಿಢೀರ್ ಕೋಲಾಹಲ ಉಂಟಾಯಿತು. ಅಂಗಡಿ-ಮುಂಗಟ್ಟುಗಳು ಮುಚ್ಚಿದ್ದವು. ರೈಡ್ ಆಪರೇಟರ್ ಮತ್ತು ಆಯೋಜಕರು ಸ್ಥಳದಿಂದ ಪರಾರಿಯಾಗಿದ್ದಾರೆ.
ಜಾತ್ರೆ ಅಂಗವಾಗಿ ‘ದಬಾರ್ ಡಿಸ್ನಿಲ್ಯಾಂಡ್’ ಹೆಸರಿನ ಸ್ಥಳೀಯ ಸಂಸ್ಥೆಯು ಫೆಬ್ರವರಿ 27 ರಂದು ಅಜ್ಮೀರ್ನ ಕುಂದನ್ ನಗರ ಪ್ರದೇಶದಲ್ಲಿ ಸ್ವಿಂಗ್ ಮತ್ತು ರೈಡ್ಗಳನ್ನು ಸ್ಥಾಪಿಸಿತ್ತು. ಕೇಬಲ್ ತುಂಡಾಗಿ ಘಟನೆ ಸಂಭವಿಸಿದೆ ಎನ್ನಲಾಗಿದೆ.