ತನ್ನನ್ನು ತಾನು ವೈದ್ಯ ಎಂದು ಹೇಳಿಕೊಂಡಿದ್ದ ವಂಚಕನೊಬ್ಬ ಏಳು ರಾಜ್ಯಗಳ 14 ಮಂದಿ ಮಹಿಳೆಯರನ್ನು ಮದುವೆಯಾಗಿ ಲಕ್ಷಾಂತರ ರೂಪಾಯಿ ದೋಚಿದ್ದು ಈತನನ್ನು ಓಡಿಶಾದ ಭುವನೇಶ್ವರದ ಖಂಡಗಿರಿಯಲ್ಲಿ ಏಳನೇ ಪತ್ನಿಯು ನೀಡಿದ ದೂರನ್ನು ಆಧರಿಸಿ ಪೊಲೀಸರು ಬಂಧಿಸಿದ್ದಾರೆ.
ಆರೋಪಿ ರಮೇಶ್ ವೈದ್ಯನೂ ಅಲ್ಲ ಹಾಗೂ ಸರ್ಕಾರಿ ಅಧಿಕಾರಿಯೂ ಅಲ್ಲ. ಆದರೆ ಈತ ತನ್ನ ವಾಹನದ ಮೇಲೆ ಸರ್ಕಾರಿ ಸಿಬ್ಬಂದಿ ಎಂಬ ಸ್ಟಿಕ್ಕರ್ ಅಂಟಿಸಿಕೊಂಡಿದ್ದ ಎನ್ನಲಾಗಿದೆ. ಐಷಾರಾಮಿ ಫ್ಲ್ಯಾಟ್ಗಳಲ್ಲಿ ವಾಸಿಸುತ್ತಿದ್ದ ಈತ ರಾಜ್ಯಾದ್ಯಂತ ಪ್ರಯಾಣ ಬೆಳೆಸುತ್ತಿದ್ದ ಎನ್ನಲಾಗಿದೆ.
ವಂಚಕ ರಮೇಶ್ ಮೊಟ್ಟ ಮೊದಲ ಬಾರಿಗೆ 1982ರಲ್ಲಿ ಕೇಂದ್ರಪಾರಾದಲ್ಲಿ ವಿವಾಹವಾಗಿದ್ದನು. ಇದಾದ ಬಳಿಕ 2002ರಲ್ಲಿ ಎರಡನೇ ವಿವಾಹವಾಗಿದ್ದಾನೆ. ಮ್ಯಾಟ್ರಿಮೋನಿ ವೆಬ್ಸೈಟ್ನಲ್ಲಿ ವೈದ್ಯ ಅಥವಾ ಸರ್ಕಾರಿ ಅಧಿಕಾರಿ ಎಂದು ಹಾಕಿಕೊಂಡಿದ್ದ. ಅಲ್ಲದೇ ಅವಿವಾಹಿತ ಎಂದೂ ಬರೆದುಕೊಂಡಿದ್ದ ಎನ್ನಲಾಗಿದೆ. ಶ್ರೀಮಂತ ಕುಟುಂಬದ ಮಹಿಳೆಯರನ್ನೇ ಟಾರ್ಗೆಟ್ ಮಾಡುತ್ತಿದ್ದ ಈತ ವಿವಾಹವಾದ ಬಳಿಕ ಅವರ ಬಳಿ ಇದ್ದ ಲಕ್ಷಾಂತರ ಹಣವನ್ನು ದೋಚಿ ಎಸ್ಕೇಪ್ ಆಗುತ್ತಿದ್ದ ಎನ್ನಲಾಗಿದೆ.
ರಮೇಶ್ ಓಡಿಶಾದಲ್ಲಿ ಮೂವರು, ಪಂಜಾಬ್ನಲ್ಲಿ ಒಬ್ಬರು, ಜಾರ್ಖಂಡ್, ಆಂಧ್ರಪ್ರದೇಶ ಹಾಗೂ ಚತ್ತೀಸಗಢದಲ್ಲಿ ತಲಾ ಒಂದು ಮದುವೆಯಾಗಿದ್ದಾನೆ. ಇದರ ಜೊತೆಯಲ್ಲಿ ದೆಹಲಿಯಲ್ಲಿ ಹಾಗೂ ಮಧ್ಯಪ್ರದೇಶದಲ್ಲಿಯೂ ತಲಾ ಇಬ್ಬರನ್ನು ವಿವಾಹವಾಗಿದ್ದಾನೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಕಳೆದ ವರ್ಷ ಜುಲೈ ತಿಂಗಳಲ್ಲಿ ರಮೇಶ್ 7ನೇ ಪತ್ನಿ ಖಂಡಗಿರಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ನಾವು ಮ್ಯಾಟ್ರಿಮೋನಿ ವೆಬ್ಸೈಟ್ ಮೂಲಕ ಒಬ್ಬರಿಗೊಬ್ಬರು ಪರಿಚಯವಾಗಿದ್ದೆವು. ನಮ್ಮ ವಿವಾಹದ ಬಳಿಕ ನಾವು ಭುವನೇಶ್ವರದಲ್ಲಿ ವಾಸವಿದ್ದೆವು. ಸ್ವಲ್ಪ ದಿನದ ಬಳಿಕ ಈ ವ್ಯಕ್ತಿಯು ನನ್ನ ಚಿನ್ನ ಹಾಗೂ ಹಣದೊಂದಿಗೆ ಎಸ್ಕೇಪ್ ಆಗಿದ್ದ, ಇದಾದ ಬಳಿಕ ಈತ ವೆಬ್ಸೈಟ್ನಲ್ಲಿ ಮತ್ತೆ ಮದುವೆಯಾಗಲು ಫೋಟೋ ಅಳವಡಿಸಿದ್ದು ನನ್ನ ಗಮನಕ್ಕೆ ಬಂತು. ಹೀಗಾಗಿ ನಾನು ಎಫ್ಐಆರ್ ದಾಖಲಿಸಿದೆ ಎಂದು ಏಳನೇ ಪತ್ನಿ ಹೇಳಿದ್ದಾರೆ.
