ಮುಂಬೈ: ಬೃಹತ್‌ ಆನ್‌ ಲೈನ್‌ ವಂಚನೆ ಹಗರಣವೊಂದನ್ನು ಬೆಳಕಿಗೆ ಬಂದಿದೆ. 2018ರಲ್ಲಿ ನಡೆದ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್ ಹಗರಣಕ್ಕಿಂತ ದೊಡ್ಡ ಮಟ್ಟದ ಬ್ಯಾಂಕ್ ವಂಚನೆ ಪ್ರಕರಣದ ಕುರಿತು ಥಾಣೆ ಪೊಲೀಸರು ದೂರು ಸ್ವೀಕರಿಸಿದ್ದಾರೆ.
ವಂಚನೆಯ ಮೌಲ್ಯ 16,180-ಕೋಟಿ ರೂ. ಆಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಕುರಿತು Safexpay Technology Pvt. ಕಂಪನಿಯು ಅಕ್ಟೋಬರ್ 9 ರಂದು ಥಾಣೆಯ ಶ್ರೀನಗರ ಪೊಲೀಸ್ ಠಾಣೆ ಪ್ರಕರಣ ದಾಖಲಿಸಿದೆ. ದೂರಿನಲ್ಲಿ ಹೀಗೆ ವಿವರಿಸಲಾಗಿದ್ದು Safexpay ನ ಪೇಔಟ್ ಪ್ಲಾಟ್‌ಫಾರ್ಮ್ ಅನ್ನು ಕೆಲವು ಅಪರಿಚಿತರು ಹ್ಯಾಕ್ ಮಾಡಿದ್ದಾರೆ. ಈ ಮೂಲಕ ವಿದೇಶ ಸೇರಿದಂತೆ 16,180 ಕೋಟಿ ರೂ. ಗಳನ್ನು ವಿವಿಧ ಕಡೆಗಳಿಗೆ ವರ್ಗಾಯಿಸಲಾಗಿದೆ ಎಂದು ತಿಳಿಸಲಾಗಿದೆ.
ಏಪ್ರಿಲ್‌ನಲ್ಲಿ ದೆಹಲಿ, ತಮಿಳುನಾಡು, ಮಧ್ಯಪ್ರದೇಶ ಮತ್ತು ಉತ್ತರ ಪ್ರದೇಶದ ನಾಲ್ವರು ಉದ್ಯಮಿಗಳ ಬ್ಯಾಂಕ್ ಬ್ಯಾಲೆನ್ಸ್ ಮತ್ತು ಸಿಸ್ಟಮ್ ಬ್ಯಾಲೆನ್ಸ್‌ಗಳ ನಡುವೆ “ಸಂಶಯಾಸ್ಪದ” ವ್ಯತ್ಯಾಸ ಕಂಡುಬಂದಾಗ ಈ ಹಗರಣ ಬೆಳಕಿಗೆ ಬಂದಿದೆ ಎಂದು ಥಾಣೆ ಮೂಲದ Safexpay ನ ಸಂಸ್ಥಾಪಕ-ಸಿಇಒ ರವಿ ಗುಪ್ತಾ ಪೊಲೀಸರಿಗೆ ನೀಡಿದ ದೂರಿನಲ್ಲಿ ತಿಳಿಸಿದ್ದಾರೆ. Safexpay ನ ಹಣಕಾಸು ಕಾರ್ಯಾಚರಣೆ ತಂಡಗಳ ಸೂಕ್ಷ್ಮ ಆಂತರಿಕ ತನಿಖೆ ನಡೆಸಿದ್ದು, ನಾಲ್ವರು ಉದ್ಯಮಿಗಳ ಪೈಕಿ ಓರ್ವ ಉದ್ಯಮಿಯ ಲಾಗಿನ್‌ ಐಡಿ ಹ್ಯಾಕ್ ಮಾಡಿ ಈ ಕೃತ್ಯ ವೆಸಗಿರುವುದು ಬೆಳಕಿಗೆ ಬಂದಿದೆ.
ಅಲ್ಲದೆ ಉದ್ಯಮಿಯ ಹೆಸರಿನಲ್ಲಿ ನಡೆಸಿದ ವ್ಯವಹಾರ ಸ್ವತಃ ಅವರಿಗೆ ಸೇರಿಲ್ಲ. Safexpay ಪ್ರತಿದಿನ 100,000 ವಹಿವಾಟುಗಳನ್ನು ನಿರ್ವಹಿಸುತ್ತದೆ. ಈ ಬೃಹತ್‌ ಬ್ಯಾಂಕ್ ವಂಚನೆ ಕುರಿತು ಕಂಪನಿ ತಕ್ಷಣವೇ ಫಲಾನುಭವಿಗಳು ಮತ್ತು ಬ್ಯಾಂಕ್‌ಗಳಿಗೆ ತಿಳಿಸಿದೆ. ಅಲ್ಲದೆ ಹಣ ವರ್ಗಾವಣೆ ತಡೆಯಲು ಕ್ರಮ ಕೈಗೊಂಡಿರುವುದಾಗಿ ಕಂಪನಿ ಹೇಳಿದೆ.
