ನವದೆಹಲಿ: ಒನ್ ಬೆಲ್ಟ್ ಮತ್ತು ಒನ್ ರೋಡ್ ಯೋಜನೆ ಮೂಲಕ ಜಾಗತಿಕವಾಗಿ ಪ್ರಭಾವ ಬೀರಿ ಎಲ್ಲ ದೇಶಗಳನ್ನು ಹಿಡಿತದಲ್ಲಿ ಇರಿಸಿಕೊಳ್ಳಬೇಕೆಂಬ ಚೀನಾದ ದುರ್ಬುದ್ಧಿಗೆ ಒಂದೊಂದೆ ರಾಷ್ಟ್ರಗಳು ಸರಿಯಾಗಿಯೇ ಪಾಠ ಕಲಿಸುತ್ತಿವೆ. ಈ ಹಿಂದೆ ಇಟಲಿ ಯೋಜನೆಯಿಂದ ಹಿಂದೆ ಸರಿಯುವುದಾಗಿ ಹೇಳಿತ್ತು.
ಇದೀಗ ಚೀನಾದ ಮಹತ್ವಾಕಾಂಕ್ಷಿ ಯೋಜನೆಯ ಭಾಗವಾಗಿದ್ದ ಫಿಲಿಪೈನ್ಸ್ ಯೋಜನೆಯಿಂದಲೇ ನಿರ್ಗಮಿಸುತ್ತಿದೆ. ಚೀನಾದ ಬೆಲ್ಟ್ ಮತ್ತು ರೋಡ್ ಇನಿಶಿಯೇಟಿವ್ ನಿಂದ ಫಿಲಿಪೈನ್ ನಿರ್ಗಮಿಸುತ್ತಿದೆ ಎಂದು ಫಿಲಿಪೈನ್ ಸಾರಿಗೆ ಇಲಾಖೆ ಹೇಳಿದೆ ಎಂದು ಏಷ್ಯಾ ಟೈಮ್ಸ್ ವರದಿ ಮಾಡಿದೆ.
ವರದಿಯಲ್ಲಿರುವಂತೆ ಫಿಲಿಪೈನ್ ಸೆನೆಟ್ ಪ್ರಕಾರ, ಆರ್ಥಿಕ ಮತ್ತು ರಾಜಕೀಯ ಅಂಶಗಳಿಂದಾಗಿ ಫಿಲಿಪೈನ್ಸ್‌ನಲ್ಲಿ ಚೀನಾದ ಎಲ್ಲಾ ನಿರ್ಣಾಯಕ ಹೂಡಿಕೆಯ ಉಪಕ್ರಮಗಳ ಮೇಲೆ ಈಗ ಅನುಮಾನ ವ್ಯಕ್ತಪಡಿಸಿದ್ದು, ಇದು ಫಿಲಿಪೈನ್-ಚೀನಾ ಸಂಬಂಧ ಹೊಸ ಕೆಳಮಟ್ಟಕ್ಕೆ ಕುಸಿಯಲು ಕಾರಣವಾಗಿದೆ.
ಫಿಲಿಪೈನ್ಸ್ ಅಧ್ಯಕ್ಷ ಡ್ಯುಟರ್ಟೆ ಅವರ ಅಡಿಯಲ್ಲಿ ಫಿಲಿಪೈನ್ಸ್‌ನಲ್ಲಿ ಚೀನಾದ ರಾಜತಾಂತ್ರಿಕ ವಿಧಾನವು ದಕ್ಷಿಣ ಚೀನಾ ಸಮುದ್ರದಲ್ಲಿನ ರಿಯಾಯಿತಿಗಳಿಗೆ ಬದಲಾಗಿ ಗಣನೀಯ ಹೂಡಿಕೆಗಳನ್ನು ಒಳಗೊಂಡಿರುವ ಹೊಸ ರೀತಿಯ ಸಂಚಿನ ರಾಜತಾಂತ್ರಿಕತೆ ಎಂದು ಟೀಕೆಗಳನ್ನು ಎದುರಿಸುತ್ತಿದೆ. ಚೀನಾದ ಮಹತ್ವಾಕಾಂಕ್ಷಿ ಮೂಲಭೂತ ಸೌಕರ್ಯ ಯೋಜನೆ ಬೆಲ್ಟ್ ಮತ್ತು ರೋಡ್ ನಲ್ಲಿ $24 ಶತಕೋಟಿಯಷ್ಟು ಭರವಸೆ ನೀಡಿದ ಬಹುಪಾಲು ಯೋಜನೆಗಳು ಕಾರ್ಯರೂಪಕ್ಕೆ ಬರಲು ವಿಫಲವಾಗಿವೆ.
