ನವದೆಹಲಿ: ಈ ವಾರ ಚೀನಾ ಬಿಡುಗಡೆ ಮಾಡಿರುವ ನವೀಕೃತ ನಕ್ಷೆಯು ಸ್ಪ್ರಾಟ್ಲಿ ಮತ್ತು ಪ್ಯಾರಾಸೆಲ್ ದ್ವೀಪಗಳ ಮೇಲಿನ ತನ್ನ ಸಾರ್ವಭೌಮತ್ವವನ್ನು ಉಲ್ಲಂಘಿಸುತ್ತದೆ. ಅಲ್ಲದೆ ಜಲಮೂಲಗಳ ಮೇಲಿನ ನ್ಯಾಯವ್ಯಾಪ್ತಿಯನ್ನು ಉಲ್ಲಂಘಿಸುತ್ತದೆ ಎಂದು ವಿಯೆಟ್ನಾಂ ಹೇಳಿದೆ.
ನಕ್ಷೆಯಲ್ಲಿನ ಒಂಬತ್ತು-ಚುಕ್ಕೆಗಳ ರೇಖೆಯನ್ನು ಆಧರಿಸಿದ ಚೀನಾದ ಸಾರ್ವಭೌಮತ್ವ ಮತ್ತು ಕಡಲ ಹಕ್ಕುಗಳು “ಅಮಾನ್ಯ ಎಂದು ವಿಯೆಟ್ನಾಂನ ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ವಕ್ತಾರ ಫಾಮ್ ಥು ಹ್ಯಾಂಗ್ ಅವರ ಹೇಳಿಕೆಯನ್ನು ಉಲ್ಲೇಖಿಸಿ ವಿಯೆಟ್ನಾಂನ ಸ್ಥಳೀಯ ಮಾಧ್ಯಮವೊಂದು ವರದಿ ಮಾಡಿದೆ.
ಈ ಮೊದಲು ಚೀನಾದ ನಿಯಂತ್ರಣದಲ್ಲಿರುವ ಅರುಣಾಚಲ ಪ್ರದೇಶದ ಭಾಗಗಳನ್ನು ತೋರಿಸುವ ನಕ್ಷೆಯ ಕುರಿತು ಭಾರತ ಬಲವಾದ ವಿರೋಧ ವ್ಯಕ್ತಪಡಿಸಿತ್ತು. ಈ ನಡುವೆ ದಕ್ಷಿಣ ಚೀನಾ ಸಮುದ್ರದಲ್ಲಿ ಚೀನಾದ ವಿಸ್ತಾರ ವಾದವನ್ನು ನಾವು ಒಪ್ಪುವುದಿಲ್ಲ ಎಂದು ಫಿಲಿಪೈನ್ಸ್ ಹೇಳಿದೆ. ಮಲೇಷ್ಯಾ ಮತ್ತು ತೈವಾನ್ ಸರ್ಕಾರಗಳು ಕೂಡ ಬೀಜಿಂಗ್ ನ ವಿಸ್ತರಣಾ ವಾದದ ಅಂಶಗಳ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸಿವೆ.