ನವದೆಹಲಿ: ಪಶುವೈದ್ಯರು ಗುರುತಿಸಲು ಸಾಧ್ಯವಾಗದ ನಾಯಿಯ ರಕ್ತ ದೋಷ ಸಮಸ್ಯೆಯನ್ನು ಎಐ ಚಾಟ್‌ಬಾಟ್ ಚಾಟ್‌ಜಿಪಿಟಿ ಗುರುತಿಸಿರುವುದಾಗಿ ಟ್ವಿಟರ್ ಬಳಕೆದಾರರೊಬ್ಬರು ಇತ್ತೀಚೆಗೆ ಹೇಳಿಕೊಂಡಿದ್ದಾರೆ.
@peakcooper ಎಂಬ ಟ್ವಿಟರ್ ಬಳಕೆದಾರರು ಈ ಬಗ್ಗೆ ವಿವರಣೆ ನೀಡಿದ್ದಾರೆ. ತನ್ನ ಸಾಸ್ಸಿ ಎಂಬ ಸಾಕುನಾಯಿಯು ಟಿಕ್-ಬ್ರೋನ್‌ ಕಾಯಿಲೆಯಿಂದ ಬಳಲುತ್ತಿತ್ತು. ಆದರೆ ನಿಗದಿತ ಚಿಕಿತ್ಸೆಯನ್ನು ನೀಡಿದರೂ ರೋಗಲಕ್ಷಣಗಳು ಕಡಿಮೆಯಾಗುವ ಬದಲಿಗೆ ಉಲ್ಬಣಗೊಂಡವು. ನಾಯಿಯ ವಸಡುಗಳು ಮಸುಕಾಗಿದ್ದವು. ಅಲ್ಲದೇ ರಕ್ತ ಪರೀಕ್ಷೆಯು ವರದಿಯೂ ತೀವ್ರ ರಕ್ತಹೀನತೆ ಇರುವುದನ್ನು ದೃಢಪಡಿಸಿತ್ತು. ಆದರೆ ವೈದ್ಯರಲ್ಲಿ ತೋರಿಸಿದಾಗಲೂ ಸೂಕ್ತ ಪರಿಹಾರ ದೊರೆಯಲಿಲ್ಲ. ಬಳಿಕ ಮತ್ತೊಬ್ಬ ವೈದ್ಯರಲ್ಲಿ ನಾಯಿಗೆ ಉಂಟಾಗಿರುವ ತೊಂದರೆ ಪರಿಹಾರಕ್ಕೆ ಕರೆದೊಯ್ಯಲಾಯಿತು. ದುರದೃಷ್ಟವಶಾತ್‌ ಅಲ್ಲಿಯೂ ಯಾವುದೇ ಪ್ರಯೋಜನವಾಗಲಿಲ್ಲ. ಈ ಮಧ್ಯೆ ಚಾಟ್‌ ಜಿಪಿಟಿ ತಂತ್ರಾಂಶ ಮೊರೆಹೋದ ಅವರು ರಕ್ತ ಪರೀಕ್ಷೆ ಫಲಿತಾಂಶಗಳನ್ನು ದಾಖಲಿಸಿ ಸಮಸ್ಯೆಗೆ ಉತ್ತರ ಬಯಸಿದರು. ಚಾಟ್‌ ಬಾಟ್‌ ಹಿಮೋಲಿಟಿಕ್‌ ರಕ್ತಹೀನತೆ ಸಮಸ್ಯೆ ಇರುವುದಾಗಿ ತಿಳಿಸಿದೆ. ನಂತರ ಆ ಫಲಿತಾಂಶವನ್ನು ಮತ್ತೊಬ್ಬ ಪಶುವೈದ್ಯರ ಬಳಿಗೆ ತೋರಿಸಿದ್ದು, ಅವರು ರಕ್ತಹೀನತೆ ಸಮಸ್ಯೆಯನ್ನು ದೃಢಪಡಿಸಿದ್ದಲ್ಲದೇ ಚಿಕಿತ್ಸೆ ಆರಂಭಿಸಿದರು. ಈಗ ನಾಯಿ ಸಾಸ್ಸಿ ಸಂಪೂರ್ಣ ಚೇತರಿಸಿಕೊಂಡಿದೆ ಎಂದು ಅವರು ತಿಳಿಸಿದ್ದಾರೆ.
