ನವದೆಹಲಿ: ಉದ್ಯೋಗಿಗಳಿಗೆ ತಮ್ಮ ಅಗತ್ಯ ಅನಿವಾರ್ಯ ಸೇರಿದಂತೆ ಆಪತ್ತಿಗೆ ಒದಗುವ ಏಕೈಕ ಆಧಾರವೆಂದರೆ ಇಪಿಎಫ್. ತಮ್ಮ ಅನಿವಾರ್ಯ ಹಣಕಾಸು ಅಗತ್ಯಗಳಿಗೆ ಹೆಚ್ಚಿನ ಮಂದಿ ಇದೇ ಮೂಲವನ್ನು ಅವಲಂಬಿಸಿರುತ್ತಾರೆ.
ಆದರೆ ಕೆಲ ಉದ್ಯೋಗದಾತ ಸಂಸ್ಥೆಗಳು ಕಾಲಕಾಲಕ್ಕೆ ಇಪಿಎಫ್ ವಂತಿಗೆಯನ್ನೇ ನೀಡದೆ ವಂಚಿಸುತ್ತಿವೆ. ಇದರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲು ಇಪಿಎಫ್ಒ ಮುಂದಾಗಿದೆ. ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ ಇಪಿಎಫ್ಒ ಮುಂದಿನ ತಿಂಗಳಿಂದ ಸ್ಪೆಷಲ್ ಡ್ರೈವ್ ನಡೆಸಲಿದೆ.
ಡಿಸೆಂಬರ್ನಿಂದ ಶುರುವಾಗಿ 2024ರ ಫೆಬ್ರವರಿವರೆಗೂ ನಡೆಯುವ ಈ ಡ್ರೈವ್ನಲ್ಲಿ ಸಂಸ್ಥೆಗಳಿಂದ ಪಿಎಫ್ ಬಾಕಿ ಹಣವನ್ನು ವಸೂಲಿ ಮಾಡಲಾಗುತ್ತದೆ. ನವೆಂಬರ್ 10ರಂದು ಚೆನ್ನೈ ವಿಭಾಗದ ಪಿಐಬಿ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ಈ ಸಂಗತಿಯನ್ನು ತಿಳಿಸಲಾಗಿದೆ.
‘ಇಪಿಎಫ್ಒಗೆ ಸಬ್ಸ್ಕ್ರೈಬ್ ಆಗಿರುವ ಎಲ್ಲಾ ಸಂಸ್ಥೆಗಳು ಇಪಿಎಫ್ಗೆ ನೀಡಬೇಕಿರುವ ಬಾಕಿ ಹಣವನ್ನು ಸಲ್ಲಿಸಬೇಕು ಎಂದು ಈ ಮೂಲಕ ಸಲಹೆ ನೀಡಲಾಗುತ್ತಿದೆ,’ ಎಂದು ಈ ಹೇಳಿಕೆಯಲ್ಲಿ ತಿಳಿಸಲಾಗಿದೆ. ಒಂದು ವೇಳೆ ಇಪಿಎಫ್ ಹಣ ತುಂಬಿಸದಿದ್ದರೆ ಸಂಸ್ಥೆಯ ಚಿರಾಸ್ತಿ, ಚರಾಸ್ತಿ, ಬ್ಯಾಂಕ್ ಖಾತೆ ಇತ್ಯಾದಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗುತ್ತದೆ. ಸಂಸ್ಥೆಯ ಮುಖ್ಯಸ್ಥರನ್ನು ಬಂಧಿಸಲಾಗುತ್ತದೆ ಎಂದೂ ಈ ಹೇಳಿಕೆಯಲ್ಲಿ ಎಚ್ಚರಿಕೆ ನೀಡಲಾಗಿದೆ.
