ದೆಹಲಿ: ನೀಟ್ ಪರೀಕ್ಷೆ ಮುಂದೂಡುವಂತೆ ಭಾರತೀಯ ವೈದ್ಯಕೀಯ ಸಂಘವು ಮಾಡಿದೆ. ಈ ಕುರಿತು ಕೇಂದ್ರ ಆರೋಗ್ಯ ಸಚಿವ ಮನಸುಖ್ ಮಾಂಡವೀಯ ಅವರಿಗೆ ಪತ್ರ ಬರೆದಿದ್ದು ಮೇ 21 ರಂದು ನಡೆಯಲಿರುವ ನೀಟ್ ಪಿಜಿ ಪರೀಕ್ಷೆಯನ್ನು ಮರು ನಿಗದಿಪಡಿಸುವಂತೆ ಪತ್ರದಲ್ಲಿ ಕೋರಿಕೊಂಡಿದೆ.
2021ರ ಕೌನ್ಸೆಲಿಂಗ್ ಮತ್ತು ನೀಟ್ ಪಿಜಿ2022 ರ ನಡುವೆ ಇರುವ ಅವಧಿಯು ತುಂಬಾ ಚಿಕ್ಕದಾಗಿದ್ದು ಪರೀಕ್ಷಾರ್ಥಿಗಳಿಗೆ ಅತ್ಯಂತ ಕಷ್ಟದ ಪರೀಕ್ಷೆಯಾದ ನೀಟ್ ಗೆ ತಯಾರಿ ನಡೆಸಲು ಕಷ್ಟವಾಗುತ್ತದೆ. ಆದ್ದರಿಂದ ವಿದ್ಯಾರ್ಥಿಗಳ ಹಿತ ದೃಷ್ಟಿಯಿಂದ ಪರೀಕ್ಷೆಯನ್ನು ಮುಂದೂಡಬೇಕೆಂದು ಮನವಿ ಮಾಡಿದೆ.
ಕೋವಿಡ್-19ರ ಕಾರಣದಿಂದಾಗಿ ನಿಗದಿತ ದಿನಾಂಕಕ್ಕಿಂತ ಐದು ತಿಂಗಳು ತಡವಾಗಿ ನೀಟ್ ಪಿಜಿ-2021ನ್ನು ನಡೆಸಲಾಗಿದೆ. ಅಕ್ಟೋಬರ್ ನಲ್ಲಿ ಪ್ರಾರಂಭವಾಗ ಬೇಕಿದ್ದ ಕೌನ್ಸೆಲಿಂಗ್ ಜನವರಿಯಲ್ಲಿ ಪ್ರಾರಂಭವಾಯಿತು. ಪ್ರಸ್ತುತ ಮೇ 21 ಕ್ಕೆ 2022ರ ನೀಟ್ ಪರೀಕ್ಷೆ ನಿಗದಿಯಾಗಿದೆ. ಇದು ಪರೀಕ್ಷಾರ್ಥಿಗಳಿಗೆ ಕಷ್ಟವಾಗುತ್ತದೆ.
COVID-19 ಸಾಂಕ್ರಾಮಿಕ ಸಮಯದಲ್ಲಿ ಕೋವಿಡ್ ಯೋಧರಾಗಿ ಸೇವೆ ಸಲ್ಲಿಸಿದ ಐದರಿಂದ ಹತ್ತು ಸಾವಿರ ಇಂಟರ್ನ್ಗಳು, ತಮ್ಮ ಅಂತಿಮ ಪರೀಕ್ಷೆಯನ್ನು ಪೂರ್ಣಗೊಳಿಸುವಲ್ಲಿ ವಿಳಂಬವಾಗಿರುವುದರಿಂದ ಅವರು ಪರೀಕ್ಷೆಗೆ ಹಾಜರಾಗಲು ಅನರ್ಹರಾಗಿದ್ದಾರೆ. ಇದು ಲಕ್ಷಗಟ್ಟಲೇ ವೈದ್ಯಕೀಯ ಪದವೀಧರರ ವೃತ್ತಿ ಮಾರ್ಗಗಳಿಗೆ ಸಂಬಂಧಿಸಿದೆ. ಆದ ಕಾರಣ ಆರೋಗ್ಯ ಸಚಿವರು ಈ ಕುರಿತು ಗಮನ ಹರಿಸಿ ವಿದ್ಯಾರ್ಥಿಗಳ ಮತ್ತು ಸಾಮಾಜಿಕ ಹಿತ ದೃಷ್ಟಿಯಿಂದ ಪರೀಕ್ಷೆಯನ್ನು ಮುಂದೂಡಬೇಕು ಎಂದು ಐಎಂಎ ಮನವಿ ಮಾಡಿದೆ.