ದೀಪಾವಳಿಯ ಈ ಸಂದರ್ಭದಲ್ಲಿ ಮಹಾತ್ಮ ಗಾಂಧೀಜಿಯವರ ಜೀವನ ಮತ್ತು ಪರಂಪರೆಯನ್ನು ಸ್ಮರಿಸುವ ನಿಟ್ಟಿನಲ್ಲಿ ಹೊಸ £5 ನಾಣ್ಯವನ್ನು ಇಂಗ್ಲೆಂಡ್’ನ ಚಾನ್ಸೆಲರ್ ರಿಷಿ ಸುನಕ್ ಯುಕೆಯಲ್ಲಿ ಅನಾವರಣಗೊಳಿಸಿದ್ದಾರೆ.
ಈ ನಾಣ್ಯವು ರಾಯಲ್ ಮಿಂಟ್‌ನ ದೀಪಾವಳಿಯ ಸಂಗ್ರಹದ ಭಾಗವಾಗಿದೆ. ಇದನ್ನು ಹೀನಾ ಗ್ಲೋವರ್ ವಿನ್ಯಾಸಗೊಳಿಸಿದ್ದಾರೆ, ಇದು ಗಾಂಧಿಯವರ ಅತ್ಯಂತ ಪ್ರಸಿದ್ಧ ಉಲ್ಲೇಖಗಳಲ್ಲಿ ಒಂದಾದ “ನನ್ನ ಜೀವನವೇ ನನ್ನ ಸಂದೇಶ ‘ಮೈ ಲೈಫ್ ಈಸ್ ಮೈ ಮೆಸೇಜ್’ ಜೊತೆಗೆ ಭಾರತದ ರಾಷ್ಟ್ರೀಯ ಹೂವು ಕಮಲದ ಚಿತ್ರವನ್ನು ಒಳಗೊಂಡಿದೆ.
ಇದೇ ಮೊದಲ ಬಾರಿಗೆ ಗಾಂಧಿಯವರನ್ನು ಅಧಿಕೃತವಾಗಿ ಯುಕೆಯಲ್ಲಿ ನಾಣ್ಯದ ಮೂಲಕ ಸ್ಮರಿಸಲಾಗಿದೆ. ಇದು ಯುಕೆ ಮತ್ತು ಭಾರತದ ನಡುವಿನ ಬಲವಾದ ಸಂಬಂಧಗಳು ಮತ್ತು ಸಾಂಸ್ಕೃತಿಕ ಸಂಪರ್ಕಗಳನ್ನು ಬಿಂಬಿಸುತ್ತದೆ.
“ಈ ನಾಣ್ಯವು ಪ್ರಪಂಚದಾದ್ಯಂತ ಲಕ್ಷಾಂತರ ಜನರನ್ನು ಪ್ರೇರೇಪಿಸಿದ ಪ್ರಭಾವಿ ನಾಯಕನಿಗೆ ಸೂಕ್ತವಾದ ಗೌರವವಾಗಿದೆ… ದೀಪಾವಳಿಯ ಸಮಯದಲ್ಲಿ ಈ ನಾಣ್ಯವನ್ನು ಅನಾವರಣಗೊಳಿಸಲು ನಾನು ಹೆಮ್ಮೆಪಡುತ್ತೇನೆ. ಮಹಾತ್ಮ ಗಾಂಧಿಯವರು ಭಾರತದ ಸ್ವಾತಂತ್ರ್ಯಕ್ಕಾಗಿ ಹೋರಾಡಿದ ಪ್ರಮುಖರು. ಮೊದಲ ಬಾರಿಗೆ ಅವರ ಗಮನಾರ್ಹ ಜೀವನದ ಸ್ಮರಣಾರ್ಥವಾಗಿ ಯುಕೆ ನಾಣ್ಯವನ್ನು ಬಿಡುಗಡೆ ಮಾಡಿರುವುದು ಅದ್ಭುತಗಳಲ್ಲೊಂದು” ಎಂದು ಚಾನ್ಸೆಲರ್ ರಿಷಿ ಸುನಕ್ ಹೇಳಿದ್ದಾರೆ.
