ಮೈಸೂರು: ಮೈಸೂರಿನಲ್ಲಿ ಕೊರೊನಾ ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದು, ಮಂಗಳವಾರ 1,848 ಮಂದಿಗೆ ಸೋಂಕು ದೃಢವಾಗಿದ್ದು, ಚಿಕಿತ್ಸೆ ಫಲಿಸದೆ ಮೂವರು ಮೃತಪಟ್ಟಿದ್ದಾರೆ. ಇನ್ನೊಂದೆಡೆ ಕೋವಿಡ್ ಪಾಸಿಟಿವಿಟಿ ದರ ಶೇ.29.98ಕ್ಕೆ ಏರಿಕೆಯಾಗುತ್ತಿರುವುದು ಆತಂಕ ತಂದಿದೆ.
ಗುರುವಾರ 6164 ಕೋವಿಡ್ ಟೆಸ್ಟ್ ನಡೆಸಲಾಗಿದ್ದು, ಇದರಲ್ಲಿ 96 ಮಕ್ಕಳು ಸೇರಿದಂತೆ ಒಟ್ಟು 1848 ಮಂದಿಗೆ ಸೋಂಕು ಹರಡಿದೆ. ಈ ಮೂಲಕ ಜಿಲ್ಲೆಯಲ್ಲಿ ಗುಣಮುಖರಾದವರ ಪ್ರಮಾಣ 31.66ರಷ್ಟಿದ್ದು, ಮರಣ ಪ್ರಮಾಣ ಶೇ.0.16ರಷ್ಟಿದೆ.
ಜಿಲ್ಲೆಯಲ್ಲಿ 1,90,462 ಮಂದಿಗೆ ಸೋಂಕು ಹರಡಿದ್ದು, ಗುಣಮುಖರಾದವರ ಸಂಖ್ಯೆ 1,79,623ರಷ್ಟಿದೆ. ಮಂಗಳವಾರ ಸೋಂಕಿನಿಂದ ಚೇತರಿಸಿಕೊಂಡವರ ಸಂಖ್ಯೆಯೂ ಹೆಚ್ಚಾಗಿದ್ದು, ವಿವಿಧ ಆಸ್ಪತ್ರೆ ಮತ್ತು ಹೋಂ ಐಸೋಲೇಷನ್ನಲ್ಲಿದ್ದವರಲ್ಲಿ 585 ಮಂದಿ ಗುಣಮುಖರಾಗಿದ್ದಾರೆ. ಸಧ್ಯಕ್ಕೆ ಜಿಲ್ಲೆಯಲ್ಲಿ 8,401 ಸಕ್ರಿಯ ಪ್ರಕರಣಗಳಿದ್ದು, ಕಳೆದೊಂದು ವಾರದಲ್ಲಿ ಸಕ್ರಿಯ ಪ್ರಕರಣಗಳ ಪ್ರಮಾಣ ಗಣನೀಯವಾಗಿ ಏರಿಕೆಯಾಗಿದೆ. ಹಾಗೆಯೇ ಸೋಂಕಿಗೆ ಮೂವರು ಬಲಿಯಾಗಿದ್ದು, ಒಟ್ಟು ಮೃತಪಟ್ಟವರ ಸಂಖ್ಯೆ 2431ಕ್ಕೆ ಹೆಚ್ಚಿದೆ.
ಮೈಸೂರು ನಗರದಲ್ಲಿ 1347, ಕೆ.ಆರ್.ನಗರ 74, ಮೈಸೂರು ತಾಲೂಕು 69, ನಂಜನಗೂಡು 83, ಪಿರಿಯಾಪಟ್ಟಣ 62, ತಿ.ನರಸೀಪುರದಲ್ಲಿ 107, ಹುಣಸೂರು 16, ಎಚ್.ಡಿ.ಕೋಟೆಯಲ್ಲಿ 22, ಸಾಲಿಗ್ರಾಮದಲ್ಲಿ 21 ಪ್ರಕರಣ ದಾಖಲಾಗಿದ್ದರೆ ಸರಗೂರು ತಾಲೂಕಿನಲ್ಲಿ 2 ಪ್ರಕರಣ ದಾಖಲಾಗಿದೆ. 5 ವರ್ಷ ಒಳಪಟ್ಟ 13 ಮಕ್ಕಳಲ್ಲಿ, 6ರಿಂದ 10 ವರ್ಷದ ಒಳಗಿನ 18 ಮತ್ತು 10ರಿಂದ 17 ವರ್ಷದೊಳಗಿನ 65 ಮಕ್ಕಳು ಸೇರಿದಂತೆ ಒಟ್ಟು 80 ಮಕ್ಕಳಿಗೆ ಸೋಂಕು ಹರಡಿದೆ.
ಇದೆಲ್ಲದರ ನಡುವೆ ವೀಕೆಂಡ್ ಕರ್ಫ್ಯೂನಿಂದಾಗಿ ಸದಾ ತುಂಬಿ ತುಳುಕುತ್ತಿದ್ದ ಮೈಸೂರು ಅರಮನೆ, ಚಾಮರಾಜೇಂದ್ರ ಮೃಗಾಲಯ ಸೇರಿದಂತೆ ಇತರೆ ಪ್ರವಾಸಿತಾಣಗಳ ಭಣಗುಟ್ಟುತ್ತಾ ವ್ಯಾಪಾರಸ್ಥರು ತೀವ್ರ ಸಂಕಷ್ಟಕ್ಕೆ ಗುರಿಯಾಗಿರುವ ಕಾರಣ ವೀಕೆಂಡ್ ಲಾಕ್ಡೌನ್ ಹಾಗೂ ನೈಟ್ ಕರ್ಫ್ಯೂ ಆದೇಶ ವಾಪಸ್ ಪಡೆಯುವಂತೆ ವ್ಯಾಪಾರಸ್ಥರು ರಾಜ್ಯ ಸರ್ಕಾರವನ್ನು ಆಗ್ರಹಿಸಿದ್ದಾರೆ.