ಕಾರವಾರ: ಇಲ್ಲಿನ ಕಡಲತೀರದಲ್ಲಿ ಮಂಗಳವಾರ ಇಂಡೊ ಫೆಸಿಫಿಕ್ ಹಂಪ್ ಬ್ಯಾಕ್ ಡಾಲ್ಫಿನ್ ನ ಕಳೇಬರ ಪತ್ತೆಯಾಗಿದೆ. ವಿಷಯ ತಿಳಿದು ಘಟನಾ ಸ್ಥಳಕ್ಕೆ ಕಾರವಾರ ವಿಭಾಗದ ಉಪಅರಣ್ಯ ಸಂರಕ್ಷಣಾಧಿಕಾರಿಗಳಾದ ಡಾ. ಪ್ರಶಾಂತ ಕುಮಾರ್ ಕೆ. ರವರ ಸಮಕ್ಷಮ ಮರಣೋತ್ತರ ಪರೀಕ್ಷೆ ನಡೆಸಲಾಯಿತು.
ಮೃತ ಡಾಲ್ಫಿನ್ ಗಂಡಾಗಿದ್ದು, ಸುಮಾರು 7 ರಿಂದ 8 ತಿಂಗಳ ಮರಿಯಾಗಿದೆ. ತಲೆಯ ಒಳಗೆ ಆಂತರಿಕ ಗಾಯ ಕಂಡು ಬಂದಿದ್ದು, ಯಾವುದೋ ಘನವಸ್ತುವಿನ ಘರ್ಷಣೆಯಿಂದ ಸಾವು ಸಂಬವಿಸಿರಬಹುದು ಎಂದು ಅಂದಾಜಿಸಲಾಗಿದೆ. ಡಾಲ್ಫಿನ್‌ಗಳು ವನ್ಯಜೀವಿ ಸಂರಕ್ಷಣಾ ಕಾಯ್ದೆ 1972 ರ ಅನುಭಂದ 1 ರಲ್ಲಿ ಸಂರಕ್ಷಿಸಲ್ಪಟ್ಟ ಜೀವಿ ಪ್ರಭೇದಗಳಾಗಿದ್ದು, ಕಾರವಾರ ಭಾಗದಲ್ಲಿ ಇವುಗಳ ಸಂಖ್ಯೆ ಇತ್ತಿಚಿಗೆ ಹೆಚ್ಚಾಗಿ ಕಂಡು ಬರುತ್ತಿವೆ ಎಂದು ಅರಣ್ಯಾಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಈ ಸಂದರ್ಭದಲ್ಲಿ ಕೋಸ್ಟಲ್ ಮತ್ತು ಮರೈನ್ ನ ವಲಯ ಅರಣ್ಯಾಧಿಕಾರಿಗಳಾದ ಪ್ರಮೋದ ಬಿ., ರೀಪ್ ವಾಚ್ ಕುಂದಾಪುರದ ಡಾ. ತೇಜಸ್ವಿನಿ, ವಿಜ್ಞಾನ ಉಪಕೇಂದ್ರದ ಡಾ. ಸಂಜೀವ ದೇಶಪಾಂಡೆ, ಸಂಶೋಧನಾ ವಿದ್ಯಾರ್ಥಿ ಶಾನ ನವಾಜ್, ಉಪವಲಯ ಅರಣ್ಯಾಧಿಕಾರಿಗಳಾದ ಚಂದ್ರಶೇಖರ ಕಟ್ಟಿಮನಿ, ಅರಣ್ಯ ಪಾಲಕರಾದ ಅರುಣಕುಮಾರ್, ಮಲ್ಲೇಶ, ಹನಮಂತ ಡೊಕ್ಕಣ್ಣನವರ ಇದ್ದರು.
