ಮಂಗಳೂರು: ತಮ್ಮ ದಾಖಲೆ ಪತ್ರಗಳು ಸರಿಯಾಗಿದ್ದಲ್ಲಿ , ಯಾವುದೇ ಅಕ್ರಮ ಚಟುವಟಿಕೆಗಳಲ್ಲಿ ಭಾಗಿಯಾಗಿಲ್ಲದಿದ್ದಲ್ಲಿ ತಾವು ಸುರಕ್ಷಿತರು ಎಂದು ನಗರ ಪೊಲೀಸ್ ಕಮಿಷನರ್ ಎನ್ . ಶಶಿಕುಮಾರ್ ವಿದೇಶಿಯರಿಗೆ ಸೂಚನೆ ನೀಡಿದರು.
ಶಿಕ್ಷಣ , ಉದ್ಯೋಗ ನಿಮಿತ್ತ ಮಂಗಳೂರು ನಗರ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಯಲ್ಲಿ ವಾಸಿಸುತ್ತಿರುವ ವಿದೇಶಿಯರೊಂದಿಗೆ ನಗರದ ರೋಶನಿ ನಿಲಯದ ಸಭಾಂಗಣದಲ್ಲಿ ಸಂವಾದ ನಡೆಸಿದ ಅವರು , ತಮಗೆ ಯಾವುದೇ ರೀತಿ ತೊಂದರೆಯಾದರೆ 112 ಸಂಖ್ಯೆಗೆ ಕರೆ ಮಾಡಿದ್ದಲ್ಲಿ ನೀವು ಕರೆ ಮಾಡಿದ 15 ನಿಮಿಷಗಳೊಳಗಾಗಿ ಪೊಲೀಸರು ನೀವಿದ್ದಲ್ಲಿಗೆ ಬಂದು ನಿಮ್ಮ ಸಮಸ್ಯೆ , ತೊಂದರೆ ಬಗೆಹರಿಸುತ್ತಾರೆ ಎಂದು ವಿದೇಶಿಯರಿಗೆ ಧೈರ್ಯ ತುಂಬಿದರು .
ಶಿಕ್ಷಣ , ಉದ್ಯೋಗ ಕಾರಣದಿಂದ ಸುಮಾರು 50 ದೇಶಗಳ 336 ವಿದೇಶಿ ಪ್ರಜೆಗಳು ಮಂಗಳೂರಿನಲ್ಲಿ ಆಶ್ರಯಿಸಿದ್ದಾರೆ. ಅವರಲ್ಲಿ 210 ಪುರುಷರು, 126 ಮಹಿಳೆಯರು. ಇವರಲ್ಲಿ ಇಬ್ಬರು ಪಾಕಿಸ್ತಾನಿಯರೂ , ಇವರು 2015 ನಿಂದ ಮಂಗಳೂರಿನಲ್ಲಿದ್ದಾರೆ.
ಬಾಂಗ್ಲಾದೇಶ , ಇಥಿಯೋಪಿಯಾ , ಇರಾಕ್ , ಮಲೇಶಿಯಾ , ಫಿಲಿಫೈನ್ಸ್ , ಶ್ರೀಲಂಕಾ , ಯುಎಇ , ಯುಎಸ್ಎ ಮುಂತಾದ ದೇಶಗಳ ಪ್ರಜೆಗಳು ಇಲ್ಲಿ ವಾಸವಾಗಿದ್ದಾರೆ. ತಮ್ಮನ್ನು ಸುರಕ್ಷಿತವಾಗಿ ನೋಡಿಕೊಳ್ಳುವುದು ನಮ್ಮ ಕರ್ತವ್ಯವೂ ಹೌದು .
ಆದ್ದರಿಂದ ತಮಗೇನಾದರೂ ತೊಂದರೆಯಾದಲ್ಲಿ ತಕ್ಷಣ ಮಂಗಳೂರು ಪೊಲೀಸರನ್ನು ಭೇಟಿಯಾದಲ್ಲಿ ನಿಮ್ಮ ಸಮಸ್ಯೆ ಬಗೆಹರಿಸಲಾಗುತ್ತದೆ ಎಂದರು . ಈ ವೇಳೆ ವಿದೇಶಿ ಪ್ರಜೆಗಳು , ವಿದ್ಯಾರ್ಥಿಗಳು ಪೊಲೀಸ್ ಕಮಿಷನರ್ ಅವರೊಂದಿಗೆ ಸಂವಾದ ನಡೆಸಿದರು .