ಬೆಳ್ತಂಗಡಿ : ತಾಲೂಕಿನ ನೇತ್ರಾವತಿ ನದಿಯ ಮುಂಡಾಜೆ ಗ್ರಾಮದ ಕಾಯರ್ತೋಡಿಯಿಂದ ಕಲ್ಮಂಜ ಗ್ರಾಮದ ಪಜಿರಡ್ಕ ತನಕದ ಸುಮಾರು ಮೂರು ಕಿಮೀ. ವ್ಯಾಪ್ತಿಯಲ್ಲಿ ಹತ್ತರಷ್ಟು ನೀರು ನಾಯಿಗಳು ಕಳೆದ ಕೆಲವು ದಿನಗಳಿಂದ ಕಂಡುಬರುತ್ತಿರುವ ಬಗ್ಗೆ ಸ್ಥಳೀಯರು ತಿಳಿಸಿದ್ದಾರೆ.
ಈ ನದಿ ಪ್ರದೇಶದ ಸಮೀಪ ಸುಮಾರು ಹತ್ತು-ಹದಿನೈದು ಮನೆಗಳಿವೆ. ಮಳೆ ಬಿಟ್ಟ ಬಳಿಕ ನದಿ ನೀರು ಇಳಿಕೆಯಾಗುತ್ತಿದೆ. ಬೆಳಿಗ್ಗೆ , ಸಂಜೆ ಹಾಗೂ ರಾತ್ರಿ ಹೊತ್ತಲ್ಲಿ ನದಿ ಪ್ರದೇಶದ ಕಾಯರ್ತೋಡಿ, ಕಜೆ, ಹುಣಿಪಾಜೆ, ಕುಡೆಂಚಿ ಮೊದಲಾದ ಪರಿಸರಗಳಲ್ಲಿ ಸಂಚಾರ ನಡೆಸುತ್ತಿರುವುದನ್ನು ಇಲ್ಲಿನ ಜನರು ಕಂಡಿದ್ದಾರೆ.
ಕಳೆದ ಮೇ ತಿಂಗಳಲ್ಲಿ ಗರ್ಡಾಡಿ ಗ್ರಾಮದ ಕುಬಳ ಬೆಟ್ಟು ಗುತ್ತು ಎಂಬಲ್ಲಿ ಸಂಪತ್ ಕುಮಾರ್ ಎಂಬವರ ಮನೆ ಬಳಿಯ ಫಲ್ಗುಣಿ ನದಿಯ ಸಂಪರ್ಕ ಹಳ್ಳದಲ್ಲಿ ಸುಮಾರು 25ಕ್ಕೂ ಅಧಿಕ ನೀರು ನಾಯಿಗಳು ಕಂಡುಬಂದಿದ್ದವು.
ನಿರುಪದ್ರವಿ ಜೀವಿ
ಮೀನು, ಏಡಿ ಪ್ರಮುಖ ಆಹಾರವಾಗಿರುವ ನೀರು ನಾಯಿಗಳು ನದಿಗಳಲ್ಲಿ ತಿರುಗಾಟ ನಡೆಸುತ್ತವೆ. ಹೆಚ್ಚಾಗಿ ಪೊಟರೆಗಳಲ್ಲಿ ವಾಸಿಸುವ ಇವು ನೀರು ಕಡಿಮೆಯಾಗುತ್ತಿದ್ದಂತೆ ಆ ಪ್ರದೇಶದಿಂದ ನೀರು ಇರುವ ಇನ್ನೊಂದು ಸ್ಥಳದತ್ತ ತೆರಳುತ್ತವೆ. ನೇತ್ರಾವತಿ ನದಿ ಹಾಗೂ ಸಮೀಪದ ಮೃತ್ಯುಂಜಯ ನದಿಗೆ ಹಲವಾರು ಕಿಂಡಿ ಅಣೆಕಟ್ಟುಗಳಿದ್ದು ಆಳವಾದ ನೀರು ಸಂಗ್ರಹಗೊಂಡಿದೆ. ಈ ಕಾರಣದಿಂದಾಗಿ ಅವು ಇಲ್ಲಿ ಕಾಣಿಸುತ್ತಿರುವ ಸಾಧ್ಯತೆ ಇದೆ. ಅತ್ಯಂತ ವೇಗವಾಗಿ ನದಿಯಲ್ಲಿ ಚಲಿಸುವ ಇವು ಕೆಲವೊಮ್ಮೆ ತಲೆಯೆತ್ತಿ ಅತ್ತಿತ್ತ ನೋಡಿ ಕೂಡಲೇ ಮುಳುಗಿ ಮುಂದುವರಿಯುತ್ತವೆ. ನಿರುಪದ್ರವಿ ಜೀವಿಗಳಾಗಿದ್ದು ಮನುಷ್ಯರಿಗೆ ಅಪಾಯ ಉಂಟು ಮಾಡುವುದಿಲ್ಲ ಎಂದು ಅರಣ್ಯ ಇಲಾಖೆ ತಿಳಿಸಿದೆ.
ರಕ್ಷಣೆ ಅಗತ್ಯ
ನದಿಗಳ ಪ್ರದೇಶಗಳಲ್ಲಿ ಸ್ಪೋಟಕಗಳನ್ನು ಸಿಡಿಸಿ, ವಿಷವಿಕ್ಕಿ, ವಿದ್ಯುತ್ ಶಾಕ್ ಇತ್ಯಾದಿ ಅನಧಿಕೃತ ಮಾರ್ಗಗಳ ಮೂಲಕ ಮೀನುಗಳನ್ನು ಹಿಡಿಯಲಾಗುತ್ತದೆ. ಇದರಿಂದ ನೀರು ನಾಯಿಗಳಿಗೆ ಅಪಾಯ ಉಂಟಾಗುವ ಸಾಧ್ಯತೆ ಇದೆ. ಈ ಕಾರಣದಿಂದ ಇವುಗಳ ರಕ್ಷಣೆ ಅಗತ್ಯ.
“ಅಳಿವಿನಂಚಿನಲ್ಲಿರುವ ನೀರು ನಾಯಿಗಳನ್ನು ಕೊಂದರೆ ಅಥವಾ ಹಿಂಸೆ ನೀಡಿ ಅವುಗಳಿಗೆ ಅಪಾಯ ಉಂಟು ಮಾಡಿದರೆ ಅರಣ್ಯ ಕಾಯ್ದೆ ಪ್ರಕಾರ ಅಂಥವರ ಮೇಲೆ ಕಠಿಣ ಕ್ರಮ ಕೈಗೊಳ್ಳಲಾಗುವುದು”
