ಬೆಳ್ತಂಗಡಿ: ರಾಜ್ಯ ವಿಧಾನಸಭಾ ಚುನಾವಣಾ ಕಣ ರಂಗೇರಿದ್ದು ಮತದಾನಕ್ಕೆ ಒಂದು ದಿನ ಬಾಕಿ ಇರುವಾಗ ಬೆಳ್ತಂಗಡಿಯಲ್ಲಿನ ನೆರಿಯದಲ್ಲಿ ಮತದಾರಗಟ್ಟೆ ಹಲವು ವಿಶೇಷತೆಗಳಿಂದ ಜನರನ್ನು ಆಕರ್ಷಿಸುತ್ತಿದೆ.
ತಾಲ್ಲೂಕಿನ 84ನೇ ಸಂಖ್ಯೆಯ ಮತಗಟ್ಟೆಯಾಗಿರುವ ನೆರಿಯ ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆಯ ಮತಗಟ್ಟೆಯನ್ನು ವಿಶೇಷ ಮತಗಟ್ಟೆ ಎಂದು ಪರಿಗಣಿಸಲಾಗಿದ್ದು, ಈಗಾಗಲೇ ಮದುವೆ ಮಂಟಪ ಮಾದರಿಯಲ್ಲಿ ಶಾಲೆಯನ್ನು ಅಲಂಕಾರ ಮಾಡಲಾಗಿದೆ.
ಮುಖ್ಯದ್ವಾರದಲ್ಲಿ ಮತದಾನ ಹಬ್ಬ: 2018 ಎಂದು ನಮೂದಿಸಿ, ದಕ್ಷಿಣ ಕನ್ನಡ ಜಿಲ್ಲೆ, ಬೆಳ್ತಂಗಡಿ ತಾಲ್ಲೂಕಿ ನೆರಿಯ ಮತಗಟ್ಟೆ, ಸರ್ಕಾರಿ ಹಿರಿಯ ಪ್ರಾಥಮಿಕ ಶಾಲೆ ಎಂದು ಬರೆಯಲಾಗಿದೆ.
ಕರಾವಳಿಯ ಶೈಲಿಯಲ್ಲಿ ಶಾಲೆಯನ್ನು ಶೃಂಗಾರಿಸಿ ಶಾಲೆ ಸುತ್ತ ತೋರಣವನ್ನು ಕಟ್ಟಲಾಗಿದೆ.
ಶಾಲೆಯ ಮುಂಬಾಗದಲ್ಲಿ ಮತದಾರರಿಗೆ ಅದ್ಧೂರಿಯಾಗಿ ಸ್ವಾಗತವನ್ನು ಕೋರಿದ್ದಾರೆ. ಇದೊಂದು ವಿಭಿನ್ನ ಪ್ರಯತ್ನವಾಗಿದ್ದು ಹೊಸ ಮತದಾರರನ್ನು ಮತ್ತಷ್ಟು ಆಕರ್ಷಿಸುತ್ತಿದೆ.
