ದುಬೈ: ಜಾಗತಿಕ ತೈಲ ವ್ಯಾಪಾರದ ಆಯಕಟ್ಟಿನ ಪ್ರದೇಶವಾದ ‘ಹಾರ್ಮುಜ್ ಜಲಸಂಧಿ’ಯಲ್ಲಿ ಬುಧವಾರ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದೆ. ಅಪರಿಚಿತ ದಿಕ್ಕಿನಿಂದ ಬಂದ ಕ್ಷಿಪಣಿಯೊಂದು ಸರಕು ನೌಕೆಗೆ ಅಪ್ಪಳಿಸಿದ ಪರಿಣಾಮ ನೌಕೆಯಲ್ಲಿ ಭೀಕರ ಬೆಂಕಿ ಕಾಣಿಸಿಕೊಂಡಿದೆ ಎಂದು ಬ್ರಿಟಿಷ್ ಸೇನೆ ತಿಳಿಸಿದೆ.
ಪರ್ಷಿಯನ್ ಗಲ್ಫ್ನ ಕಿರಿದಾದ ಈ ಜಲಮಾರ್ಗದಲ್ಲಿ ಇರಾನ್ ಸಮುದ್ರ ಬಾಂಬ್ಗಳನ್ನು ಅಳವಡಿಸುತ್ತಿದೆ ಎಂಬ ಶಂಕೆಯ ಮೇಲೆ ಅಮೆರಿಕ ಇತ್ತೀಚೆಗೆ ಕಾರ್ಯಾಚರಣೆ ನಡೆಸಿತ್ತು. ಇದಕ್ಕೆ ಪ್ರತಿಕಾರವಾಗಿ ಇರಾನ್ ಬೆಂಬಲಿತ ಗುಂಪುಗಳು ಈ ದಾಳಿ ನಡೆಸಿರಬಹುದು ಎಂದು ವಿಶ್ಲೇಷಿಸಲಾಗಿದೆ. ಆದರೂ, ಇರಾನ್ ಈವರೆಗೆ ದಾಳಿಯ ಹೊಣೆ ಹೊತ್ತುಕೊಂಡಿಲ್ಲ.
ವಿಶ್ವದ ಒಟ್ಟು ತೈಲ ಮತ್ತು ನೈಸರ್ಗಿಕ ಅನಿಲ ವ್ಯಾಪಾರದ ಐದನೇ ಒಂದು ಭಾಗ ಇದೇ ಹಾರ್ಮುಜ್ ಜಲಸಂಧಿಯ ಮೂಲಕ ಸಾಗುತ್ತದೆ. ಈ ಭಾಗದಲ್ಲಿ ಸತತವಾಗಿ ನೌಕೆಗಳ ಮೇಲೆ ದಾಳಿ ನಡೆಯುತ್ತಿರುವುದು ಜಾಗತಿಕ ಇಂಧನ ಪೂರೈಕೆಯ ಮೇಲೆ ತೀವ್ರ ಪರಿಣಾಮ ಬೀರುವ ಸಾಧ್ಯತೆಯಿದೆ.
ಯುಎಇಯ ರಾಸ್ ಅಲ್-ಖೈಮಾ ಸಮೀಪವೂ ಮತ್ತೊಂದು ನೌಕೆಯ ಮೇಲೆ ದಾಳಿ ನಡೆದಿದೆ ಎಂದು ಬ್ರಿಟಿಷ್ ಸೇನೆಯ ಅಧೀನದಲ್ಲಿರುವ ‘ಯುಕೆಎಂಟಿಒ’ ವರದಿ ಮಾಡಿದೆ. ಸದ್ಯ ಸಮುದ್ರ ಮಾರ್ಗದಲ್ಲಿ ಸಂಚರಿಸುವ ಎಲ್ಲಾ ಹಡಗುಗಳಿಗೆ ಎಚ್ಚರಿಕೆಯಿಂದ ಇರುವಂತೆ ಸೂಚನೆ ನೀಡಲಾಗಿದೆ.