ಅಮೇರಿಕಾ: ಆಲ್‌ ಇಂಡಿಯಾ ತುಳು ಅಸೋಸಿಯೇಷನ್‌ ಆಯೋಜಿಸಿದ ʼಬಲೆ ತುಳು ಪಾತೆರ್ಗಾʼದ 2024ರ ಬ್ಯಾಚ್‌ನ ಉದ್ಘಾಟನೆಯಾಗಿದ್ದು, ವರ್ಚುವಲ್‌ ಆಗಿ ನಡೆದ ಕಾರ್ಯಕ್ರಮದಲ್ಲಿ ಜಗತ್ತಿನಾದ್ಯಂತ ಇರುವ ತುಳು ಕಲಿಕಾ ಆಸಕ್ತರು ಭಾಗವಹಿಸಿದರು. 2023ರ ಮೊದಲ ಬ್ಯಾಚ್‌ನ ಯಶಸ್ವಿ ಮುಕ್ತಾಯದ ನಂತರ ಎರಡನೆ ಬ್ಯಾಚ್‌ ಪ್ರಾರಂಭವಾಗಿದೆ.
ಸಮಾರಂಭದಲ್ಲಿ ತುಳು ಭಾಷೆಯ ಕಲಿಯುವಿಕೆ ಹಾಗು ಉಳಿಸುವಿಕೆಯ ಬಗ್ಗೆ ಚರ್ಚೆಯಾಗಿದ್ದು, ಪುರಾತನ ಭಾಷೆಗಳಲ್ಲಿ ಒಂದಾದ ತುಳುವಿನ ಸಾಂಸ್ಕೃತಿಕ ಮಹತ್ವದ ಬಗ್ಗೆ ಆಹ್ವಾನಿತರು ಮಾತನಾಡಿದರು.
ಈ ಸಂದರ್ಭದಲ್ಲಿ ತುಳು ಭಾಷೆಯ ಇತಿಹಾಸದ ಬಗ್ಗೆ ಮಾತನಾಡಿದ ಮುಂಬೈ ವಿಶ್ವವಿದ್ಯಾನಿಲಯದ ಸಹಾಯಕ ಪ್ರಾಧ್ಯಾಪಕಿ ಡಾ.ಪೂರ್ಣಿಮಾ ಶೆಟ್ಟಿ, ಮಕ್ಕಳಿಗೆ ತುಳು ಕಲಿಸುವಲ್ಲಿ ಪೋಷಕರ ಪಾತ್ರದ ಬಗ್ಗೆ ತಿಳಿಸಿದರು.
AATA ನಿರ್ದೇಶಕ ಮಿಚಿಗನ್‌ ಪ್ರಶಾಂತ್‌ ಕುಮಾರ್ ರಚನೆಯ ತುಳುನಾಡಿನ ಸಂಸ್ಕೃತಿಯನ್ನು ಬಿಂಬಿಸುವ ʼವಾ ಪೋರ್ಲುಯಾʼ ತುಳು ಹಾಡನ್ನು ಪೂರ್ಣಿಮಾ ಶೆಟ್ಟಿ ಬಿಡುಗಡೆ ಮಾಡಿದರು. ಇದನ್ನು ಹಾಡಿದ ವಿಶ್ವೇಶ್‌ ಭಟ್‌ ಸಂಗೀತ ಸಂಯೋಜನೆಯನ್ನೂ ಮಾಡಿದ್ದಾರೆ.
ಬಲೆ ತುಳು ಪಾತೆರ್ಗಾದ ಪಠ್ಯಕ್ರಮ ಹಾಗು ವೇಳಾಪಟ್ಟಿಯ ಬಗ್ಗೆ ಮಾಹಿತಿ ನೀಡಿದ AATAದ ಸಂಸ್ಥಾಪಕ ಅಧ್ಯಕ್ಷ ಭಾಸ್ಕರ್‌ ಶೇರಿಗಾರ್‌, ಭಾಗವಹಿಸಿದ ಪ್ರತಿಯೊಬ್ಬರೂ ತರಗತಿಗಳ ಕೊನೆಯಲ್ಲಿ ತುಳುವಿನಲ್ಲಿ ಸಂಭಾಷಿಸಲು ಸಮರ್ಥರಾಗುವ ಬಗ್ಗೆ ಭರವಸೆ ನೀಡಿದ್ದಾರೆ.
AATA ರಾಯಭಾರಿ ರಿತೇಶ್‌ ಶೆಟ್ಟಿ, ಅಧ್ಯಕ್ಷರಾದ ಶ್ರೀವಳ್ಳಿ ರೈ ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.
