ನ್ಯೂಯಾರ್ಕ್: ಕೇರಳದ ಕೆನ್ ಮ್ಯಾಥ್ಯೂ ಅಮೆರಿಕದ ಟೆಕ್ಸಾಸ್ ರಾಜ್ಯದ ಸ್ಟಾಫರ್ಡ್ ಮೇಯರ್ ಆಗಿ ಪ್ರಮಾಣ ವಚನ ಸ್ವೀಕರಿಸಿದ ಮೊದಲ ಭಾರತೀಯ-ಅಮೆರಿಕನ್ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಸ್ಟಾಫರ್ಡ್ ಸಿಟಿ ಕೌನ್ಸಿಲ್ನ ಮಾಜಿ ಸದಸ್ಯ ಮ್ಯಾಥ್ಯೂ, ಈ ತಿಂಗಳು ನಡೆದ ಚುನಾವಣೆಯಲ್ಲಿ ಹಾಲಿ ಮೇಯರ್ ಸೆಸಿಲ್ ವಿಲ್ಲೀಸ್ ಅವರನ್ನು 16 ಮತಗಳ ಅಂತರದಿಂದ ಸೋಲಿಸಿದ್ದಾರೆ ಎಂದು ಫೋರ್ಟ್ ಬೆಂಡ್ ಸ್ಟಾರ್ ವರದಿ ಮಾಡಿದೆ. ಮಿಸೌರಿ ನಗರದ ಮೇಯರ್ ರಾಬಿನ್ ಎಲಕಾಟ್ ಅವರು ಭಾರತೀಯ-ಅಮೆರಿಕನ್ ಆಗಿದ್ದು, ಅವರ ಕುಟುಂಬ ಸದಸ್ಯರು ಮತ್ತು ಉನ್ನತ ಅಧಿಕಾರಿಗಳು ಭಾಗವಹಿಸಿದ್ದ ವಿಶೇಷ ಕಾರ್ಯಕ್ರಮದಲ್ಲಿ ಕೆನ್ ಮ್ಯಾಥ್ಯೂ ಅವರಿಗೆ ಪ್ರಮಾಣ ವಚನ ಬೋಧಿಸಿದರು.
ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದ ಅಮೆರಿಕದ ಫೋರ್ಟ್ ಬೆಂಡ್ ಕೌಂಟಿ ನ್ಯಾಯಾಧೀಶ ಕೆ.ಪಿ.ಜಾರ್ಜ್, ‘ಸ್ಟಾಫರ್ಡ್ ಮೇಯರ್ ಆಗಿ ಆಯ್ಕೆಯಾದ ಕೆನ್ ಮ್ಯಾಥ್ಯೂ ಅವರಿಗೆ ಅಭಿನಂದನೆಗಳು. ಇಂದು ಸಂಜೆ ಅವರ ಪ್ರಮಾಣ ವಚನ ಸ್ವೀಕಾರ ಸಮಾರಂಭದಲ್ಲಿ ಭಾಗವಹಿಸಲು ಸಂತೋಷವಾಗಿದೆ. ಅವರ ಈ ಪ್ರಮುಖ ಹುದ್ದೆಗೆ ಅಭಿನಂದನೆಗಳು ಎಂದು ಬರೆದುಕೊಂಡಿದ್ದಾರೆ.
ಟೆಕ್ಸಾಸ್ ಪ್ರತಿನಿಧಿಗಳಾದ ರಾನ್ ರೆನಾಲ್ಡ್ಸ್ ಮತ್ತು ಸುಲೇಮಾನ್ ಲುಲಾನಿ ಮತ್ತು ಮಿಸ್ಸೌರಿ ನಗರದ ಮಾಜಿ ಮೇಯರ್ ಓವನ್ ಅಲೆನ್ ಕೂಡ ಈ ಸಂದರ್ಭದಲ್ಲಿ ಹಾಜರಿದ್ದರು. ವಿದ್ಯುನ್ಮಾನ ಮತ್ತು ಮಾಹಿತಿ ತಂತ್ರಜ್ಞಾನ ರಾಜ್ಯ ಸಚಿವ ರಾಜೀವ್ ಚಂದ್ರಶೇಖರ್ ಕೂಡ ಮ್ಯಾಥ್ಯೂ ಅವರನ್ನು ಟ್ವೀಟ್ ಮೂಲಕ ಅಭಿನಂದಿಸಿದ್ದಾರೆ.