ಹೊಸದಿಲ್ಲಿ: ಬಾಲಿವುಡ್ ನಟ ಆಮಿರ್ ಖಾನ್ ಮತ್ತು ಅವರ ಪತ್ನಿ ಕಿರಣ್ ರಾವ್ ವಿಚ್ಛೇದನಕ್ಕೆ ನಿರ್ಧರಿಸಿದ್ದಾರೆ. ಇಬ್ಬರೂ ಪರಸ್ಪರ ದೂರವಾಗುತ್ತಿರುವುದಾಗಿ ಶನಿವಾರ ಬೆಳಿಗ್ಗೆ ಘೋಷಿಸಿಕೊಂಡಿದ್ದಾರೆ. 15 ವರ್ಷಗಳ ದಾಂಪತ್ಯ ಜೀವನವನ್ನು ಕೊನೆಗಾಣಿಸಲು ಇಬ್ಬರೂ ನಿರ್ಧರಿಸಿದ್ದಾರೆ. 2005ರಲ್ಲಿ ಆಮಿರ್ ಖಾನ್ ಮತ್ತು ಕಿರಣ್ ರಾವ್ ವಿವಾಹವಾಗಿದ್ದರು.
ಕಿರಣ್ ರಾವ್ ಅವರನ್ನು ವಿವಾಹವಾಗುವ ಮೊದಲು ಆಮಿರ್ ಖಾನ್ ರೀನಾ ದತ್ತಾರನ್ನು ಮದುವೆಯಾಗಿದ್ದರು. ಆಮಿರ್-ರೀನಾ ದಂಪತಿಗೆ ಮಗಳು ಐರಾ ಖಾನ್ ಮತ್ತು ಮಗ ಜುನೈದ್ ಇದ್ದಾರೆ. ನಂತರ ʻಲಗಾನ್ʼ ಸಿನಿಮಾ ಚಿತ್ರೀಕರಣದ ವೇಳೆ ನಟ ಅಮಿರ್ ಖಾನ್ ಅವರು ಸಹ ನಿರ್ದೇಶಕಿಯಾಗಿದ್ದ ಕಿರಣ್ ರಾವ್ ಅವರನ್ನು ಭೇಟಿಯಾಗಿದ್ದರು. ಇವರಿಗೆ ʻಆಜಾದ್ʼ ಹೆಸರಿನ ಮಗನಿದ್ದಾನೆ.
‘ಕಳೆದ ಸುಂದರವಾದ 15 ವರ್ಷಗಳನ್ನು ನಾವಿಬ್ಬರು ಜೊತೆಯಾಗಿ ಕಳೆದಿದ್ದೇವೆ. ಜೀವನದ ಅನುಭಗಳು, ಸುಖ-ದುಃಖ, ಸಂತೋಷಗಳನ್ನು ಹಂಚಿಕೊಂಡಿದ್ದೇವೆ. ನಮ್ಮಿಬ್ಬರ ಸಂಬಂಧವು ಬೆಳೆದಿದ್ದೇ ಪರಸ್ಪರ ನಂಬಿಕೆ ಮತ್ತು ಪ್ರೀತಿಯಿಂದ. ಇದೀಗ ಇಬ್ಬರೂ ಹೊಸ ಜೀವನವನ್ನು ಆರಂಭಿಸಲು ನಿರ್ಧರಿಸಿದ್ದೇವೆ. ಪತಿ-ಪತ್ನಿಯಾಗಿ ಉಳಿಯದೆ, ಮಗ ಆಜಾದ್ನ ತಂದೆ-ತಾಯಿಯಾಗಷ್ಟೇ ಉಳಿಯಲಿದ್ದೇವೆ. ಸ್ವಲ್ಪ ದಿನಗಳ ಹಿಂದೆಯೇ ಪರಸ್ಪರ ದೂರವಾಗುವ ಬಗ್ಗೆ ಆಲೋಚನೆ ಮಾಡಿದ್ದೆವು. ಇದೀಗ ದೂರವಾಗಲು ಸಕಾಲವೆಂದೆನಿಸಿತು. ನಾವಿಬ್ಬರೂ ಮುಂದೆ ಕುಟುಂಬದ ಸದಸ್ಯರಾಗೇ ಇರಲಿದ್ದೇವೆ’ ಎಂದು ಜಂಟಿ ಹೇಳಿಕೆಯಲ್ಲಿ ಆಮಿರ್ ಮತ್ತು ಕಿರಣ್ ರಾವ್ ತಿಳಿಸಿದ್ದಾರೆ.
ಬಾಲಿವುಡ್ ನಟ ಅಮಿರ್ ಖಾನ್-ಕಿರಣ್ ರಾವ್ ದಂಪತಿ ವಿಚ್ಛೇದನ!
Photo Credit :
ಹನಿ ಹನಿ ಕೂಡಿ ಹಳ್ಳ
ನ್ಯೂಸ್ಕನ್ನಡ.ಕಾಂ ಇದರ ಗುಣಮಟ್ಟದ, ಸ್ವತಂತ್ರ ಪತ್ರಿಕೋದ್ಯಮವನ್ನು ನಿಮ್ಮ ದೇಣಿಗೆಯ ಮೂಲಕ ಪ್ರೋತ್ಸಾಹಿಸಿ.