ಫ್ರೆಂಚ್ ರಸಾಯನಶಾಸ್ತ್ರಜ್ಞ ಮತ್ತು ಮೈಕ್ರೋಬಯಾಲಜಿಸ್ಟ್ ಲೂಯಿಸ್ ಪಾಶ್ಚರ್ ಜುಲೈ 6, 1885 ರಂದು ರೇಬೀಸ್ ವೈರಸ್ ವಿರುದ್ಧ ಮೊದಲ ಲಸಿಕೆಯನ್ನು ಯಶಸ್ವಿಯಾಗಿ ಅಭಿವೃದ್ಧಿಪಡಿಸಿದರು. ರೇಬೀಸ್ ವೈರಸ್ ಒಂದು ಝೂನೋಟಿಕ್ ಕಾಯಿಲೆಯಾಗಿದ್ದು, ಪ್ರಭೇದಗಳ ಮೂಲಕ ಹರಡುತ್ತದೆ. ಝೂನೋಟಿಕ್ ಕಾಯಿಲೆಯ ವಿರುದ್ಧ ಮೊದಲ ಬಾರಿಗೆ ಲಸಿಕೆ ಹಾಕಿದ ನೆನಪಿಗಾಗಿ ಪ್ರತಿ ವರ್ಷ ಜುಲೈ 6 ಅನ್ನು ವಿಶ್ವದಾದ್ಯಂತ ವಿಶ್ವ ಝೂನೋಸಸ್ ದಿನವನ್ನಾಗಿ ಆಚರಿಸಲಾಗುತ್ತದೆ.
ಪ್ರಾಣಿಗಳಿಂದ ವೈರಸ್ ಮೂಲಕ ಮಾನವನ ದೇಹಕ್ಕೆ ರೋಗ ಹರಡುವುದನ್ನು ಝೂನೋಸಸ್ ಎಂದು ಕರೆಯಲಾಗುತ್ತದೆ. ವೈರಸ್ ಮತ್ತು ಬ್ಯಾಕ್ಟೀರಿಯ ಮೂಲಕ ಹರಡುವ ಶೇ. 75% ರಷ್ಟು ಕಾಯಿಲೆಗಳು ಪ್ರಾಣಿಗಳಿಂದ ಬರುತ್ತವೆ ಎಂದು ತಜ್ಞರು ಹೇಳಿದ್ದಾರೆ. ಸಾಕು ಪ್ರಾಣಿಗಳು, ಮಾಂಸ, ಬೇಟೆ ಮತ್ತು ಸೋಂಕು ಇರುವ ಪ್ರಾಣಿ ಪಕ್ಷಿಗಳ ಜತೆಗಿನ ಒಡನಾಟದಿಂದಲೂ ವೈರಸ್ ಸುಲಭದಲ್ಲಿ ಹರಡಿ ಮಾನವನ ದೇಹ ಪ್ರವೇಶಿಸುತ್ತದೆ.
ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ‘ಝೂನೊಟಿಕ್ ರೋಗಕಾರಕಗಳು ಬ್ಯಾಕ್ಟೀರಿಯಾ, ವೈರಲ್ ಅಥವಾ ಪರಾವಲಂಬಿಯಾಗಿರಬಹುದು, ಅಥವಾ ನೇರ ಸಂಪರ್ಕದ ಮೂಲಕ, ಆಹಾರ, ನೀರು ಅಥವಾ ಪರಿಸರದ ಮೂಲಕ ಮಾನವರಿಗೆ ಹರಡಬಹುದು. ಆಹಾರ ಮತ್ತು ಇತರ ಬಳಕೆಗಳಿಗಾಗಿ ಪ್ರಾಣಿ ಉತ್ಪನ್ನಗಳ ಉತ್ಪಾದನೆ ಮತ್ತು ವ್ಯಾಪಾರದಲ್ಲಿ ಝೂನೋಸಸ್ ಅಡೆತಡೆಗಳನ್ನು ಉಂಟುಮಾಡಬಹುದು ಎಂದಿದೆ.
ವಿಶ್ವ ಝೂನೋಸಸ್ ದಿನದ ಮಹತ್ವ:
ಝೂನೋಟಿಕ್ ರೋಗಗಳ ಹೆಚ್ಚುತ್ತಿರುವ ಕಾರಣದಿಂದಾಗಿ, ಅದರ ಬಗ್ಗೆ ಜಾಗೃತಿಯನ್ನು ಹೆಚ್ಚಿಸುವುದು ಅಗತ್ಯವಾಗಿದೆ. ಈ ರೋಗಗಳ ಕಾರಣಗಳು ಮತ್ತು ಅದನ್ನು ತಡೆಗಟ್ಟುವ ಕ್ರಮಗಳ ಕುರಿತು ಪ್ರಪಂಚದಾದ್ಯಂತ ಹಲವು ಕಾರ್ಯಕ್ರಮಗಳನ್ನು ಸರ್ಕಾರ, ಸಂಘ ಸಂಸ್ಥೆಗಳು ಆಯೋಜಿಸಿವೆ. ಮತ್ತು ಮನುಷ್ಯರು ಹಾಗೂ ಪ್ರಾಣಿಗಳ ಆರೋಗ್ಯವನ್ನು ಉತ್ತಮ ಮತ್ತು ಸುರಕ್ಷಿತವಾಗಿಸಲು ಜಾಗೃತಿಯನ್ನು ಮೂಡಿಸಲಾಗುತ್ತಿದೆ.
2023 ರ ವಿಶ್ವ ಝೂನೋಸಸ್ ದಿನದ ಥೀಮ್:
ಈ ವರ್ಷ ವಿಶ್ವ ಝೂನೋಸಸ್ ದಿನದ ವಿಷಯವೆಂದರೆ ‘ಒಂದು ಜಗತ್ತು, ಒಂದು ಆರೋಗ್ಯ: ಝೂನೋಸಸ್ ನ್ನು ತಡೆಯಿರಿ, ಅದರ ಹರಡುವಿಕೆಯನ್ನು ನಿಲ್ಲಿಸಿ, ಪ್ರಾಣಿ ಸಂಕುಲವನ್ನು ರಕ್ಷಿಸಿ’ಎಂಬುದಾಗಿದೆ.
