ಮೈಸೂರು: ಮೈಸೂರಿನ ಚಾಮರಾಜೇಂದ್ರ ಮೃಗಾಲಯಕ್ಕೆ ಮೂವರು ಹೊಸ ಅತಿಥಿಗಳು ಬಂದಿದ್ದಾರೆ.ಅಂದರೆ ಬಿಳಿ ಹುಲಿ ತಾರಾ ಮೂರು ಮರಿಗಳಿಗೆ ಜನ್ಮ ನೀಡಿದೆ.
ಕಳೆದ ಏ.26ರಂದು 8 ವರ್ಷದ ತಾರಾ ಹೆಸರಿನ ಹುಲಿ ಹಾಗೂ 4 ವರ್ಷದ ರಾಕಿ ಹೆಸರಿನ ಗಂಡು ಹುಲಿಗೆ ಈ ಮೂರು ಮರಿಗಳು ಜನಿಸಿದ್ದು ತಾಯಿ ತನ್ನ ಮರಿಗಳೊಂದಿಗೆ ಆರೋಗ್ಯವಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಅತಿ ಹೆಚ್ಚು ಹುಲಿಗಳನ್ನು ಹೊಂದಿರುವ ಮೈಸೂರು ಚಾಮರಾಜೇಂದ್ರ ಮೃಗಾಲಯದಲ್ಲಿ 9 ಗಂಡು ಹುಲಿ, 7 ಹೆಣ್ಣು ಹುಲಿ ಸೇರಿದಂತೆ ಒಟ್ಟು 16 ಹುಲಿಗಳು ವಾಸಿಸುತ್ತಿವೆ. ಈಗ ಹೊಸದಾಗಿ ಮೂರು ಮರಿಗಳು ಜನಿಸಿರುವುದರಿಂದ ಹುಲಿಗಳ ಸಂಖ್ಯೆ 19ಕ್ಕೆ ಏರಿದಂತಾಗಿದೆ.
ಕರ್ನಾಟಕ ಮೃಗಾಲಯ ಪ್ರಾಧಿಕಾರದ ಅಧಕ್ಷ ಎಲ್.ಆರ್.ಮಹದೇವಸ್ವಾಮಿ ಮಾತನಾಡಿ ರಾಜ್ಯದಲ್ಲೇ ಅತಿ ಹೆಚ್ಚು ಹುಲಿಗಳನ್ನು ಮೈಸೂರು ಮೃಗಾಲಯ ಹೊಂದಿದೆ. ಈಗ ಮೂರು ಮರಿಗಳು ಜನಿಸಿರುವುದರಿಂದ ಪ್ರವಾಸಿಗರನ್ನು ಹೆಚ್ಚು ಆಕರ್ಷಿಸಲಿವೆ. ಜತೆಗೆ ಪ್ರಾಣಿ ವಿನಿಮಯ ಯೋಜನೆಯಡಿ ಹುಲಿಗಳನ್ನು ನೀಡಿ ಬೇರೆ ಪ್ರಾಣಿಗಳನ್ನು ಈ ಮೃಗಾಲಯಕ್ಕೆ ತರಲು ಅನುಕೂಲವಾಗಿದೆ ಎಂದು ತಿಳಿಸಿದ್ದಾರೆ.
ಒಟ್ಟಾರೆ ಮೃಗಾಲಯಕ್ಕೆ ಹೊಸ ಅತಿಥಿಗಳು ಬಂದಿದ್ದು, ಇವುಗಳ ಚೆನ್ನಾಟ ಮುಂದಿನ ದಿನಗಳಲ್ಲಿ ಮೃಗಾಲಯಕ್ಕೆ ತೆರಳುವವರಿಗೆ ಲಭ್ಯವಾಗಲಿದೆ.