ಯೋಗದ ಅಭ್ಯಾಸಗಳನ್ನು ಚೆನ್ನಾಗಿ ಗಾಳಿ ಇರುವ ಕೋಣೆಯಲ್ಲಿ ಮಾಡಬೇಕು, ಯೋಗ ಮ್ಯಾಟ್ ಹಾಸಿಕೊಳ್ಳಲು ಮರೆಯದಿರಿ.ಬಾಯಿ, ಮುಖವನ್ನು ತೊಳೆದುಕೊಂಡು ಯೋಗ ಮಾಡುವುದು ಒಳ್ಳೆಯದು. ಅದೂ ಅಲ್ಲದೆ ಯೋಗಾಭ್ಯಾಸವಾದ ತಕ್ಷಣ ಸ್ನಾನ ಮಾಡುವುದು ಒಳ್ಳೆಯದಲ್ಲ.
ಯೋಗಾಭ್ಯಾಸಗಳನ್ನು ಖಾಲಿ ಹೊಟ್ಟೆಯಲ್ಲಿ ಮಾಡಬೇಕು. ಯಾವುದೇ ದ್ರವವನ್ನು ಸೇವಿಸಿದ ನಂತರ, ಅಭ್ಯಾಸವನ್ನು ಪ್ರಾರಂಭಿಸುವ ಮೊದಲು ಅರ್ಧ ಘಂಟೆಯವರೆಗೆ ಕಾಯಿರಿ. ಲಘು ಆಹಾರವನ್ನು ತೆಗೆದುಕೊಂಡರೆ, 1-2 ಗಂಟೆಗಳ ಕಾಲ ಕಾಯಿರಿ. ಪೂರ್ಣ ಊಟವನ್ನು ತೆಗೆದುಕೊಂಡರೆ, 3-4 ಗಂಟೆಗಳ ಕಾಲ ನಂತರ ಯೋಗಾಭ್ಯಾಸ ಮಾಡಿ.
ಯೋಗಾಭ್ಯಾಸವನ್ನು ಪ್ರಾರಂಭಿಸಲು ಸೂಕ್ತವಾದ ಮಾರ್ಗವೆಂದರೆ ನೆಲದ ಮೇಲೆ ಮ್ಯಾಟ್ನ್ನು ಹರಡಿ, ಬೆಳಿಗ್ಗೆ ಪೂರ್ವ ಅಥವಾ ಉತ್ತರಕ್ಕೆ ಮತ್ತು ಸಂಜೆ ಪಶ್ಚಿಮ ಅಥವಾ ಉತ್ತರಕ್ಕೆ ಎದುರಾಗಿ ಯೋಗವನ್ನು ಮಾಡಬೇಕು.
ಯೋಗದಲ್ಲಿ ಪ್ರಾಣಾಯಾಮ ಅತಿ ಮುಖ್ಯವಾಗಿರಬೇಕು. ಅದೇ ರೀತಿ ಆದಷ್ಟು ಸಡಿಲವಾದ ಬಟ್ಟೆಗಳನ್ನು ಧರಿಸಿದರೆ ಒಳ್ಳೆಯದು.
ಯೋಗ ಮಾಡುವಾಗ ಮುಖ್ಯವಾಗಿ ಉಸಿರಾಟದೆಡೆಗೆ ಗಮನವಹಿಸಬೇಕು. ದೇಹದ ಚಲನೆಯ ಜೊತೆಗೆ ಉಸಿರಿನೆಡೆಗೆ ಗಮನ ನೀಡಿದಾಗ ಪೂರ್ತಿ ದೇಹದೆಡೆಗೆ ಲಕ್ಷ್ಯ ನೀಡಿದಂತಾಗುತ್ತದೆ. ಹಾಗೆಂದು ದೈಹಿಕ ಚಲನೆಯನ್ನು ನಿಲ್ಲಿಸಬೇಡಿ. ಎರಡನ್ನೂ ಬ್ಯಾಲೆನ್ಸ್ ಮಾಡಿ. ದೀರ್ಘವಾದ ಉಸಿರಾಟ ಯೋಗಕ್ಕೆ ಮುಖ್ಯವಾಗಿದೆ.
ಯೋಗಾಸನ ಮಾಡುವಾಗ ಒಂದು ಭಂಗಿಯಿಂದ ಇನ್ನೊಂದು ಭಂಗಿಗೆ ಮುಂದುವರೆಯುವ ಬಗ್ಗೆ ತಿಳಿದಿರಬೇಕು. ಅದೇ ರೀತಿ ಒಂದು ದಿನ ಹೆಚ್ಚು ಹೊತ್ತು, ಇನ್ನೊಂದು ದಿನ ಕಡಿಮೆ ಸಮಯ ಯೋಗಾಸನ ಮಾಡುವುದು ಒಳ್ಳೆಯದಲ್ಲ.
ಪ್ರತೀ ಆಸನವನ್ನು ಮಾಡಿ ಮುಗಿಸಿದ ಬಳಿಕ ಕೊಂಚ ವಿಶ್ರಾಂತಿ ತೆಗೆದುಕೊಂಡು ಮುಂದಿನ ಆಸನಕ್ಕೆ ತೆರಳಿ. ಇದರಿಂದ ದೇಹಕ್ಕೆ ಹೆಚ್ಚು ಶ್ರಮವಾಗುವುದಿಲ್ಲ