ಹಲವು ರೀತಿಯ ಪಲಾವ್ ಗಳನ್ನು ಮಾಡಿದವರು ಬೇಬಿ ಕಾರ್ನ್ ಪಲಾವ್ ಮಾಡಲು ಪ್ರಯತ್ನ ಪಡಬಹುದಾಗಿದೆ. ವಿಭಿನ್ನ ರುಚಿಯ ಈ ಪಲಾವ್ ಖುಷಿಕೊಡಬಹುದು.
ಬೇಕಾಗುವ ಪದಾರ್ಥಗಳು: ಎಣ್ಣೆ- ಸ್ವಲ್ಪ, ಬಾಸುಮತಿ ಅಕ್ಕಿ- 1ಕಪ್, ಈರುಳ್ಳಿ-2, ಬೇಬಿಕಾರ್ನ್ -6, ಬಟಾಣಿ-1ಚಿಕ್ಕ ಕಪ್, ಮೆಣಸಿನ ಕಾಯಿ- 5, ಖಾರದಪುಡಿ-1ಚಮಚ, ಬೆಳ್ಳುಳ್ಳಿ ಶುಂಠಿಪೇಸ್ಟ್- 1ಚಮಚ, ಚಕ್ಕೆ-1, ಲವಂಗ-3, ಏಲಕ್ಕಿ ಪುಡಿ- ಚಿಟಿಕೆ, ಪಲಾವ್ ಎಲೆ- ಸ್ವಲ್ಪ, ದನಿಯಾಪುಡಿ- 1ಚಮಚ, ಜೀರಿಗೆಪುಡಿ-1ಚಮಚ, ಗರಂಮಸಾಲೆ-1ಚಮಚ, ಪುದಿನಾ- ಸ್ವಲ್ಪ, ಕೊತ್ತಂಬರಿ- ಸ್ವಲ್ಪ,
ತಯಾರಿ ಮಾಡುವ ವಿಧಾನ: ಮೊದಲಿಗೆ ಅಕ್ಕಿಯನ್ನು ತೊಳೆದಿಟ್ಟುಕೊಳ್ಳಿ. ಈರುಳ್ಳಿಯನ್ನು ಉದ್ದುದ್ದವಾಗಿ ಕತ್ತರಿಸಿಕೊಳ್ಳಿ. ಆ ನಂತರ ಬಾಣಲೆಯಲ್ಲಿ ಎಣ್ಣೆ ಹಾಕಿ ಅದರಲ್ಲಿ ಬೇಬಿ ಕಾರ್ನ್ ಕೆಂಪಗೆಯಾಗುವರೆಗೆ ಹುರಿದು ಬಳಿಕ ಬೇರೆ ಪಾತ್ರೆಯಲ್ಲಿ ಹಾಕಿಟ್ಟುಕೊಳ್ಳಿ.
ಕುಕ್ಕರ್ನಲ್ಲಿ ಎಣ್ಣೆ ಹಾಕಿ ಅದರಲ್ಲಿ ಈರುಳ್ಳಿ ಹಾಕಿ ಕೆಂಬಣ್ಣ ಬರುವ ತನಕ ಹುರಿಯಿರಿ ಅದಕ್ಕೆ ಬೆಳ್ಳುಳ್ಳಿ ಶುಂಠಿಪೇಸ್ಟ್, ಹಸಿ ಮೆಣಸಿನಕಾಯಿ, ಬಟಾಣಿ ಹಾಕಿ ಹುರಿಯಿರಿ, ಬಳಿಕ ಖಾರದ ಪುಡಿ, ಜೀರಿಗೆಪುಡಿ, ಗರಂಮಸಾಲೆ, ದನಿಯಾ ಪುಡಿಗಳನ್ನು ಹಾಕಬೇಕು. ನಂತರ ಬೇಬಿಕಾರ್ನ್ ಹಾಗೂ ಅಕ್ಕಿಯನ್ನು ಹಾಕಿ ಅಗತ್ಯವಿದ್ದಷ್ಟು ನೀರು ಹಾಕಿ ಎರಡು ವಿಶಲ್ ಬೇಯಿಸಿ. ಇದಾದ ಬಳಿಕ ಚೆನ್ನಾಗಿ ಮಿಕ್ಸ್ ಮಾಡಿ ಅದರ ಮೇಲೆ ಚಿಕ್ಕದಾಗಿ ಕತ್ತರಿಸಿದ ಪುದಿನಾ ಮತ್ತು ಕೊತ್ತಂಬರಿ ಸೊಪ್ಪನ್ನು ಉದುರಿಸಿ ಬಿಡಿ. ಸೇವಿಸಲು ಬೇಬಿ ಕಾರ್ನ್ ಪಲಾವ್ ರೆಡಿ.