ಮನೆಯಲ್ಲಿ ಸುಲಭವಾಗಿ ಮಾಡಿ ಪಾಲಕ್ ಕಾಬೂಲ್ ಮಸಾಲ

ಪಾಲಕ್ ನಿಂದ ತಯಾರಿಸಲ್ಪಡುವ ಪದಾರ್ಥಗಳನ್ನು ಚಪಾತಿ, ರೋಟಿ ಜತೆಗೆ ಸೇವಿಸಲು ಮಜಾ ಕೊಡುತ್ತದೆ. ಅದರಲ್ಲೂ ಕಾಬೂಲ್ ಮಸಾಲ ಇನ್ನಷ್ಟು ರುಚಿಯಾಗಿರುತ್ತದೆ.

ಬೇಕಾಗುವ ಪದಾರ್ಥಗಳು: ಪಾಲಕ್ ಸೊಪ್ಪು- 2ಕಟ್ಟು, ಕಾಬೂಲ್- 2ಕಪ್, ಈರುಳ್ಳಿ- 2, ಟೊಮ್ಯಾಟೋ-  2, ಉಪ್ಪು- ರುಚಿಗೆ ತಕ್ಕಂತೆ, ಕಾರದಪುಡಿ- 1ಚಮಚ, ಒಣಮೆಣಸು-2, ಅರಶಿನಪುಡಿ- ಸ್ವಲ್ಪ, ಗರಂಮಸಾಲ- ಅರ್ಧ ಚಮಚ, ಶುಂಠಿ-ಬೆಳ್ಳುಳ್ಳಿ ಪೇಸ್ಟ್- 1ಚಮಚ, ಎಣ್ಣೆ- ಸ್ವಲ್ಪ.

ತಯಾರಿಸುವುದು ಹೇಗೆ?:  ಕಾಬೂಲನ್ನು ಸುಮಾರು ಐದಾರು ಗಂಟೆಗಳ ಕಾಲ ನೀರಿನಲ್ಲಿ ನೆನೆಹಾಕಿ. ಆ ನಂತರ ಅದನ್ನು ಚೆನ್ನಾಗಿ ಬೇಯಿಸಿಟ್ಟುಕೊಳ್ಳಿ. ಇನ್ನೊಂದೆಡೆ ಪಾಲಕ್ ಸೊಪ್ಪನ್ನು ಹಚ್ಚಿಟ್ಟುಕೊಂಡು ಅದನ್ನು ಕುಕ್ಕರ್‌ ನಲ್ಲಿ ಸ್ವಲ್ಪ ನೀರು ಹಾಕಿ ಒಂದು ವಿಶಲ್ ನಷ್ಟು ಕೂಗಿಸಿ ಇಳಿಸಿಟ್ಟು ಬಳಿಕ ಅದನ್ನು ಮಿಕ್ಸಿಯಲ್ಲಿ ಪೇಸ್ಟ್ ಮಾಡಿಕೊಳ್ಳಬೇಕು. ಇನ್ನೊಂದೆಡೆ ಈರುಳ್ಳಿ ಹಾಗೂ ಟೊಮ್ಯಾಟೋವನ್ನು ಹಚ್ಚಿಟ್ಟುಕೊಳ್ಳಬೇಕು.

ಆ ನಂತರ ಸ್ವೌವ್ ಮೇಲೆ ಪಾತ್ರೆಯಿಟ್ಟು ಅದಕ್ಕೆ ಎಣ್ಣೆ ಹಾಕಿ. ಅದು ಕಾದ ಬಳಿಕ ಹಚ್ಚಿಟ್ಟ ಈರುಳ್ಳಿ ಹಾಕಿ ಚೆನ್ನಾಗಿ  ಹುರಿಯಬೇಕು. ಅದು ಬೆಂದು ಕಂದು ಬಣ್ಣಕ್ಕೆ ಬರುತ್ತಿದ್ದಂತೆಯೇ ಟೊಮ್ಯಾಟೋ ಹಾಕಿ ಎರಡನ್ನು ಮಿಶ್ರ ಮಾಡಿ ಆ ನಂತರ ಅದಕ್ಕೆ ಪಾಲಕ್ ಪೇಸ್ಟ್, ಶುಂಠಿ, ಬೆಳ್ಳುಳ್ಳಿ ಪೇಸ್ಟ್ ಸೇರಿಸಿ ಚೆನ್ನಾಗಿ ಹುರಿಯಬೇಕು. ಆ ನಂತರ ಕಾರದ ಪುಡಿ, ಗರಂಮಸಾಲ, ಉಪ್ಪು, ಅರಿಶಿನಪುಡಿ, ಒಣಮೆಣಸು ಹಾಕಿ ಎಲ್ಲವನ್ನು ಸೇರಿಸಿ ಅಗತ್ಯವಿದ್ದರೆ ಸ್ವಲ್ಪ ನೀರು ಸೇರಿಸಿ ಕುದಿಸಿ ಆ ನಂತರ ಅದಕ್ಕೆ ಮೊದಲೇ ಬೇಯಿಸಿಟ್ಟ ಕಾಬೂಲ್‌ನ್ನು ಸೇರಿಸಿ ಚೆನ್ನಾಗಿ ಮಿಶ್ರ ಮಾಡಿದರೆ ಪಾಲಕ್ ಕಾಬೂಲ್ ಮಸಾಲ ರೆಡಿ.