ಬ್ರೆಸಿಲಿಯಾ: ಸ್ವತಃ ತಾಯಿಯೇ ಮಗಳನ್ನು ಕೊಂದು ಆಕೆಯ ದೇಹವನ್ನು ತುಂಡು ತುಂಡಾಗಿ ಕತ್ತರಿಸಿ ಫ್ರಿಜ್‌ನಲ್ಲಿ ಒಂದು ತಿಂಗಳ ಕಾಲ ಇರಿಸಿದ ಘಟನೆ ಬ್ರೆಜಿಲ್‌ನ ಸಾವೊ ಪಾಲೊದಲ್ಲಿ ನಡೆದಿದೆ.
ಸ್ಥಳೀಯ ಸುದ್ದಿವಾಹಿನಿ ಜಿ1 ಪ್ರಕಾರ, 30 ವರ್ಷದ ರುತ್ ಫ್ಲೋರಿಯಾನೊ ಎಂಬ ಮಹಿಳೆ ತನ್ನ ಒಂಬತ್ತು ವರ್ಷದ ಮಗುವನ್ನು ಆಗಸ್ಟ್‌ 8, 9ರ ನಡುವೆ ಕೊಂದಿದ್ದು, ಮೂರು ವಾರಗಳ ಕಾಲ ಫ್ರಿಜ್‌ನಲ್ಲಿ ಇರಿಸಿದ್ದಳು. ಸದ್ಯ ಆಕೆಯನ್ನು ಪೊಲೀಸರು ಬಂಧಿಸಿದ್ದು ಮಾದಕ ದ್ರವ್ಯ ಸೇವಿಸಿ ಅಮಲಿನಲ್ಲಿದ್ದ ವೇಳೆ ಕೃತ್ಯ ಎಸಗಿರುವುದಾಗಿ ಆಕೆ ಒಪ್ಪಿಕೊಂಡಿದ್ದಾಳೆ. ಈ ನಡುವೆ ಆಕೆಯ ಇತರ ಇಬ್ಬರು ಮಕ್ಕಳನ್ನು ನಗರ ಏಜೆನ್ಸಿಯೊಂದರ ಆರೈಕೆಯಲ್ಲಿ ಇರಿಸಲಾಗಿದೆ.
ಫ್ಲೋರಿಯಾನೊ ತನ್ನ ಪತಿಯಿಂದ ವಿಚ್ಛೇದನ ಪಡೆಯಲು ನಿರ್ಧರಿಸಿದ್ದಳು. ಆದರೆ ಇದಕ್ಕೆ ಪುತ್ರಿ ಅಲನಿ ವಿರೋಧ ವ್ಯಕ್ತಪಡಿಸಿರುವುದೇ ಕೃತ್ಯ ಎಸಗಲು ಕಾರಣ ಎಂದು ತಿಳಿದು ಬಂದಿದೆ. ಫ್ಲೋರಿಯಾನೊ ತನ್ನ ಮಗಳು ಅಲನಿ ಸಿಲ್ವಾಳನ್ನು ತುಂಡರಿಸಲು “ಸುಲಭವಾದ ಮಾರ್ಗ” ವನ್ನು ತಿಳಿಯಲು ಇಂಟರ್ನೆಟ್ ಸರ್ಚ್ ಮಾಡಿದ್ದಳು ಎಂದು ಬ್ರೆಜಿಲಿಯನ್ ಸಿವಿಲ್ ಪೋಲಿಸರು ತಿಳಿಸಿದ್ದಾರೆ.
ಫ್ಲೋರಿಯಾನೊಗೆ ಡೇಟಿಂಗ್‌ ಅಪ್ಲಿಕೇಶನ್‌ ಮೂಲಕ ವ್ಯಕ್ತಿಯೊಬ್ಬನ ಪರಿಚಯವಾಗಿದ್ದು, ಆತನನ್ನು ತನ್ನ ಮನೆಗೆ ಆಹ್ವಾನಿಸಿದ್ದಳು. ಈ ವ್ಯಕ್ತಿ ಮನೆಗೆ ಭೇಟಿ ನೀಡುವ ಮೊದಲೇ ಮಗಳನ್ನು ಕೊಲೆ ಮಾಡಿದ್ದಳು. ಫ್ಲೋರಿಯಾನೊ ತನ್ನ ಪುತ್ರಿಯ ದೇಹದ ಭಾಗಗಳನ್ನು 3 ವಾರಗಳ ಕಾಲ ರೆಫ್ರಿಜರೇಟರ್‌ನಲ್ಲಿ ಇರಿಸಿ ನಂತರ ಹತ್ತಿರದ ಒಳಚರಂಡಿಗೆ ಎಸೆದಿದ್ದಳು.
