ಮಾಸ್ಕೊ: ರಷ್ಯಾದ ಬಾಹ್ಯಾಕಾಶ ನೌಕೆ ಲೂನಾ 25 ಚಂದ್ರನ ಮೇಲೆ ಇಳಿಯುವ ವೇಳೆ ಪತನಗೊಂಡಿದೆ. (ಕ್ರಾಶ್ ಲ್ಯಾಂಡೆಡ್). ನಾಳೆ ಆಗಸ್ಟ್ 21ರಂದು ಚಂದ್ರನ ದಕ್ಷಿಣ ಧ್ರುವದಲ್ಲಿ ನೌಕೆ ಇಳಿಯಲಿದೆ ಎಂದು ಈ ಹಿಂದೆ ರಷ್ಯಾ ಬಾಹ್ಯಾಕಾಶ ಸಂಸ್ಥೆ ತಿಳಿಸಿತ್ತು. ಇದೀಗ ನೌಕೆ ಬಾಹ್ಯಾಕಾಶ ಕೇಂದ್ರದೊಂದಿಗೆ ಸಂಪರ್ಕ ಕಡಿತಗೊಂಡಿರುವುದು ದೃಢಪಟ್ಟಿದೆ.
ನೌಕೆಯನ್ನು ಹುಡುಕಲು ಮತ್ತು ಅದರೊಂದಿಗೆ ಸಂಪರ್ಕ ಸಾಧಿಸಲು ಆಗಸ್ಟ್ 19 ಮತ್ತು 20 ರಂದು ತೆಗೆದುಕೊಂಡ ಕ್ರಮಗಳು ಯಾವುದೇ ಧನಾತ್ಮಕ ಫಲಿತಾಂಶ ನೀಡಿಲ್ಲ. ನೌಕೆಯು ಆಫ್-ಡಿಸೈನ್ ಕಕ್ಷೆಗೆ ಬದಲಾಗಿದ್ದು, ಚಂದ್ರನ ಮೇಲ್ಮೈಯೊಂದಿಗೆ ಘರ್ಷಣೆಯ ಪರಿಣಾಮವಾಗಿ ಪತನಗೊಂಡಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ಸುಮಾರು ಐದು ದಶಕಗಳ ನಂತರ ರಷ್ಯಾ ಚಂದ್ರಯಾನ ಕೈಗೊಂಡಿದ್ದು, ದಕ್ಷಿಣ ಧ್ರುವದಲ್ಲಿ ನೌಕೆಯನ್ನು ಇಳಿಸಲು ಸಿದ್ಧತೆ ಮಾಡಿಕೊಂಡಿತ್ತು. ಲೂನಾ-25 ಅನ್ನು ಆಗಸ್ಟ್ 10 ರಂದು ಉಡಾವಣೆ ಮಾಡಲಾಗಿತ್ತು. ಆಗಸ್ಟ್ 16 ರಂದು ಚಂದ್ರನ ಕಕ್ಷೆಯನ್ನು ಪ್ರವೇಶಿಸಿತ್ತು. ಇದು ಭಾರತದ ಚಂದ್ರಯಾನ 3 ನೌಕೆ ಚಂದ್ರನಲ್ಲಿ ಇಳಿಯುವ ಮೊದಲು ಅಂದರೆ ಸೋಮವಾರ (ಆಗಸ್ಟ್ 21) ಇಳಿಸಲು ರಷ್ಯಾ ಸಿದ್ಧತೆ ನಡೆಸಿತ್ತು.