ಬೀಜಿಂಗ್: ಚೀನಾದ ಮಾಜಿ ಪ್ರಧಾನಿ, ದೇಶದ ಪ್ರಮುಖ ಆರ್ಥಿಕ ತಜ್ಞರಲ್ಲಿ ಒಬ್ಬರೆನಿಸಿದ್ದ ಲೀ ಕೆಕಿಯಾಂಗ್ (68) ಅವರು ಹೃದಯಾಘಾತದಿಂದ ನಿಧನರಾಗಿದ್ದಾರೆ.
ಶಾಂಘೈನಲ್ಲಿ ಗುರುವಾರ (ಅ.26) ಲೀ ಕೆಕಿಯಾಂಗ್ ಅವರಿಗೆ ಹೃದಯಾಘಾತ ಸಂಭವಿಸಿದ್ದು, ಇಂದು(ಅ. 27) ಬೆಳಗಿನ ಜಾವ ಅವರು ಮೃತಪಟ್ಟಿದ್ದಾರೆ ಎಂದು ಚೀನಾ ಮಾಧ್ಯಮಗಳು ವರದಿ ಮಾಡಿವೆ.
ಲೀ ಕೆಕಿಯಾಂಗ್ ಅವರು 2013-23ರವರೆಗೆ ಚೀನಾದ ಪ್ರಧಾನಿಯಾಗಿದ್ದರು. ಕಳೆದ ಮಾರ್ಚ್ನಲ್ಲಿ ಇವರ ಅಧಿಕಾರದ ಅವಧಿ ಮುಗಿದಿತ್ತು. ಕ್ಸಿ ಜಿನ್ಪಿಂಗ್ ಅವರು ತಮ್ಮ ಅಧಿಕಾರ ಭದ್ರಗೊಳಿಸುವ ಹಾಗೂ ಆರ್ಥಿಕ ಮತ್ತು ಸಮಾಜಿಕ ವಲಯದಲ್ಲಿ ಪ್ರಬಲ ಅಧಿಕಾರ ಹೊಂದಿದ ಬಳಿಕ ಲೀ ಕೆಕಿಯಾಂಗ್ ಅವರು ಅಸಮಾಧಾನಗೊಂಡಿದ್ದರು ಎನ್ನಲಾಗಿದೆ.
ಇವರು ಆರ್ಥಿಕ ತಜ್ಞರೂ ಆಗಿದ್ದು, ಪ್ರಧಾನಿಯಾಗಿದ್ದ ಅವಧಿಯಲ್ಲಿ ಹಲವು ಆರ್ಥಿಕ ಸುಧಾರಣೆಗಳಿಗೂ ಮುನ್ನುಡಿ ಬರೆದಿದ್ದರು. ಲೀ ಕೆಕಿಯಾಂಗ್ ಅಧಿಕಾರದ ಅವಧಿ ಮುಗಿಯುತ್ತಲೇ ಕ್ಸಿ ಜಿನ್ಪಿಂಗ್ ಅವರು ತಮ್ಮ ಆಪ್ತ ಲೀ ಕಿಯಾಂಗ್ ಅವರನ್ನು ಪ್ರಧಾನಿಯನ್ನಾಗಿ ನೇಮಿಸಿದರು.