ಬೀಜಿಂಗ್: ಕೊರೊನಾದ ಹೊಸ ರೂಪಾಂತರ ವೈರಸ್ ಭೀತಿಯ ಮಧ್ಯೆ ಚೀನಾದ ಹೆಚ್ಚಿನ ಭಾಗಗಳ ಮೇಲೆ ಲಾಕ್ ಡೌನ್ ರೀತಿಯ ನಿರ್ಬಂಧ ಹೇರಲಾಗಿದೆ. ಇದಕ್ಕೆ ಕಾರಣ ಹೊಸ ಅಧ್ಯಯನದಲ್ಲಿ ನೀಡಲಾಗಿರುವ ಎಚ್ಚರಿಕೆ. ಇದರಲ್ಲಿ ಕೋವಿಡ್-19 ನಿರ್ಬಂಧಗಳನ್ನು ಏನಾದರೂ ತೆಗೆದುಹಾಕಿದರೆ ಚೀನಾವು ಸಾಂಕ್ರಾಮಿಕ ರೋಗದ ‘ಭಯಾನಕ ಪರಿಸ್ಥಿತಿ’ ಎದುರಿಸಬೇಕಾಗುತ್ತದೆ ಎಂದು ಹೇಳಲಾಗಿದೆ.
ಚೀನಾದಲ್ಲಿ ಪ್ರತಿದಿನ 6.30 ಲಕ್ಷಕ್ಕೂ ಹೆಚ್ಚು ಸೋಂಕು ಪ್ರಕರಣಗಳು ವರದಿಯಾಗಬಹುದು ಎಂದು ಹೇಳಲಾಗುತ್ತಿದೆ. ಹೀಗಾಗಿ ಡ್ರ್ಯಾಗನ್ ದೇಶವು ಇದೀಗ ದೊಡ್ಡ ಸಂಕಷ್ಟಕ್ಕೆ ಸಿಲುಕಿದೆ.
ಚೀನಾ ಇತರ ದೇಶಗಳಂತೆ ಪ್ರಯಾಣ ನಿಷೇಧ ತೆಗೆದುಹಾಕಿದರೆ ಮತ್ತು ಕೊರೊನಾ ವೈರಸ್ ಸೋಂಕಿನ ಹರಡುವಿಕೆಗೆ ಶೂನ್ಯ ಸಹಿಷ್ಣುತೆಯ ವಿಧಾನವನ್ನು ಕೈಬಿಟ್ಟರೆ ದೇಶದಲ್ಲಿ ಪ್ರತಿದಿನ 6.30 ಲಕ್ಷಕ್ಕೂ ಹೆಚ್ಚು ಪ್ರಕರಣಗಳು ವರದಿಯಾಗಬಹುದು ಎಂದು ಪೀಕಿಂಗ್ ವಿಶ್ವವಿದ್ಯಾಲಯದ ತಜ್ಞರ ವರದಿ ಹೇಳಿದೆ. ‘ತೀವ್ರ ರೋಗ ಹರಡುವ ಸಾಧ್ಯತೆ ಇದ್ದು, ಇದರ ಹೊರೆಯನ್ನು ವೈದ್ಯಕೀಯ ವ್ಯವಸ್ಥೆಯೇ ಹೊರಲು ಸಾಧ್ಯವಿಲ್ಲ’ ಅಂತಾ ಮೌಲ್ಯಮಾಪನದಿಂದ ತಿಳಿದುಬಂದಿದೆ’ ಎಂದು ವರದಿ ಹೇಳಿದೆ. ಚೀನಾದಲ್ಲಿ ಶನಿವಾರ 23 ಹೊಸ ಕೋವಿಡ್-19 ಪ್ರಕರಣಗಳು ವರದಿಯಾಗಿದ್ದು, ಅದರಲ್ಲಿ 20 ಪ್ರಕರಣಗಳು ಇತರ ದೇಶಗಳಿಂದ ಬಂದಿವೆ ಮತ್ತು ಬೀಜಿಂಗ್ ಸೇರಿದಂತೆ ಇತರ ನಗರಗಳಲ್ಲಿ ಸೋಂಕಿನ ಪ್ರಕರಣಗಳು ಹೆಚ್ಚಾಗುತ್ತಿವೆ.
ಪ್ರಸ್ತುತ ಈ ನಿಯಮಗಳು ಚೀನಾದಲ್ಲಿವೆ
ಪ್ರಸ್ತುತ ವಿದೇಶಗಳಿಂದ ಚೀನಾಕ್ಕೆ ಬರುವವರು ಗೊತ್ತುಪಡಿಸಿದ ಹೋಟೆಲ್ಗಳಲ್ಲಿ 21 ದಿನಗಳ ಕಾಲ ಪ್ರತ್ಯೇಕವಾಗಿರಬೇಕಾಗುತ್ತದೆ. ಆಗಸ್ಟ್ ನಿಂದ ಅಮೆರಿಕ, ಬ್ರಿಟನ್, ಇಸ್ರೇಲ್, ಸ್ಪೇನ್ ಮತ್ತು ಫ್ರಾನ್ಸ್ ನ ಡೇಟಾವನ್ನು ವಿಶ್ಲೇಷಿಸುವ ಮೂಲಕ ಚೀನಾ ಈ ದೇಶಗಳಂತಹ ತಂತ್ರವನ್ನು ಅಳವಡಿಸಿಕೊಂಡರೆ ಅದರ ಪರಿಣಾಮ ಏನಾಗಬಹುದೆಂದು ನಿರ್ಣಯಿಸಲು ವಿಜ್ಞಾನಿಗಳು ಪ್ರಯತ್ನಿಸಿದ್ದಾರೆ. ಆಗಸ್ಟ್ ನಲ್ಲಿ ಈ ಎಲ್ಲಾ ದೇಶಗಳಲ್ಲಿ ವ್ಯಾಕ್ಸಿನೇಷನ್ ಪ್ರಮಾಣವು ಚೀನಾಕ್ಕಿಂತ ಹೆಚ್ಚಿತ್ತು. ಸಾಂಕ್ರಾಮಿಕ ರೋಗವನ್ನು ಎದುರಿಸಲು ಚೀನಾ ಕೂಡ ಅಮೆರಿಕದ ತಂತ್ರವನ್ನು ಅಳವಡಿಸಿಕೊಂಡರೆ ದೈನಂದಿನ ಪ್ರಕರಣಗಳ ಸಂಖ್ಯೆ 6,37,155 ಆಗಿರಬಹುದು ಎಂದು ವಿಜ್ಞಾನಿಗಳು ಅಂದಾಜಿಸಿದ್ದಾರೆ. ಆದರೆ ಆಗಸ್ಟ್ ನಲ್ಲಿ ಪ್ರತಿದಿನ 1,50,098 ಪ್ರಕರಣಗಳು ಕಂಡುಬರುತ್ತಿವೆ.