ಹಾಂಗ್‌ಕಾಂಗ್‌: ದೇಶದಲ್ಲಿ ವಯಸ್ಸಾದವರ ಸಂಖ್ಯೆ ಹೆಚ್ಚುತ್ತಿದೆ. ಜನನ ಪ್ರಮಾಣ ಕುಸಿಯುತ್ತಿದೆ. ಈ ಹಂತದಲ್ಲಿ ಮಹಿಳೆಯರ ಪಾತ್ರ ಅತ್ಯಂತ ಕಠಿಣವಾಗಿದ್ದು, ಕುಟುಂಬದ ಹೊಸ ಪರಿಕಲ್ಪನೆಯನ್ನು ಹುಟ್ಟುಹಾಕಬೇಕಿದೆ ಎಂದು ಚೀನಾ ಅಧ್ಯಕ್ಷ ಷಿ ಜಿನ್‌ ಪಿಂಗ್‌ ಹೇಳಿದ್ದಾರೆ.
ಮಕ್ಕಳ ಪಾಲನೆಗೆ ತಗಲುವ ಖರ್ಚು, ಅವರ ಭವಿಷ್ಯ ಕಟ್ಟುಕೊಡುವಲ್ಲಿನ ಸಮಸ್ಯೆ, ಲಿಂಗ ತಾರತಮ್ಯ ಹಾಗೂ ಮದುವೆ ಆಗಲು ಇಷ್ಟ ಇಲ್ಲದಿರುವ ಸಮಸ್ಯೆಯಿಂದಾಗಿ ಬಹಳಷ್ಟು ಮಹಿಳೆಯರು ಮಕ್ಕಳನ್ನು ಹೊಂದಲು ಹಿಂದೇಟು ಹಾಕುತ್ತಿದ್ದಾರೆ. ಹೀಗಾಗಿ ಯುವ ಸಮುದಾಯಕ್ಕೆ ಮದುವೆ, ಮಕ್ಕಳು ಕುಟುಂಬ ಕುರಿತು ಮಾರ್ಗದರ್ಶನ ಮಾಡಬೇಕಿದೆ ಎಂದು ಷಿ ಹೇಳಿದ್ದಾರೆ. ಚೀನಾದ ಸಾಂಖ್ಯಿಕ ಇಲಾಖೆಯು ಜನವರಿಯಲ್ಲಿ ಬಿಡುಗಡೆ ಮಾಡಿದ ವರದಿ ಅನ್ವಯ ಕಳೆದ ಆರು ದಶಕಗಳ ಅಂಕಿಅಂಶಗಳಿಗೆ ಹೋಲಿಸಿದಲ್ಲಿ ಇದೇ ಮೊದಲ ಬಾರಿಗೆ ಚೀನಾದ ಜನಸಂಖ್ಯೆ ವೃದ್ಧಿ ಕುಸಿದಿದೆ. ಈ ನಿಟ್ಟಿನಲ್ಲಿ ಷಿ ಹೇಳಿಕೆ ಮಹತ್ವ ಪಡೆದಿದೆ.
